Nau Ntơm 13
13
Y-Abram jêh ri Y-Lot tâm nkhah
1Tă bơh Êjipt, Y-Abram leo ur păng jêh ri lĕ drăp ndơ păng geh ndrel ma Y-Lot hăn hao n'gor Nêgep. 2Y-Abram ndrŏng ngăn geh âk mpô mpa rong, prăk jêh ri mah. 3Tă bơh Nêgep, păng hăn nsong plơ̆ sĭt ta Bêthel, tât ntŭk păng hŏ ndâk ngih bok lor, vah vang Bêthel jêh ri ƀon Ai, 4jêng ntŭk păng ntơm ndâk nơng ƀư brah. Ta aơ, Y-Abram kuăl mbơh sơm ma amoh Brah Yêhôva.
5Y-Lot, bunuyh hăn ndrel Y-Abram, geh âk đŏng biăp, ndrôk, jêh ri ngih bok. 6Tâm n'gor nây mâu tŏng ntŭk ma bar hê gŭ nsum, yorlah drăp ndơ khân păng âk ngăn, kŏ tât mâu dơi rêh ndrel. 7Lơ hô đŏng, phung chiăp biăp Y-Abram jêh ri Y-Lot tâm djrel ndrăng nơm. Rnôk nây phung Kanaan jêh ri phung Pêrisit hôm gŭ tâm n'gor nây.
8Pôri, Y-Abram lah ma Y-Lot: “He jêng noi deh du mham, gâp jêh ri đah may, phung chiăp biăp gâp jêh ri phung chiăp biăp may, lơi hôm tâm djrel ndrăng nơm ôh. 9Mâu di hĕ lĕ rngôch n'gor dôl gŭ tanăp măt may? Ăn may tâm nkhah hom bơh gâp. Tơlah may săch mpeh chiau, gâp mra gŭ mpeh pa ma; tơlah may săch mpeh pa ma, gâp mra gŭ mpeh pa chiau.” 10Y-Lot n'gơr măt uănh jêh ri saơ lam neh lâng dak krong Yurdan tât ta ƀon Sôar. Êlor ma Brah Yêhôva ƀư rai ƀon Sôdôm jêh ri Gômôrơ, n'gor aơ ăp ntŭk geh dak da dê tâm ban ma n'gar trao Brah Yêhôva,#13:10 n'gar trao Brah Yêhôvaŭch lah n'gar Êđen. nâm bu neh Êjipt đŏng.#Ntơm 2:10. 11Y-Lot săch ma păng nơm lĕ neh lâng dak krong Yurdan jêh ri mpeh luh nar. Pôri, bar hê va mon khân păng tâm nkhah băl. 12Y-Abram gŭ rêh tâm n'gor Kanaan, bi ma Y-Lot gŭ tâm lĕ ƀon ta neh lâng jêh ri trơn ngih bok păng tât ta Sôdôm. 13Phung bunuyh Sôdôm djơh mhĭk ngăn jêh ri ƀư tih toyh đah Brah Yêhôva.
Nau Brah Ndu ton ma Y-Abram
14Jêh Y-Lot tâm nkhah bơh Y-Abram, Brah Yêhôva lah ma Y-Abram: “Bơh ntŭk may dôl dâk, n'gơr hom măt uănh lam puăn njônh, mpeh luh nar, mpeh nhâp nar, mpeh bơh dâng jêh ri mpeh bơh lơ. 15Lĕ rngôch n'gor neh may saơ, Gâp mra ăn ma may jêh ri ma noi deh may tât n'ho ro.#Kan 7:5. 16Gâp mra ƀư ma noi deh may jêng âk tâm ban ndruyh klơ neh; tơlah mbu nơm dơi kơp ndruyh klơ neh ri mơ dơi kơp đŏng noi deh may. 17Kay lŏng, ăn may hăn lam ndah jong, ndah huy n'gor aơ, yorlah Gâp mra ăn n'gor aơ ma may.”
18Y-Abram trơn ngih bok păng hăn gŭ dăch ndru tơm guyh ta Mamrê, êp Hêbron, jêh ri ndâk ta nây du mlâm nơng ƀư brah ma Brah Yêhôva.
Currently Selected:
Nau Ntơm 13: CMO2023
Highlight
Share
Copy
Want to have your highlights saved across all your devices? Sign up or sign in
© 2023 United Bible Societies. All rights reserved.
