Alawi 15
15
Hindu yeyumpita mundu nukunhenga jijetakeka kwaka Sapanga
1Bambu Sapanga ampwagila Musa na Aloni, 2“Waapwagila Aizalaeli ana, mwanalomi jokapi anagumpitiki uwila, uwila hogu wahenga jijetakeka kunndumbali Bambu Sapanga. 3Ganga ndi malagalaki kupete mundu ana jujukwi mmbomba nu uwila guendalee kupita au uwila pagukupa gukotwiki kupita, mundu we hoju ngasejujetakeka kunndumbali Bambu Sapanga. 4Kitanda sokapi sejigonalia au sindu sokapi sejwitamila mundu jojupita uwila jola, ngasijetakeki palongi jaka Bambu Sapanga. 5Mundu jokapi jojakigusa kitanda saki mundu hoju ndi kupalika jusapa ingobu yaki nu kuoga, najombi ngajijetakeki kunndumbali Bambu Sapanga mbaka pamii. 6Mundu jokapi jojitamila sindu sokapi sejutami mundu hoju jogumpita uwila ndi kupalika jusapa ingobu yaki nu kuoga, najombi ngajijetakeki kunndumbali Sapanga mbaka pakamii. 7Mundu jokapi joangusa mundu mwanalomi jogumpita uwila ndi kupalika jusapa ingobu yaki nu kuoga, najombi ngajijetakeki kunndumbali Sapanga mbaka pakamii. 8Mundu jokapi jogumpita uwila ana anhuni imata mundu jokapi ndi kupalika mundu hoju jusapa ingobu yaki nu kuoga najombi ngajijetakeki kunndumbali Bambu Sapanga mbaka pakamii. 9Ntoo gwokapi au sindu sokapi sukutami pajuhendesa kinyama mundu jogupitiki uwila ngajijetakeki kwaka Bambu Sapanga. 10Mundu jokapi jojigusa sindu sokapi sejutamii mwanalomi jogumpita uwila hoju, ngasejijetakeka kunndumbali Bambu Sapanga mbaka pakamii. Mundu jokapi jojutoto sindu saka mundu hoju ndi kupalika jusapa ingobu yaki nu kuoga, najombi ngasejujetakeka kunndumbali Bambu Sapanga mbaka pakamii. 11Mwanalomi jokapi jogumpita uwila anaangusiki mundu jongi sanga kusamba maboku gaki nu kuoga, joangusiki ngajijetakeki kunndumbali Bambu Sapanga mbaka pakamii. 12Sombu sokapi si kitopi sejikigusiki mwanalomi jogumpita uwila kupalika kukikaju. Lakini ana sombu hesi ndi siimbau kupalika kugolola kwa masi.
13“Mwanalomi jokapi jogumpita uwila ana julamiki ugonzu waki, ndi kupalika mundu hoju julendalia masoba saba kabula jukujetakeka kunndumbali Bambu Sapanga. Pagihika masoba haga jwiisapa ingobu yaki nu kuoga masi gi kiliba, najombi jwiijetakeka kunndumbali Bambu Sapanga. 14Lisoba la nani, ndi kwiipalika juleta ngunda ibeli au mabunda ga ngunda gabeli palongi jaka Bambu Sapanga mu litanga lukuketangane nukumpeke nngolu waka Sapanga. 15Nngolu waka Sapanga jwiipia heyi, jimu kwa ndaba ji litambiku lukuboa mahakau na jengi kwa ndaba ji litambiku lukutini, najombi nngolu waka Sapanga anhenga mundu hoju jujongana na Bambu Sapanga nukujetakeka kunndumbali Bambu Sapanga nukummboke ugonzu waki.
16“Ana mwanalomi jokapi anayumpitiki imbeju ya mwanalomi hoju, ndi kupalika juoga masi yega joti, najombi jikuba ngajwijetakeki kunndumbali Bambu Sapanga mbaka pakamii. 17Ingobu jokapi jejiholuki imbeju yaka mwanalomi au ngosi jokapi jejigusiki imbeju heyi ndi kwipalika kugolo masi, na ngajwkujetakeka kunndumbali Bambu Sapanga mbaka pakamii. 18Ana mwanalomi jugoni nu mbomba nukumpita imbeju, enu ndi kwipalika boti abeli aoga masi na bombi ngabijetakeki kunndumbali Bambu Sapanga mbaka pakamii.
19“Mmbomba jokapi ejukuba mu masoba gaki, ngajijetakeki kunndumbali Bambu Sapanga kwa masoba saba. Mundu jokapi joangusa mmbomba hoju ngajijetakeki kunndumbali Bambu Sapanga mbaka pakamii. 20Sindu sokapi sejugonale au sejutamii mmbomba hoju mumasoba haga sibiya ngasejetakeka palongi jaka Bambu Sapanga. 21Mundu jokapi jojwakigusa kitanda suku mmbomba hoju ndi kwipalika jwisapa ingobu yaki nu kuoga masi, ngajijetakeki kunndumbali Bambu Sapanga mbaka pakamii. 22Mundu jokapi jojigusa sindu sokapi sejutami mmbomba hoju ndi kwipalika jusapa ingobu yaki nu kuoga masi, najombi ngajijetakeki kunndumbali Bambu Sapanga mbaka pakamii. 23Mwanalomi jokapi jojigusa sindu sokapi sejugonali au kutamii mmbomba hoju, ngajijetakeki kunndumbali Bambu Sapanga mbaka pakamii. 24Ana mwanalomi jugoni nu mbomba hoju na mwai guku mmbomba hoju gunholuki mwanalomi hoju, ndienu mwanalomi hoju ngajijetakeki kunndumbali Bambu Sapanga kwa masoba saba. Kitanda sokapi sejigonalia mwanalomi hoju, ngakiijetakiki palongi jaka Bambu Sapanga.
25“Ana mmbomba gumpita mwai masoba gingi kupeta ekupalika au gumpita kabula ja masoba gaki gukupita mwai, henu ndi jiendalia kusindwa kujetakeka palongi jaka Bambu Sapanga masoba ga mwai pagwampita. 26Kitanda sokapi sejugonale au kiteu sokapi sejutamii, ngasijetakeki palongi jaka Bambu Sapanga mu masoba goti gagumpita mwai. 27Mundu jokapi jojigusa hindu heyi, ngajijetakeki kunndumbali Bambu Sapanga ndi kwipalika kusapa ingobu yaki nu kuoga najombi ngajijetakeki kunndumbali Bambu Sapanga mbaka pakamii. 28Pawiijomuka kupita mwai waki mmbomba hoju jwilendalia mbaka masoba saba ili jubiya sapi na masoba haga jijetakika kunndumbali Bambu Sapanga. 29Lisoba la nani jijukua ngunda ibeli au mabunda gabeli gi inzeba nu kunndete nngolu waka Sapanga pu litanga ulihema laka Sapanga. 30Nngolu waka Sapanga jiipia jimu kuba litambiku lukuboa mahakau na jengi kwa ndaba ji litambiku lukutini. Ndienu nngolu waka Sapanga anhenga mmbomba we hoju jujongana nukunhenga jujetakika kunndumbali Bambu Sapanga.
31“Hela ndi emwakanakiya Aizilaeli atama kutali na hindu yeyahenga biijetakeka kunndumbali Bambu Sapanga, ili bajitondo nyumba jangu jejibi mu nkati jabu anaajingi homu nu kusindwa kujetakeka palongi jangu, ana atei hela bitenda kuwa.”
32Ganga ndi malagalaki gagalandi mwanalomi jogupita uwila na jojipita imbeju jaki nukusindwa kujetakeka kunndumbali Bambu Sapanga. 33Malagalaki ganga galongale kabee mmbomba jogumpita mwai nukusindwa kujetakeka kunndumbali Bambu Sapanga. Malagalaki gangi galongale mwanalomi au mmbomba jokapi jogumpita mwai kabee mwanalomi jojugone nu mmbomba hoju ngajijetakeki palongi jaka Bambu Sapanga.
Currently Selected:
Alawi 15: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.