Alawi 14
14
Kunhenga mundu jojobii nu ugonzu juwesa kujetakeka kunndumbali Sapanga
1Bambu Sapanga ampwagila Musa, 2“Jenze ndi mihilu jejandongusa kupete jojubi nu ugonzu wa ngosi ili jujetakika kwa Bambu Sapanga. Mundu hoju ampelika kuku nngolu waka Sapanga. 3Nngolu waka Sapanga ampelika kunza kutali na makambi gabu, hoku jukunndinga ana gonzu julamiki, 4nngolu waka Sapanga jwilagalakiya aleta ijuni ibeli ya sapi yeibii yomi, kipandi su nkongu gobugukema mwelezi ni litonzi la langi ngeli na kambandi ku mmea gobugukema hisopo ndaba jaka mundu hoju joanhenga kabee jujetakika kunndumbali Bambu Sapanga. 5Nngolu waka Sapanga jwilagalakiya asinza kijuni simu mwi kibega sekitweli masi ga sapi gi pandu papatimbilikana. 6Nngolu waka Sapanga jwakitola kijuni sengi sela sekibii somi, kipandi su nkongu gobugukema mwelezi ni litonzi la langi ngeli na kambandi ki hisopo nukuijingisa yoti mu mwai gobakengalaki wi kijuni seasinziki sela. 7Ndienu, ammisila mwai mundu jojulamiki ugonzu wa ngosi hogu mala saba, ndienu nngolu waka Sapanga antangasa mundu hoju kubanga jujetakiki kwaka Sapanga. Henu jwakileka kijuni sekibii somi sela kigoluka kujenda ku migonda kunza ja musi. 8Ndienu, mundu hoju jisapa ingobu yaki nukumoga majunzu gaki nukuoga masi, ndienu jijetakika kunndumbali Bambu Sapanga. Ana juhengiki hela, ndienu antangasa mundu hoju kubanga jujetakiki kunndumbali Bambu Sapanga. 9Lisoba la saba jwiimoga majunzu gaki goti ni indeu yaki yoti ni ikopale. Ndienu jwisapa ingobu yaki nukuoga masi, najwombi jijetakika kunndumbali Bambu Sapanga.”
10“Lisoba la nani jwileta makondoo mapongu mabeli ganga ni kilema, mwanalikondoo lunkolu la saka simu langa ni kilema na kilu itatu yu uwembi gogupoliki sapi na goguhangani na mahuta gi mizeituni selusi jimu ja lita ndaba ji litambiku lu uwembi pamu na mahuta masokopi. 11Nngolu waka Sapanga anhenga mundu hoju jujetakikika kunndumbali Bambu Sapanga na mundu hujo jijetakeka kunndumbali Bambu Sapanga pambipi ni lihema laka Sapanga pamu na matambiku goti gajuletiki. 12Nngolu waka Sapanga jwijukua lipongu li likondoo limu nukupiki litambiku lukulepa kihakau pamu na mahuta gi mizeituni selusi jimu, ampikia Bambu Sapanga ili najombi ambokia mahakau gaki jiitondabiya kunani kulangi ampiki Bambu Sapanga. 13Ndienu jwiisinza likondoo pandu pa sapi, pandu paasinzi inyama yi litambiku ili mahakau gabu gaboka ni litambiku lukutini. Likondoo lukuboa mahakau lilengana ni likondoo lukuboa mahakau, matambiku haga ndi mali gaka nngolu, ndaba matambiku haga abekiki kwa ndaba jaka Sapanga. 14Nngolu waka Sapanga jijukua mwai nsokopi wi litambiku lukuboa mahakau, nukumpaki mundu hoju joanhenga jujetakeka kunndumbali Bambu Sapanga panani ji likutu laki lu upandi ukumalele nu lugumba lukuboku kwaki kwa malele nu lugumba lumu kugolu kwaki kwa malele. 15Ndienu, nngolu waka Sapanga jijukuu mahuta gi mizeituni masokopi jijakanakiya pi kiganza saki sukuboku kwaki kwa mangega. 16Jwisua lukonzi lwaki lu kuboku uku malele mu mahuta haga gagabii mu kiganza saki nukummisi mundu hoju mala saba palongi jaka Bambu Sapanga. 17Mahuta masokopi gagahigali mu kiganza saki ammpakia mundu hoju panani ji likutu laki lu upandi uku malele nu lugumba lukuboku kwaki uku malele nu lugumba lumu kugolu uku malele, pandu apalapa paampakiya mwai u litambiku lukuboa mahakau. 18Mahuta gagihigala wampakia mundu hoju mu mutu. Ndienu nngolu waka Sapanga anhenga mundu hoju jujongana na Bambu Sapanga. 19Nngolu waka Sapanga jipia litambiku lukuboa mahakau nunkuhenga mundu hoju jujetakika palongi jaka Bambu Sapanga ili kunhenga mundu hoju jubiya jojujetakiki kwaka Sapanga. Ndienu ngolu jwiisinza likondoo lengi li litambiku lukutinii. 20Kabee nngolu jwiibeka litambiku lu uwembi lela panani ji kinyama sebikipiiki litambiku lukutini pa pandu paalenganaki ili kupiiki matambiku. Hela ndi nngolu waka Sapanga juhenga lihengu lukunhenga mundu jujetakiwa na Sapanga.”
21“Lakini ana mundu hoju ngasejubii na sindu, ngasejuwesa kupia hindu heyi, enu jwileta likondoo lipongu limu kuku nngolu waka Sapanga ili kulepee litambiku lukuboa makosa, julitondabia kunani kuba nginyuli yukupikia litambiku nukunhenge jujetakika palongi jaka Sapanga. Kabee jwileta kabe kilu jimu ju uwembi gogupoliki sapi gogusanginywi na mahuta gi mizeituni yeapiiki kwaka Bambu Sapanga na mahuta selusi jimu. 22Jwileta kabee ngunda ibeli au mabunda gabeli ga ngunda ngati ejuwesa jimu jibiya kwa ndaba ji litambiku lukuboa mahakau na jengi kwa ndaba jilitambiku lukutiniwa. 23Lisoba la nani anndetila Nngolu waka Sapanga hindu heyi palongi jundiangu ulihema laka Sapanga kwa ndaba jukunhenga jujetakeka kunndumbali Bambu Sapanga. 24Nngolu waka Sapanga jwijukua likondoo lipongu heli li litambiku lukuboa mahakau pamu numahuta koloboi saba nukuitondabe kunani kulangi nginyuli yukuipikii Bambu sapanga. 25Nngolu waka Sapanga jwalisinza likondoo lipongu heli nukukengale mwai, ndienu nngolu waka Sapanga jijukua mwai nsokopi nukumpaki mundu hoju jojuhengwa jujetakika kunndumbali Bambu Sapanga mu lutengu ji likutu laki lu upandi ukumalele na mu lukonzi lugumba lukuboku kwaki ukumalele nu lukonzi lugumba lukugolu kwaki kwamalele. 26Nngolu waka Sapanga jwijegala mahuta masokopi haga mu kiganza sukuboku kwaki kwamangega. 27Ndienu ammisila mundu hoju kulukonzi lwaki lwakwamalele mahuta masokopi gagabii mu kiganza saki sakwa mangega mala saba palongi jaka Bambu Sapanga. 28Mahuta gala gagabi pikiganza sukungolu waka Sapanga ampakia mundu jojuhengwa jojujetakiki kwaka Sapanga hoju panani ji likutu laki lakwamalele, nu mu lugumba lukuboku kwaki kwa malele nu lugumba lukugolu kwaki kwamalele. Jwampakiya pandu pala pajupakia mwai gwi litambiku lukuboa makosa. 29Mahuta gagihigalia mu kuboku kwaki ampakia mundu hoju mu mumutu, ili kunhenga jujongana na Bambu Sapanga. 30Ndienu Nngolu waka Sapanga jwijukua ngunda jimu kati ja ngunda ibeli au mabunda gabeli gala kulengana na mundu hoju hejuwesa kupia. 31Ngunda jimu jibiya kwa ndaba ji litambiku lukuboa mahakau na jengi kwa ndaba ji litambiku lukutii. Kabee jwipia litambiku lu uwembi, ili nngolu waka Sapanga anhengila mundu hoju jujetakika kunndumbali Bambu Sapanga. 32Ganga ndi malagalaki gagalandi mundu jojubii nu ugonzu wa ngosi lakini ngasejubii nu uwesu ukupiya litambiku lelipalika lelunhenga jujetakika kujongana na Bambu Sapanga.”
Kobi jejikamwi mu nnyumba
33Bambu Sapanga ampwagila Musa na Aloni, 34“Emwijingala mu nndema guku Kanaani gonumpeki gubia winu, nanepani ana mekiki kobi mu lumatu lwa nyumba jimu jejibii mu nndema hogu, 35mwana nyumba hoju ampwagila nngolu waka Sapanga kubanga nyumba heji jibii na kobi. 36Nngolu waka Sapanga jilagalakia hindu yoti yu nnyumba homu biipia kunza kabula mweni kutumbuli kujilingali, ili indu yoti yeibii homu ibonikana ngaseijetakeka palongi jaka Sapanga. Ndienu nngolu waka Sapanga jijingala nukujilingali nyumba heji. 37Jwilingalakiya kobi heji ana jibonikini mu lumatu nuguletiki mabaka ga langi ja mahamba mabei au nngeli nukupiti mu lumatu, 38ndienu, nngolu waka Sapanga jipita kunza junndyangu nukupunga nyumba heji kwa masoba saba. 39Lisoba la saba nngolu waka Sapanga jikelubuka kujilingalakii kabee nyumba heji. Ana kobi heji jijagani mu lumatu lwa nyumba heji, 40Nngolu waka Sapanga jilagalakia kubanga malibu gagabi pandu pajibii kobi akwanda nukuleke pandu panga kujetakeka na Sapanga kunza ja musi. 41Najombi jwiilagalaki akwanda ni lilundu leakwandi nukuleke kunza ja musi pandu panga kujetakeka na Sapanga. 42Ndipala biijukua malibu gangi manyai nukusenga pandu paabombwi pala, nabombi bajikilama ni kitopi kinyai.
43“Ana kobi heji jiipitila kabee nkati ja nyumba jela baada jukukwanda malibu nu kukilima kabee, 44nngolu waka Sapanga jwiihika kupalinga. Ana kobi heji jieni mu nyumba heji, ndienu kobi yukukoma, nyumba heji jibia ngasejijetakeka na Bambu Sapanga. 45Nyumba heji kupalika kubombo na malibu gaki, mikongu jaki nikitopi saki apelika pandu panga kujetakeka kunza ja musi. 46Enu mundu jokapi jojijingala mu nyumba homu koni apungiki ngajijetakeki kwaka Bambu Sapanga mbaka pakamii. 47Mundu jokapi jojigonila munyumba heji au kulele posu nkati jaki, kupalika jwisapa ingobu yaki.
48“Ejibiya jukilimi nngolu waka Sapanga ejijingala kujilingalaki nyumba heji kabee nukubona kubanga kobi heji ngasejienii, ndienu nngolu waka Sapanga jiitangasa kubanga nyumba heji jijetakiki palongi jaka Bambu Sapanga ndaba kobi jijomwiki. 49Ili kujihenga nyumba heji jijetakika palongi jaka Bambu Sapanga, mwana nyumba jwileta ijuni ibeli pamu limbandi lu nkongu mwelezi, ni litonzi likeli lealenganaki ku migoji ja mangoma ga makondoo ni limbandi lu mmea gobugukema hisopo. 50Jwisinza kijuni simu kati ji ijuni mu kibega sekibii na masi gasapi ga pandu papatimbilikana masi. 51Jijukua kipandi su nkongu umwelezi ni kambandi ku mmea gobugukema hisopo ni litonzi likeli pamu ni kijuni sengi sela sesakoni somi nukuijingisa yoti mu mwai wi kijuni seakisinziki. Ndienu nngolu waka Sapanga jwiimisi mwai mu nyumba heji mala saba. 52Hela ndi ejihenga nyumba jaka Sapanga jijetakika kwa mwai ukijuni na masi gasapi ni kijuni somi, ni limbandi lunkongu umwelezi ni kambandi ku mmea gobukema hisopu ni litonzi likeli. 53Ndienu kijuni somi sela, jakilekakiya kigoluka kijenda ku migonda kunza ja musi. Hela ndi ewajihenga nyumba heji jijetakika na Bambu Sapanga, najombi jibiya jijetakika kunndumbali Bambu Sapanga.”
54Ganga ndi malagalaki gagalongale ugonzu wa ngosi gogujambuki, 55kobi jejibii mwi ingobu au kobi jejikuba nnyumba, 56nukuhimba ni liputi au kinyuli, 57ili kulangi sindu bo kijetakiki na Bambu Sapanga na sindo boo sangakujetakeka palongi jaka Bambu Sapanga. Ganga ndi malagalaki gagakaniki kobi nu ugonzu wa ngosi gogujambuki.
Currently Selected:
Alawi 14: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.