Utumbuli 50
50
1Hapa Josepu jaajinamiya ntui wa atati baki nukujobate koni jakalela. 2Ndipala, jaalagalakiya akasing`anga baki bumpakia Izilaeli atati baki, mitela jukunkenga jiibola nabombi bahenga hela. 3Batumia masoba alubaini ndaba ndi kipindi sesapalika kujege mitela ili yega jiibola. Nabombi bandu buku Misili bunndelila Yakobu kwa masoba sabini.
4Ebajomula kukanga luwai, Josepu jaapwagila akolongu ba bandu baka Falau, “Mii ni malobi mbala kumpwaagi Falau mpepa koku noba nndongila naku badala jangu, ‘Atati bangu bambwagila napa ili nhenga ngati heambwagi nukumbwaagi, 5nepani nhegale kuwa. Kupalika kundaga ku litenge lenenganaki ku Kanani.’ Henu nunndoba junyetakaliya nyenda kwaataga atati bangu ndi nihika kabee.”
6Falau jajibua, “Jenda ukaataga atati baku ngati ebugulapila.” 7Ndienu Josepu jaboka kujenda kwaataga atati baki jalongana na atumisi boti baka Falau, aseja ba nyumba jaka Falau pamu na aseja bu nndema woti uku Misili. 8Ahelahe na Josepu jalongana na alongu baki boti, aka kilongu boti baka Yakobu. Mu lieneu luku Gosheni bahigaliya bana babu pena pamu na makondoo ni imbui na ng`ombi yabu. 9Kabee balongana naku baakwelale falasi na magali, wabiya nsambi nkolongu ngamaa.
10Pabahika ku kibanza sukupeta ilebi sa Atati kwii ja losi luku Yoludani, balobalakiya ku usungu nkolongu, najombi Josepu jaahengila ahengo matanga ga masoba saba. 11Akanani bu Musi we hogu, pababona kulobalake kobahenga ku kibanza sa Atadi, bapwaganiya, “Kulobalake hako kwa Amisili sakaka kukolongu.” Henu ndi pandu je pala kwakemika Abelimisili, napombi pabii kwii juku Yoludani.
12Henu, bana baka Yakobu baahengila atati babu ngati ebalagalakiya. 13Baajukua mbaka musi uku Kanani, baataga pi likolo lelibii mu litui luku Makipela, upandi golipiti lyoba guku Mamule. Likolo pamu ni litui heli Ibulaimu jabiya julombiki kwaka Epuloni Nhiti, ili pabiya pandu paki pukuntagi. 14Ebabiya baatagiki atati baki, Josepu jakelubuka ku Misili pamu na alongu baki na bandu boti babalongini naku kujenda kwaataga atati baki.
Josepu jaaboa kiholu akalongu baki
15Ekwapeta kuwa kwa atati babu, alongu baka Josepu bapwaganinya, “Pengi Josepu juwesa kulepa ubaja gwoti gotunhengi.” 16Henu bumpelakiya Josepu ujumbi, “Atati baku kabula jukujomoka balagalakiya ana, 17‘Mwampwagila Josepu kwa ndaba jangu. Gupepa koku gwaalekakiya akalongu baku makosa gabu ni kihakau soti seaguhengi.’ Henu gupepa koku gutulekakiya kihakau setuguhengi twepani twaatumisi baku baka Sapanga wa atati baku.” Josepu pajapata ujumbi gola jalei ngamaa.
18Ndipala aka kilongu bala bunhikila, bajinama mbaka pai palongi jaki, nukupwaaga, “Linga twepani twaatumisi baku.”
19Lakini Josepu jaapwagila, “Mwiijogopa, boo nepani ndi nguba badala jaka Sapanga? 20Mwanganya mwapai kuhenge lihaya, lakini Sapanga janhengila gaamboni ili bandu bingi apata kuba bomi ngati emukubona lelenu. 21Henu mwiijogopa. Nepani ngiti nuntunza mwanganya pamu na bana binu.” Ndienu jaapolisa mioju nukulongee naku sapi.
Kuwa kwaka Josepu
22Josepu jaendalia kutama mu nndema uku Misili pamu na aka kilongu baki boti ba atati baki, jaatama kwa yaka mia jimu na komi. 23Josepu jawesiki kwaabona bana na asoko baka Epulaimu mwana waki na kabee jaabona bana baka Makili mwana waka Manasi na kwaajuku ngati bana baki. 24Mwenikatai Josepu jaapwagila alongu baki, “Nepani henu nhegale kuwa. Lakini Sapanga jiihika kunzangatii. Jammboa mu nndema gongo nukumpeleka mu nndema goanndagila Ibulaimu ni Isaka na Yakobu.” 25Ndipala Josepu jaalapisa bana baka Izilaeli kupwaaga, “Sapanga pajihika kunzangatii, mwihakikisa ana, mwiijukua mahupa gangu kuhuma kongo.” 26Ndienu, Josepu jawelila ku Misili, koni jubii na yaka mia jimu na komi. Nabombi bapakia yega jaki mitela jiibola, bijibeka yega mu lisanduku ku Misili.
Currently Selected:
Utumbuli 50: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
