Kuboka Ulongulelu
Ulongulelu
Kitabu su kuboka kiendale kulandi luhomu lu lukolu lwaka Abulahamu jejatumbuliya mu kitabu su Kutumbuli. Lilobi hale lu “Kuboka,” lilandi lihengu la bandu buku Izilaeli pabakwelapuka kuhuma ku nndema uku Misili nu kubuja kunndema goguwe Sapanga anndagila Abulamu. Kulengana na hebaalandila asomi ahobale pandu pakolongu pi kitabu su Kuboka kiandikwi nu nndota Musa, ni lijambu heli lipwagiki mu kitabu senze. Mukitabu su Kutumbuli lipungu 24:4, lutulandi namuna Musa ejuandiki pandu pi kitabu hesi. Mu kitabu sa Joshua 8:31, jilangi miilu mu kitabu su Kuboka 20:25, kipwaga ngati, “Kiandikwi mu kitabu si miilu jaka Musa.” Mu Lilaganu Linyai lilangi itabu yejuandiki Musa mala jingipi, ngati ekulongaleka kupete sesapitila kipindi kiholi pasanyaka mwotu sanga kutinika Majambu haga gaandikwi, mu kitabu saka Musa senze, Linga Maluko 12:26. Kubonikana Aizilaeli kuboka ku Misili kwapitila pikilanda sa yaka ya elupu jimu na mia itatu au elupu jimu na mia nsesi kabula jukusaliwa Kilisitu. Mu kitabu sa Akabambu Akolongu su kutumbuli lipungu la 6:1 alogwi kubanga lihengu lu kuboka lahengika saka sa mia nsesi na semanini kabula ja saka su nnsesi su ulongosi waka Sulemani ngati bambu nkolongu juku Izilaeli.
Kitabu su Kuboka kihingamaki namuna Sapanga ejahenga ili kulangi kuhobaleka kwaki kupete malagi gajaalagila Abulahamu Isaka na Yakobu. Kitabu kilandi mahengu makolongu gu ukombosi waka Sapanga kwa bana baka Abulahamu babube ndi bandu bunndema nkolongu uku Izilaeli, pababiya ahuma ku nndema uku Misili, linga mu lipungu 1:12. Kuboka hoku Sapanga jaalongusa bandu baki mbaka mu ubamba gogubii pai ji kitombi suku Sinai pandu papuje Sapanga ampekiya Musa miilu jingi ili Aizilaeli bijipwata, linga mu lipungu 12:19. Malagalaki haga galandi namuna epalika kuhenga, namuna ebapalika kupia matambiku na maelesu gingi gagalandi kusenga Lihema la Sapi pandu papapalika kuba pukutama Sapanga pikilanda jabu, kabee Lisanduku li Lilaganu na hindu yengi kwa ndaba jukundumbali Sapanga nkati ji Lihema la Sapi ni ingobu yeipalika kuwata agolu, linga mu lipungu 20-31. Ndienu elapeta lihengu lukung'anambuka kipindi bandu buku Izilaeli pabililenganakiya kimong'umong'u sa ng'ombi ja zahabu, Musa jaketangana na Sapanga kabeti baada jukung'anambuka hoku, linga mu lipungu 32:33. Pandu pa mwisu pi kitabu senze tusoma namuna hindu yealogwi pamwandi namuna healenganaki, linga mu lipungu 33:40.
Gagabii nkati
Namuna bandu buku Izilaeli ebaabekiki mu utumwa ku nndema uku Misili. Lipungu 1
Kummanyisa Musa kwa bandu nukunndandi kwa bandu kutama kwaki kuhuma mu umwana mbaka pabunkema kwaakombo bandu baka Sapanga. Lipungu 2-4
Ndienu jojuandiki julandi namuna Sapanga ejahenga nginyuli nukugulapu nndema uku Misili kwa malapuli makolongu kwa ndaba jakwaakombo bandu baki kuhuma mu nndema gola na kabee kuhuma mu lujogopu lwa akomana ngondu baka Falau. Lipungu 5-15:21.
Kutumbu hapa bandu bu nndema uku Izilaeli bajenda nu kuhika pandu pi kitombi suku Sinai. Lipungu 15-19:22.
Tusoma namuna Sapanga eampekiya mihilu, malagalaki gagabia na malandi gingipi gagalandila namuna bandu baka Sapanga, Aizilaeli ebapalika kutama nukunndumbali Sapanga. Lipungu 20-31
Kuandikwi namuna bandu buku Izilaeli ebung'anambuka Sapanga pabunkolua nndongu waka Musa joankema Aloni jaalenganakiya kimong'umong'u jejabii ngati ng'ombi ja zahabu. Lipungu 32
Tusoma namuna Musa ejugubona unang'anu ukolongu waka Sapanga nakwaabola Aizilaeli malagalaki gaka Sapanga pamu nakwaabola namuna jukusenga Lihema la Sapi, Lisanduku li Lilaganu na hindu yengi yukunndumbali Sapanga mu Lihema la Sapi ni ingobu yeipalika kuwata agolu. Lipungu 33-40.
Currently Selected:
Kuboka Ulongulelu: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.