Alawi 3
3
Matambiku gu lukwali
1“Mundu ana jupia litambiku lu lukwali kwaka Bambu Sapanga, ndienu ampikiya litambiku li likambaku la ng'ombi au lunkolu ndi kinyama se hesi sibiya sa sapi sanga ni kilema sokapi. 2Mundu hoju jubeka kuboku kwaki panani ji kimutu ji kinyama se hesi nukusinza pundu pukujingali mu lihema la Sapi. Ndienu bana baka Aloni biimisila mwai upandi woti wa pandu pukupiki litambiku pa madini ga shaba. 3Kuhumi mu litambiku lu lukwali heli, mahuta goti gagayekale matumbu na gagabi nnani ja matumbu giki nyama si litambiku le heli lu lukwali jwitinia ngati litambiku lebilipia kwaka Bambu Sapanga pa mwotu. 4Kabee jiiboa figu ibeli na mahuta gaki pamu na pandu pa sapi pi imani. 5Bana baka Aloni bitinia pandu pukupiki matambiku pamu ni litambiku lelibi panani ja hanzu, heli ndi litambiku lukutini pa mwotu lelibi nu unungali gwaamboni gukupalika kwaka Bambu Sapanga.”
6“Ana mundu anujupihiki litambiku lukutama su lukwali na Bambu Sapanga, ampikia kuhuma mu likundi laki la makondoo au makundi gi imbui, ndienu jwiihagula lipongu au lunkolu langa ni kilema. 7Ana mundu jwiipia kakondoo kuba litambiku laki, jakabeka kakondoo haka palongi jaka Bambu Sapanga, 8jwiibeka kuboku kwaki panani ji kimutu si kinyama se hesi nu kunsinza palongi jilihema la sapi. Bana baka Aloni biimisa mwai pa mesa juku piki litambiku mu manyelu gaki goti. 9Ndienu kuhuma mwilitambiku le heli lulukwali leapiki Bambu Sapanga sukutinii pa mwotu, mwampikia hindu yenze, mahuta gaki, nkela gwoti gogubi na mahuta goasekwi pambipi ni kibenda na mahuta goti gagayekale matumbu na gagalombini mu matumbu, ampikia Bambu Sapanga, 10na figu ibeli yela na mahuta gaki pamu na pandu pa sapi pi imani. 11Nngolu waka Sapanga jwaitinia hei yoti panani ja pandu paalenganaki ili kupiki litambiku ngati posu jeampiki Bambu Sapanga sukutinii.
12“Ana mundu jupia litambiku laki li imbui, ampikia palongi jaka Bambu Sapanga, 13jwiibeka kuboku kwaki panani ji kimutu si kinyama se hesi nukunsinza palongi jilihema la sapi. Bana baka Aloni biimisila mwai pandi yoti ya pandu pukupiki litambiku. 14Kuhuma mu litambiku lukutinii haga gabumpiki Bambu Sapanga jupia mahuta goti gagayekale mu matumbu gi kinyama hesi, 15na figu ibeli na mahuta gaki pamu na pandu pa sapi pi imani, ampiikia Bambu Sapanga litambiku lukutinii pa mwotu. 16Nngolu waka Sapanga jwaitinia panani ja pandu palenganaki pukupiki litambiku ngati posu jeampiki Bambu Sapanga sukutinii pa mwotu nukupia unungali wamboni gogundengane Bambu Sapanga. Mahuta goti gabiya gaka Bambu Sapanga. 17Gongo ndi unhilu gwa masoba goti gomwiipwata pokapi pa mwitama ndi kwiipalika kupwata lilaganu ale. Mwiikula mahuta wala mwai hata kulenga.”
Currently Selected:
Alawi 3: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.