Utumbuli 49
49
Yakobu jaapenge bana baki
1Yakobu jaakema bana baki, jaapwagila, “Nkusanyika pamu numpwagila majambu gagampata masoba gagahika.” 2“Nkusanyika nnzoaninya mwabana baka Yakobu,
nnzoaninya nepani Izilaeli atati binu. 3Wa Lubeni wewatumbuliya kubelakeka,
wehapa ndi makili gangu nugubelika kipindi su ukombu gwangu.
Wehapa gu nkolongu nu gubii na makili kwaapeta alongu baku. 4Wehapa gubii ngati masi gi kikoka.
Lakini ngawiikubi wamwana ju utumbuli kabeti,
ndaba wagoni nilibangu langu la atati baku,
wehapa wapilia kitanda sangu sukukwela panani jaki hena wehapa wakweile.” 5“Simoni na Lawi mwakilongu,
hindu yukukomane anhenge kuhenga ukatili, 6lakini nepani nganyetangane nabu,
wa mbomu jangu wijetakane ni mikutanu jabu,
ndaba mu inyela yabu baakoma bandu,
ku ungukuna wabu basekula misipa mikolongu ju kugolu ulikambaku la ng`ombi. 7Niilapii yambamba inyela yabu ndaba ibii ingali ngani,
ni inyela yabu yanga ni ikia.
Nantawanisa mu makabila gaka Yakobu,
nantawanisa mu nndema uku Izilaeli.” 8“Wa Yuda alongu baku biitenda kugulumbalila,
abaja baku wainyatiya pahingu,
na alongu baku biijinama palongi jaku. 9Yuda gubii ngiti liimba likolongu lelipatiki inyama yejuiibengiki yaki mukinyoi nu lelijomwi kula posu jaki.
Ngati liimba lijinyosa nukugone pai,
liimba lana makili,
nya jojulenga kulijumua. 10Ubambu nkolongu ngawiboki kwaku Yuda,
wala ulongosi ngawiiboki mwamagolu gaku mbaka pajihika mbelekwa waki,
jojuwe bandu boti bupunndema biitenda kunzoanela. 11Jiikonga liponda laki mu Zabibu,
na katoli kaki mu Zabibu jejibii ja amboni.
Jusapa ingobu yaki mu divai ngeli ngati mwai. 12Mihu gaki ndi makeli ngati divai,
minu gaki manhuu kupeta masiba.” 13“Zebuluni wiitama lieneu luku mbwani,
mbwani jaki jibiya pandu pukujemeka meli,
nndema waki wiihegalaninya na musi uku Sidoni.” 14“Isakali jubii ngati liponda lana makili,
lelegone pikilanda ji misigu jaki. 15Jabona pandu pukupomule ndi paamboni,
na nndema gongo ndi gogunyambiki,
jajinamisa nngongu waki kutoto misigu,
jabiya ntumwa kuhenga mahengu sanga kupalika. 16Dani jibiya jojuamu kwa bandu baki,
ngati jumu jwa makabila guku Izilaeli. 17Jibiya ngati lijoka mwiindela,
lijoka limbetu lelibii na sumu mulutengu ji mwiindela,
jojuluma magolu ya falasi,
najombi jojukwei li falasi kuhabuka kihanga nyuma.” 18“Waa Bambu Sapanga nendale gunhokuaje.” 19“Gadi baantukaliya bandu baanyaga,
lakini jombi jajengaliya munyuma nakwaatukali.” 20“Nndema waka Asheli wiipia ilebi hingipi,
najombi jiipiya posu jejundengane bambu nkolongu.” 21“Naputali ngati kinyama sebikema holoku jojulekakiwi,
jojubeleka bana baabii sapi.” 22“Josepu ndi ngati nkongu gu nzabibu gogupapa mizabibu,
gogubeleka pulutengu ja pandu pagatimbilikana masi,
mandambi gaki gabambaa mu ukuta. 23Baapega mikoa busambuliya ngamaa,
bundekaliya mikoa nukunsumbuu ngamaa. 24Lakini lupendi lwaki lwakona nganganganga,
na maboku gaki bagapeki makili,
ku uwesu Jwana Makili gaka Yakobu,
ku liina luku Nndimi, Lilibu luku Izilaeli, 25ndi Sapanga wa atati baku ngiti jugujangatiya,
ndi Sapanga Jwana Makili jojagupengila,
gupata mbenge ji iyula kuhuma kunani ku maundi,
mbenge ya masi semusemu kuhuma pai,
mbenge ni ibeleku yaka nyongo ni mipugu. 26Mbenge ya atati baku ibii na makili kupeta,
mbenge yi milema ya yaka petapeta,
ibiya ya amboni kupeta milema ja mwandi.
Mbenge yeheyi ibiya panani jaka Josepu,
panani ju mmutu waki jola jobummbei kuba kilongosi kati ja alongu baki.” 27“Benjamini jubii ngati jibwa ingali ji mwikioli,
pulukela jaatukali abaja baki, na pakamii jubaga hindu yejaanyaga bandu.”
28Haga ndi makabila komi na mabeli guku Izilaeli na haga ndi malobi gabaapwagila atati babu pajaapengila, kila mundu ngati ekwapalika.
Kuwa nu kutagwa kwaka Yakobu
29Ndipala, jaalagalakiya bana baki ana, “Nepani nhegale kuwa nukujongana na bandu bangu. Mwiindaga pamu na aseja bangu mu likolo lelibii mu litui luku Epuloni Nhiti, 30ku Makipela kolipiti lyoba ku Mamule nndema uku Kanani, Ibulaimu jalombiki likolo ni litui heli laka Epuloni Nhiti libiya laki lukuntagi. 31Hoku ndi kobatagiki Ibulaimu nu nhwanamundu Sala, hoku ndo kobaatagiki Isaka nu nhwanamundu Lebeka na hoku ndi kununtagiki Lea. 32Litui leheli ni likolo laki balomba kwa Ahiti.” 33Yakobu pajajomula kwaapeke malobi ga mwisu bana baki, jakelubua magolu gaki pikitanda, jakuwa nukujongana na akahoku baki.
Currently Selected:
Utumbuli 49: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
