Alawi 1
1
Litambiku lukutini
1Bambu Sapanga ankema Musa nukulonge naku kuhuma mu lihema laka Sapanga na Bambu Sapanga, ampwagila, 2Gwaapwagila Aizalaeli,
“Mundu anajupai kumpikii Bambu Sapanga matambiku gukutinii gi kinyama, kinyama sehesi jiihagula kuhuma mwi likundi laki la ng'ombi ni likondoo au imbui. 3Ana mundu jupia litambiku lukutini, juhagula likambaku la ng'ombi langa ni kilema kuhuma mu likundi li inyama yaki, jupelika pandu pukujingali pi litanga li lihema la sapi na Bambu Sapanga ili mundu hoju Bambu Sapanga anzetakiya. 4Mundu hoju jubeka kuboku kwaki pi kimutu si kinyama sukupikii litambiku lukutinii, ndipala Bambu Sapanga anzetakaliya mundu we hoju nukunndekake mahakau gaki. 5Ndienu, jwisinza lipongu heli pandu pukujingali pi lihema la sapi lukuketangane palongi jaka Bambu Sapanga. Nabombi akaagolu baka Sapanga bana baka Aloni, bagujukua mwai nukumisi pandu pukupiki litambiku mu upandi yoti. 6Mundu hoju jwakijukua kinyama si litambiku lukutinii hesi nukukisekulana ipandi. 7Na bana akanalomi baka nngolu waka Sapanga Aloni bipanga hanzu panani ja pandu pukupiki litambiku nukupambaki mwotu. 8Ndienu agolu baka Sapanga bana baka Aloni behaba biijukua ipandi yi inyama, kimutu na mahuta nu kuibeka panani ja hanzu pandu pukupikii litambiku. 9Mundu hoju jiihuba matumbu na magolu baka Sapanga gi kinyama hesi kwa masi. Nngolu waka Sapanga jwitinia litambiku loti panani ja pandu pukupiki litambiku. Heli ndi litambiku lukutinii pa mwotu lelinungila saamboni palongi jaka Bambu Sapanga.”
10“Ngati litambiku laki lukutinii jwipia mu likundi la makondoo au imbui, ndienu, juhagula lipongu li likondoo au lipongu li imbui langa ni kilema. 11Jwisinzila kinyama hesi upandi uku kasikazini gwa pandu pukupiki litambiku, palongi jaka Bambu Sapanga, nabombi bana baka Aloni biimisila mwai pandu pukupikii litambiku kila upandi. 12Ndienu mundu we hoju jwiisekulana kinyama sehesi ipandi ipandi, ndienu jujukua kimutu sikinyama hesi pamu na mahuta gaki, nu nngolu waka Sapanga jwakibeka pa mwotu panani ja pandu pukupikii litambiku. 13Ndienu matumbu nu magolu baka Sapanga gaki jwihuba kwa masi. Nngolu waka Sapanga jwitinia inyama joti pandu pukupiki litambiku. Inyama heji jeatini pamwotu jinungi sapi nukunndengane Bambu Sapanga.”
14Ana mundu ampikii Bambu Sapanga litambiku lukutini likijuni, ndienu jwiileta litambiku la ngunda au libana li inzeba. 15Nngolu waka Sapanga jwiileta kijuni se hesi pandu paalenganaki pukupiki litambiku, ndienu jwakinyoputula nhingu jaki nukutinii panani ja pandu paalenganaki pukupiki litambiku. Mwai wi kijuni sehesi biikengalakiya nukumisi mu lumatu lwa pandu pukupiki litambiku. 16Lipula likijuni hesi pamu nu usapu waki jwiboa nukuleke upandi golipita lyopa wa pandu paelenganaki pukupiki litambiku koaleke liliu. 17Ndienu jikamula mu mapapati nu kukipapatu, lakini jwiipapatu ipandi ibeli. Ndienu, nngolu waka Sapanga jwitinia pandu paalenganaki pukupiki litambiku panani ja hanzu. Inyama heji jeatini pamwotu jinungi sapi nukunndengane Bambu Sapanga.
Currently Selected:
Alawi 1: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
