Nau Ntơm 23
23
H'Sara khĭt jêh ri bu tâp ta mir Makpêla
1H'Sara dơi rêh du rhiăng bar jât mpơh năm. 2H'Sara khĭt ta ƀon Kiriat-Arba, jêng ƀon Hêbron, tâm n'gor Kanaan. Y-Abraham hăn nkra nau tâp khĭt ma H'Sara jêh ri nhĭm nhhiăng ma păng. 3Jêh nây, Y-Abraham dâk luh du bơh ntŭk bunuyh khĭt jêh ri hăn văch ngơi ma phung kon sau ndŭl mpôl Y-Het.#23:3 Aơ jêng phung Hitit. 4“Gâp knŏng jêng du huê bunuyh bu năch rêh ta nklang phung khân may; dăn khân may ăn ma gâp du ntŭk ƀư môch tâm n'gor bri khân may, gay ma gâp dơi tâp drô ur gâp.”#Hêb 11:9,13; Kan 7:16. 5Kon sau ndŭl mpôl Y-Het plơ̆ lah: 6“Hơi kôranh, dăn iăt hên. May jêng kôranh toyh bơh Brah Ndu gŭ ta klang phung hên. Ăn may tâp hom bunuyh may hŏ khĭt tâm môch dŭt ueh bơh phung hên. Mâu geh du huê bunuyh tâm phung hên nhhuach môch păng mâu ăn ôh may tâp bunuyh may hŏ khĭt.” 7Y-Abraham dâk, chon mon tanăp măt phung ƀon tơm, jêng kon sau ndŭl mpôl Y-Het, 8jêh ri lah: “Tơlah phung khân may di nuih ăn gâp tâp bunuyh drô gâp, dăn iăt gâp jêh ri sâm dăn an ma Y-Ephrôn, kon bu klâu Y-Sôhar, 9gay păng ăn ma gâp trôm lŭ Makpêla ta dŭt mir păng. Dăn păng tăch ma gâp ma prăk nŭm gay gâp dơi geh ntŭk ƀư môch ta nklang phung khân may.”
10Y-Ephrôn, bunuyh Hitit, gŭ ta nklang kon sau ndŭl mpôl Y-Het, ơh nau Y-Abraham tanăp măt phung kon sau ndŭl mpôl Y-Het; jêng tanăp lĕ rngôch phung lăp ta mpông ƀon pô aơ: 11“Mâu ôh, ơ kôranh, iăt hom nau gâp. Tanăp măt phung ƀon lan gâp, gâp ăn may mir nây, jêh ri ăn đŏng nđâp trôm lŭ geh ta nây. Dăn may tâp hom bunuyh may hŏ khĭt.” 12Y-Abraham chon mon tanăp măt phung ƀon tơm, 13jêh ri lah ma Y-Ephrôn, tanăp măt phung ƀon lan pô aơ: “Iăt hom nau gâp. Dăn ăn gâp dơi ăn rnoh prăk gay rvăt mir aơ. Dăn may dơn an ri mơ gâp dơi tâp bunuyh gâp hŏ khĭt ta ntŭk nây.” 14Y-Ephrôn ơh nau Y-Abraham: 15“Hơi kôranh, dăn iăt gâp. Lôk neh nây di rnoh khlay puăn kilô n'gul#23:15 Nrn: puăn rhiăng sêkel. prăk, ƀiălah ndrăng he ntŭk gâp đah may mâu ir ôh! Ăn may tâp hom bunuyh khĭt may.” 16Y-Abraham sŏk dơn nau Y-Êp-rôn lah; jêh ri tanăp măt phung kon sau ndŭl deh Y-Het, Y-Abraham njing ăn ma Y-Ephrôn di rnoh prăk păng hŏ mbơh jêh jêng puăn rhiăng sêkel, tĭng nâm prăk bu dŏng tâm nau tăch tơr.
17Pônây, mir Y-Ephrôn ta Makpêla, mpeh luh nar ta Mamrê, glom mir geh trôm lŭ jêh ri lĕ rngôch tơm si geh tâm mir, 18jao ngăn ro jêng drăp ndơn ma Y-Abraham tanăp măt phung kon sau ndŭl deh Y-Het, jêng lĕ rngôch phung geh măt ta mpông ƀon păng. 19Jêh nau nây, Y-Abraham tâp H'Sara ur păng tâm trôm lŭ tâm mir Makpêla, mpeh ma luh nar ta Mamrê, jêng ta ƀon Hêbron, tâm n'gor Kanaan. 20Pônây, mir jêh ri tâm nây geh trôm lŭ lĕ phung kon sau ndŭl deh Y-Het hŏ jao ngăn ro ma Y-Abraham jêng ntŭk ƀư môch.
Currently Selected:
Nau Ntơm 23: CMO2023
Highlight
Share
Copy
Want to have your highlights saved across all your devices? Sign up or sign in
© 2023 United Bible Societies. All rights reserved.
