Kuboka 34
34
Ibau yengi ibeli ya malibu ili Lilaganu
1Bambu Sapanga ampwagila Musa, “Basa ibau ibeli ya malibu ibiya ngati yu utumbuli yela, nanepani niandika malobi gala gagabii mu ibau yu utumbuli yewakajula yela. 2Guliandiya kilabu pulukela, wihika kuketangana na nepani kunani jiki kitombi suku Sinai. 3Mundu jokapi jiika pamu wehapa, wala jiibonikana pandu pokapi pikitombi sehesi, wala likondoo au ng`ombi bailima pambipi ni kitombi sehesi.” 4Ndienu, Musa jabasa ibau ibeli ya malibu ngati yu kutumbuli. Jaboka pulukela na mangani, jakwela kukitombi suku Sinai ngati Bambu Sapanga eandagalakiya, koni jubii ni ibau ya malibu mu kuboku jaki.
5Bambu Sapanga jahuluka mu liundi, jajema pamu na Musa, jililandila liina laki, “Bambu Sapanga.” 6Ndipala Bambu Sapanga japeta palongi jaka Musa jwaendaliya kulilandi, “Bambu Sapanga, nepani Bambu Sapanga na Bambu Sapanga jwini ikia na mbengela, wala ngasemii ni inyela yakanyata, ndweli upali nu kuhobaleka. 7Nepani naapai bandu maelupu naalangi uamboni, nekake ubaja na mahakau. Lakini kwa namuna jokapi nganikotoki kwaalapu baahenga ubaja, naalepesa bana na asoko ubaja goahengiki akaatati na ahoku babu mbaka kibeleku sa tatu nu nsesi.”
8Apalapa Musa japega magoti nukujinama mbaka pai, anndumbaliya Bambu Sapanga. 9Musa japwaaga, “Bambu wangu, ndaba gumbeki mbengela palongi jaku, nuguloba gujenda pamu na twepani. Bandu haba abii ni ing'omu, lakini utulekakia ubaja witu na mahakau gitu, utujopa ngati bandu baku wamwete.”
Lilaganu lihengeka kabee
Kuboka 23:14-19; Kukomboka 7:1-5; 16:1-17
10Bambu Sapanga ampwagila Musa, “Henu ngiti nhenga lilaganu na bandu baku. Nihenga hindu yukusangasa palongi jaku yeyuye ngasegawaiki kupiti punndema woti, wala mu nndema wokapi. Lakini mwabandu boti montama pikilanda jabu bagabona mahengu gangu makolongu. Ndaba nihenga lijambu lukusangasa kwa ndaba jaku. 11Nkamula miilu jenumpeke lelenu. Naabenga palongi jinu Aamoli na Akanani na Apelizi na Ahivi na Ayebusi. 12Mwilihangalia mwiilenga kuhenga lilaganu na bandu bu nndema gonzenda kutama, ndaba hesi sibiya kitaba pikilanda jinu. 13Lakini mwiibombula pandu pabu pukupiki matambiku nukutunulana imong'umong'u yabu nu kusekulana nguzu ya Ashela yebiilumbali.”
14Mwiilumbali isapanga yokapi, ndaba nepani Bambu Sapanga manyikana kwi liina la. Jojubii na Wipu. 15Mwiijetangane sindu sokapi na bandu bu nndema hogu, ndaba pabalilumbaliya isapanga yabu yi isoli nu kuipiiki litambiku, biitenda kunkoka, nanamu mwiitenda kukolukeka kula posu jeapiiki matambiku isapanga yabu, 16na akakombu binu bakajukua aka kamwali babu baalumbaliya isapanga, na akakamwali haba bailumbaliya isapanga yabu, baakolua akakombu binu nabombi kuilumbali isapanga yabu.
17Mwalilenganakela isapanga isoli kwikisoma soma sukuugati.
18“Mwiihenga matola ga mabumunda gangakujege amila. Kwa masoba saba mu mwei wa Abibu yani ndi mwei unsensi nkula mabumunda gangakujege amila kwi kipindi seapangiki, ngati enundagalakia, ndaba mu mwei hogu ndi panummboa ku nndema uku Misili. 19Kila jojatumbulia kusaliwa mwanalomi ndi jwangu, na kila kibeleku su kutumbuli yi inyama yaku yoti ya mapongu, ya ng`ombi au makondoo au imbui. 20Kibeleku su kutumbuli siliponda wakikombula sukumbiiki likondoo. Ana ngawalikombo walitunula nhingu. Ahelahe kabee bana bii boti akanalomi bu kutumbuli mwiitenda kwaakombo. Mundu jokapi jwihika palongi jangu maboku matopu.” 21“Kwa masoba sita mwiihenga mahengu ginu, lakini lisoba la saba mwitenda kupomulela, hata anakubii ndi kipindi suku kulema au kuhusa kupalika kupomulela. 22Mwiihenga matola ga majuma gukuhusa pu kutumbuli kuhusa inganu na mwihenga matola ginu ibanda mwisu ukulema kipindi sukukusanya ilebi inu.”
23“Mala patatu kwa saka akanalomi boti biikusanyika palongi jangu nepani Bambu Sapanga, Sapanga jwa Aizilaeli. 24Naabenga bandu ba makabila gangi palongi jinu na kujonzuke mipaka jinu. Nga mundu jokapi jojagutokuliya nndema winu kipindi pamwikusanyika kunumbali nepani Bambu Sapanga, Sapanga winu mala patatu kila saka.”
25Wiimbiki matambiku ga mwai pamu na matambiku ga mabumunda gagabi na amila, wala matambiku gi lisoba la Pasaka lihigali mbaka pulukela.
26Ilebi yu utumbuli kuhuma mwi litui laku waileta kunyumba jangu, nepani Bambu Sapanga, Sapanga waku.
“Witeleka kakondoo au kambui sukutumii mabeli ga anyongo baki.”
27Ndipala, Bambu Sapanga ampwagila Musa, “Andika malobi haga, ndaba kulengana na malobi haga, nhenga lilaganu na wehapa pamu na bandu buku Izilaeli.” 28Musa jatama ku kitombi hoku pamu na Bambu Sapanga masoba alubaini ikilu na muhi, ngasejakula posu wala kunywa masi. Najombi jaandika malobi haga muibau ililaganu na miilu komi jela.
Musa juhuluka ku kitombi suku Sinai
29Musa pajabia juhuluka kukitombi suku Sinai koni jutotwii ibau ibeli yela yeibii na malobi gi lilaganu mu maboku gaki, ngasejamanyiki kubanga, pamihu jaki kwabiya kung`anya ndaba jabii julongi na Bambu Sapanga. 30Aloni na bandu buku Izilaeli pabummbona Musa, pamihu jaki patenda kung'anya, bajogopa kunhegale. 31Lakini Musa ankema Aloni na akakilongosi babandu buku Izilaeli ajenda pambipi najombi, ndipala jatenda kulonge nabu. 32Mwenikatai Aizilaeli boti bahika pambipi na Musa, najombi jaapekiya miilu joti yeyuye Bambu Sapanga ampekiya ku kitombi kola. 33Musa pajajomula kulongee na bandu jayekaliya pamihu jaki ku kitambaa seking'anya. 34Lakini kwabiya kila masoba Musa ejujenda kulonge na Bambu Sapanga mu lihema la Sapi, jabiya juboa kitambaa mbaka pajupita kunza. Pajukubika jupita kunza jaapwagila Aizilaeli majambu goti gaanndagalaki, 35nabombi Aizilaeli bapabona pamihu jaki patenda kung`anya. Ndienu Musa jayekaliya kabee pamihu jaki ku kitambaa mbaka pajajenda kulonge na Bambu Sapanga.
Currently Selected:
Kuboka 34: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
