Utumbuli 48
48
Izilaeli jaapenge Epulaimu na Manasi
1Egapeta haga, Josepu japata majambu kupwaaga atati baki abii atamwa. Henu jajukua bana baki abeli, Manasi na Epulaimu, jajenda naku kwa atati baki. 2Yakobu paampwagila ana Josepu mwana waku juhikiki kugubona, jakasana kujumuka, nukutama pikitanda. 3Yakobu ampwagila Josepu, “Sapanga jwana makili jambitila panabii ku Luzu mu nndema uku Kanani, jatenda kumbenge. 4Jaambwagila, ‘Linga naguhenga gubiya ni ibeleku nukujonzukeka kuba likundi la bandu bingi, naguhenga gubiya mwaahoku wa bandu bingi. Nndema gongo naapekiya bana baku ajilongusa yaka yoti.’ ”
5Yakobu jaendaliya kupwaaga, “Bana baku abeli bawapatiki pani pa Misili kipindi ne kanuhika, ndi bana bangu, Epulaimu na Manasi bibiya bana bangu ngati eabii Lubeni na Simoni. 6Lakini bana bangi bawapata mwenikatai bibiya baku, mu nndema gobilisa biimanyikana kwi liina la alongu babu. 7Panabiya ngelabuka kuhuma ku Padani, Laeli jakuwa mu nndema uku Kanani, patwahegaliya kuhika ku musi uku Epulati, janekila usungu.” Ndienu nuntaga papa, mulutengu ji indela jejijenda ku Epulati yani Betileemu.
8Izilaeli pajaabona bana baka Josepu, anndalukiya, “Boo, baniaba be akanyane?”
9Josepu jaajibua atati baki, “Haba ndi bana bangu bajambekiya Sapanga pamii kongone.”
Izilaeli japwaaga, “Gupepa koku waaleta pambipi pamba ili naapengila.” 10Mihu gaka Izilaeli gabiya ngasegalinga sapi ndaba ju useja. Ndienu, Josepu jahegakiya bana baki pambipi na atati baki najombi jabusua na kwaajobate. 11Ndipala izilaeli ampwagila Josepu, “Kyee ngasenaholali kugubona kabee, lakini kumbi Sapanga junhwesisi kwaabona mbaka bana baku kabee.” 12Hapa Josepu jaaboa bana baki mwamagoti ga atati baki, ndipala jajinama kwi isima.
13Josepu jaatondabiya bana baki abeli, Epulaimu kuboku kwaki kumalele, koni anndangi kuboku kwaki ku mangega kwa atati baki, Manasi kuboku kwaki kwa mangega, anndangi kuboku ku malele kwa atati baki, jaahegakiya kwa ahoku babu. 14Lakini Yakobu jakobangana maboku gaki. Kuboku kwa malele jabeka kwaka Epulaimu jojabii nsoku nu kuboku kwa mangega jabeka pamutu jaka Manase jojabii kibeleku su utumbulii. 15Ndipala, Izilaeli ampengaliya Josepu kupwaaga,
“Sapanga jwa ahoku Ibulaimu ni Isaka jobunzoaninya mu womi wabu,
Sapanga jojunongwisi mu womi wangu mbaka lelenu,
16nu ntumi jwaka Sapanga jukunani jojanhokua mu ubaja goti, na jaapengaliya akakombu bamba.
Liina langu na mahina ga aseja bangu, Ibulaimu ni Isaka, gahendaliya kwaka akombu haba,
nabombi ajonzukika ngani punndema pani.” 17Josepu ejabona atati baki abei kuboku kwa malele pamutu jaka Epulaimu ngasejatogulile. Ndienu, jajukua kuboku kwa atati baki japala kuguboa panani jaka Epulaimu jugubeka panani ju umutu waka Manasi. 18Jaapwagila atati baki, “Ngahela atati, jonzo pamba ndi kibeleku su utumbuli. Mpepa koku mmbeka kuboku kwi kwa malele panani ju umutu wake.”
19Lakini ahengo batenda kukana, “Manyike, mwanangu, manyike. Bana baka Manasi bibiya bandu bingi ngani na baajoanike. Hata hela, nndongu waki nsoku jibiya nkolongu kuliku jombi, ni ibeleku yaki ibiya misi jingi.”
20Ndienu, Izilaeli jaapengaliya lisoba le heli kupwaaga, “Aizilaeli bagatumia mahina ginu kupenge, biipwaaga, ‘Sapanga juguhengila gaamboni ngati Epulaimu na Manasi.’ ” Ndienu Yakobu eambeka Epulaimu palongi jaka Manasi.
21Ndipala Izilaeli ampwagila Josepu, “Ngati egubona, nepani nhegale kuwa. Hata hela, Sapanga jibiya pamu na mwanganya, nukunkelabuu mu musi wa ahoku bino. 22Nugupeki wehapa wala nga alongu baku lieneu luku kitombi, lenaanyaga Aamoli ku mpamba nu upindi wangu.”
Currently Selected:
Utumbuli 48: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
