Utumbuli 47
47
1Ndienu, Josepu jajenda kwaka Falau, ampwagila, “Atati bangu na alongu bangu pamu makondoo na ng`ombi na mali gabu goa, ahikiki kuhuma ku Kanani. Henu abii pandu pa Gosheni.” 2Josepu jabiya jaajukwi alongu baki nhwanu, jaamanyisa kwaka Falau. 3Falau jalalukiya, “Nhenga lihengu bole?” Bunzibua, “Bambu, twepani twa atumisi baku ndi twalimi bi inyama, ngati ebabii akahoku bitu.” 4Ndipala bumpwagila Falau, “Twepani atumisi baku tuhikiki kutama ngati twaageni mu nndema wi moni ndaba inzala jibii ingali ku Kanani na ngakuba kabeti nusukulekee mipugu jitu. Henu bambu tuguloba twepani twaatumisi baku, gutujetakaliya kutama mu nndema uku Gosheni.” 5Falau ampwagila Josepu, “Atati baku na alongu baku aguhiki wehapa. 6Nndema woti uku Misili gubii pai jaku, wapekiya atati baku na alongu baku pandu paasapi munndema gongo. Waaleka atama mu lieneu luku Gosheni. Anakubii waamanyi bandu baamboni kati jabu, wahagula abiya bandu baajemale mipugu jangu.”
7Ndipala, Josepu jaaleta atati baki Yakobu kunndamuki Falau, najombi Yakobu ampekiya Falau mbenge yaki. 8Falau anndalukiya Yakobu, “Gubii na yaka ilenga?”
9Yakobu jajibua, “Mii na yaka mia jimu na selasini yuku hama. Yaka yeheyi ibii isoku na yeitweli mang`aliku, kabee ngasejihiki yaka yebatami aseja bangu punndema gongo.” 10Ndipala Yakobu ampengaliya Falau nukuboka. 11Ndienu, Josepu jaapekiya atati baki na alongu baki ni lieneu luku Lamesesi lelibii la sapi ngani mu nndema uku Misili, libiya pandu pabu beni, nabombi bililongosa ngati ejalagalakiya Falau. 12Josepu jukubika jaapeke posu atati baki na alongu baki na kilongu sa atati baki kulengana na bana babu.
Sejahenga Josepu kipindi si ling`ai li Inzala
13Mwenikatai posu jabiya jijomwiki musi woti. Inzala jabii ingali ngamaa heji jaahenga bandu boti buku Misili nuku Kanani kukombala kwa ndaba ji inzala. 14Josepu jakusanya lupija lwoti lwa Musi uku Misili nuku Kanani kulengana ni ilebi yebalombiki, japelika lupija lwe holu ku nyumba jaka bambu nkolongu kwaka Falau. 15Bandu boti bunndema uku Misili nuku Kanani ebajomula kutumii lupija lwabu lwoti luku Misili boti bunhikila Josepu nukumpwagi, “Tupekiya posu. Ndaba jakii gupala tukuwa palongi ja miu gako? Linga henu lupija lwitu lujomwiki.”
16Josepu ampwagila, “Ana lupija lwii lujomwiki, mbekiya mipugu jinu, nanepani ngiti numpekiya posu.” 17Ndipala bunndetila Josepu mipugu jabu, Falasi yabu na makondoo gabu ni imbui yabu na maponda gabu najombi jaapekiya posu. Saka se hesi Josepu jabiya jaapeke posu sukubadilisa ni mipugu jabu.
18Saka sesapwata bahika kabee nukumpwagi, “Bambu, usakaka weni lupija lwitu lwoti lujomwike ni inyama itu ibii mali gaku. Henu bambu twepani twaatumisi baku sajenu ngasetubii na sokapi setuwesa kugupeke ila yega itu na matui gitu pena. 19Kubii na mana boo twepani kuwa palongi ja miu gaku na matui gitu kuhalabika? Utulomba twepani pamu na matui gitu, tubiya twaatumwa baka Falau, ili pe tupata posu. Tupekiya posu ili twiikuwa, gutupekiya ni imbeju kwa ndaba ja matui gitu.”
20Henu Josepu anndobila Falau nndema woti uku Misili gubiya mali gaka Falau. Kila mundu juku Misili japalika kulombesa litui, kwa ndaba ji inzala ejabii ingali. Nndema woti wabiya waka Falau, 21na Josepu jaahenga bandu kuba atumwa, kuhuma upandi gumu mbaka upandi gongi uku Misili. 22Hata hela, Josepu ngasejalombiki nndema gwaka agolu. Haba ngasebalombisi nndema wabu ndaba apatika posu kuhuma kwaka Falau. 23Ndipala, Josepu jaapwagila bandu, “Nndinga nundombiki mwanganya mwaboti na matui gii kuba mali gaka Falau lelenu. Ngiti bumpekiya imbeju nanamu mwakapanda mu matui gino. 24Kipindi sukuhusa, pandu pamu pu nhwanu mwampekiya Falau. Pandu pu nnsesi papaigali pibiya imbeju ja matui ginu na ndaba jinu mwabeti na posu ja bandu bu nnyumba jinu na posu ja bana binu.”
25Bunzibua, “Bambu, uguokwi womi witu.” Kwa ndaba utulangi uamboni waku, twepani twibiya twaatumwa baka Falau. 26Ndienu Josepu jaatangasiya lilagalaki limu lelule libii mbaka lelenu mu musi uku Misili. Kila mundu jupalika kupia pandu pu nhwanu pi ilebi yaki kwaka Falau. Luombi lwa agolu ndi ngasebalomba nukuluhenga mali gaka Falau.
Kuloba kwa mwisu kwaka Izilaeli
27Henu bandu buku Izilaeli batama lieneu luku Gosheni nndema uku Misili. Ebabii hoku, bapatiki mali ngagago, babelikana nukujonzukeka ngamaa. 28Yakobu jatama ku Musi uku Misili kwa yaka komi na saba, mbaka pajahikila yaka mia jimu alubaini na saba. 29Kipindi sa kuwa kwaki Izilaeli esahegaliya, ankema mwana waki Josepu, ampwagila, “Henu ana sakaka gumbai, beka kuboku kwaku mumiungu ja amo nuku napi, gunyetakaliya ana gwi ndendila kwi isima na haki. Ngawiindaga koni ku Misili, 30ila wiing`onika pamu naka ahoku bangu. Wiinyukua kuhuma ku Misili wakandaga ku matenge gabu.” Josepu jajibua, “Ngiti nhenga ngati empwagiki.”
31Izilaeli ampwagila, “Napila,” Josepu jaalapila. Ndipala Izilaeli jajinamiya upandi ukumutu upi kitanda saki kwi isima.
Currently Selected:
Utumbuli 47: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
