Alawi 4
4
Matambiku ndaba jukuboa mahakau
1Bambu Sapanga ampwagila Musa, 2“Gwapwagila Aizilaeli ana, ana mundu juhengiki mahakau sanga nauli, juhengiki sindu seakaniki mu unhilu waka Bambu Sapanga, hoju jwiihenga namuna jenze, 3Ana kubi nngolu waka Sapanga joanzakani mauta juhengiki mahakau hata kwahenga bandu abonikana abii ni kihakau, henu hoju jwampikia Bambu Sapanga litoli lisoku langa ni kilema libia litambiku lukuboa mahakau. 4Jwalileta lipongu le heli pi litanga li lihema la sapi, palongi jaka Bambu Sapanga, na jwombi jwibeka kuboku kwaki panani ji kimutu si lipongu le heli nu kulisinza palongi jaka Bambu Sapanga. 5Nngolu waka Sapanga hoju jijukua mwai nsikipi nu kujingi naku mu lihema la sapi. 6Jwitobika lukonzi lwaki mu mwai gwehogu nukumisa mala saba palongi jaka Bambu Sapanga upandi gu kulongo wi lipazia lelibaganisa pandu pa sapi na pandu pa sapi ngani mu lihema la sapi. 7Ndienu nngolu waka Sapanga jiijukua pandu pa mwai nsikipi nukupakii mu manyelu pa pandu pukupiki litambiku nukupogale ubani gogunungali gwaamboni, palongi jaka Bambu Sapanga mu lihema la sapi. Mwai gogwihigala jijitala pai ja pandu pukupiki litambiku lukutinii matambiku papabi pambipi ni litanga li lihema la sapi. 8Ndienu jiboa mahuta goti ga ng'ombi jeheji na mahuta goa gagayekale matumbu, 9figu ibeli na mahuta gagabi panani jaki na gagabi mwikibunu, na gagakamulini mu figu ni imani, hapa ndi pandu apalapala yeaboa mu kinya silitambiku lu lukwali. 10Nngolu waka Sapanga hoju jwiijukua inyama yoti nukutinii panani ja pandu pukupiki litambiku. Juhenga ngati ejahenga kwi kinyama silitambiku lulukwali sela ili jubiya nu lukwali na Sapanga. 11Lakini ngosi ja ng'ombi je heji ni inyama ni kimutu na magolu baka Sapanga na matumbu ni imai gaki, 12ndi hindu heyi yoa jitotula kujenda kuleke kutali kunza ni likambi labu, pandu pajapajetaki Bambu Sapanga paajiti iliu, najwombi jwaitinia pa mwotu panani ja nhanzu.”
13“Ana bandu boti buku Izilaeli atei mahakau sanga nauli sukuhenga sindu seakanaki mu uhilu uka Bambu Sapanga, 14pagimanyikana gahengiki ndi mahakau, bandu boti bampikia litambiku litoli likambaku kuba litambiku lukuboa mahakau. Balileta litoli heli ku lihema la sapi. 15Akakilongosi ba bandu buku Izilaeli biibeka maboku gabu panani jikimutu si litoli leheli, ndienu jwiisinza palongi jaka Bambu Sapanga. 16Ndienu nngolu waka Sapanga jola joasagwi jileta pandu pa mwai wi litoli likambaku leheli nkati ji lihema la sapi. 17Jwitobika lukonzi lwaki nkati ja mwai we hogu nukumisi palongi ji lipazia lelibaganisa na pandu pa sapi na pandu pa sapi ngani mala saba, palongi jaka Bambu Sapanga. 18Ndienu pandu pa mwai jwipakia pilinyelu la pandu pukupiki litambiku lelibi nkati ji lihema la sapi palongi jaka Bambu Sapanga. Mwai gogwihigala jwijitala pai pandu paalenganaki ili kupiiki litambiku lukutii lelibi pambipi ni litanga li lihema la sapi. 19Jwiijukua mahuta goti gi kinyama se hesi nukutini pandu paalenganaki ili kupiki matambiku. 20Enu jwalihengila likambaku heli ngati ejulihengila likambaku lengi lela kwa ndaba ji litambiku la makahau. Sukuhenga hela nngolu waka Sapanga jwahenga bandu ajongana na Sapanga na jwombi Bambu Sapanga jaalekakia bandu mahakau gabu. 21Ndienu jwiijukua inyama jejahigali ji likambaku lela nu kujipeleka kunza ji lihema la sapi nukutinii pa mwotu ngati hejahenga kwi kinyama si likambaku lengi lela. Heli ndi litambiku lukuboa mahakau ga bandu boti buku Izilaeli.
22“Ana kilongosi juhengiki mahakau sanga nauli su kuhenga sindu seakanaki mu unhilu waka Bambu Sapanga, Sapanga waki, henu jibia na makosa, 23henu ebammanyisa mahakau gajuhengiki ge haga, jwiileta lipongu liimbui langa ni kilema. 24Kilongosi hoju jwibeka kuboku kwaki panani ji kimutu si lipongu nukulisinza pandu paasinzi litambiku lukutinii palongi jaka Bambu Sapanga. Heli ndi litambiku lukuboa mahakau. 25Ndienu nngolu waka Sapanga hoju jwitobika lukonzi lwaki nkati ja mwai guli litambiku lukuboa mahakau nukupaki mu manyelu ga pandu pukupiki matambiku gukutinii litambiku. Mwai gogwihigala jijitala pai pandu paalenganaki ili kutinakii matambiku. 26Ndienu nngolu waka Sapanga jwiijukua mahuta goti gi lipongu leheli pandu pukupiki matambiku, ngati ejuhengaa na mahuta gi kinyama si litambiku lu lukwali. Sukuhenga hela nngolu waka Sapanga jibiya anzonganisi na Bambu Sapanga ni kilongosi najombi jwiibia julekakiwi na mahakau.”
27“Ana mundu mu likundi juhengiki mahakau sanga nauli nukuhenga sindu sekikanakiki mu nhilu gokapi waka Bambu Sapanga, nukubonikana kuba na makosa, 28apalapa ebammanyisa kuba juhengiki mahakau, jwileta litambiku li imbui ju nkolu janga ni kilema sokapi kwa ndaba jukuboa mahakau gajuhengiki. 29Mundu hoju jwibeka kuboku kwaki panani ji kimutu si imbui jeheji ji litambiku lukuboa mahakau, nukusinza pandu paasinzi kinyama si litambiku lukutini. 30Nngolu waka Sapanga jwitobika lukonzi nkati ja mwai gwi litambiku lukuboa mahakau nukupaki manyelu ga pandu pukupiki matambiku gukutiniki litambiku. Mwai gogwihigaliya gwijitala pai kuyongalota pandu aalenganaki pukupiiki litambiku. 31Jwagaboa mahuta goti gi imbui jeheji ngati eaboa mahuta gi kinyama gi litambiku lu lukwali, najombi nngolu waka Sapanga jwagatinia pandu pukupiki litambiku, Inyama heji jeatini pamwotu jinungi sapi nukunndengane Bambu Sapanga.” Henu, nngolu waka Sapanga jwanzonganisaa mundu we hoju Sapanga, najombi jwiitenda kulekakewa.
32“Ana mundu we hoju jwileta mwanalikondoo ndaba ji litambiku lukuboa mahakau, henu, jwileta mwanalikondo lununkolu langa ni kilema. 33Mundu hoju jwibeka kuboku kwaki panani ji kimutu sa mwanalikondoo le lela li litambiku lukuboa mahakau, nukusinza pandu paasinzi kinyama si litambiku lukutinii. 34Ndienu nngolu waka Sapanga jwitobika lukonzi lwaki nkati ja mwai gwi litambiku lukuboa mahakau nu kupaki mu manyelu ga pandu pukupiki litambiku lukutiniki litambiku. Mwai gogwihigalia gwijitala pai kuyongalota pandu pukupiki litambiku. 35Ndienu jwagaboa mahuta goti ngati eaboa mahuta ga kakondoo ki litambiku lu lukwali, nu nngolu waka Sapanga jwagatinia panani ja pandu pukupiki matambiku, pamu na matambiku gaapia kwaka Bambu Sapanga pa mwotu. Najombi nngolu waka Sapanga anzonganisa na Sapanga ndaba ja mahakau gaki, najombi jwitenda kulekekewa.”
Currently Selected:
Alawi 4: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.