Nau Ntơm 40
40
Y-Yôsep rblang nau mbơi ma bar hê kôranh tâm ngih Pharaôn
1Jŏ djê̆ ma nây, kôranh djôt kachok jêh ri kôranh ƀư piăng let ma hađăch Êjipt, khân păng ƀư tih tâm rdâng đah hađăch. 2Pharaôn ji nuih ngăn ma bar hê kôranh nây jêng kôranh djôt kachok jêh ri kôranh ƀư piăng let, 3jêh ri krŭng khân păng, tâm ngih kôranh mât gai tahan gak, jêng ntŭk krŭng Y-Yôsep. 4Kôranh mât gai tahan gak jao ma Y-Yôsep pah kan ma bar hê kôranh nây. Khân păng gŭ jŏ djê̆ tâm ndrung.
5Tâm du măng, dôl hôm gŭ krŭng tâm ndrung, lĕ kôranh djôt kachok jêh ri kôranh ƀư piăng let ma hađăch Êjipt geh nau mbơi da dê, ƀiălah lĕ nau mbơi khân păng geh nau rblang êng êng. 6Ang ôi taơ, Y-Yôsep tât pah kan ma khân păng jêh ri saơ khân păng geh nau rngot. 7Păng ôp: “Mâm ƀư muh măt khân may rngot nar aơ?” 8Phung nây lah: “Hên geh jêh nau mbơi ƀiălah mâu geh ôh bunuyh dơi rblang nau nây.” Y-Yôsep lah: “Mâu di hĕ Brah Ndu dơi rblang nau mbơi? Gâp dăn ma khân may nkoch tay nau mbơi nây ma gâp.”
9Kôranh djôt kachok nkoch tay nau mbơi păng ma Y-Yôsep; păng lah: “Tâm nau mbơi, gâp saơ geh du tơm krăk ƀâu tanăp măt gâp. 10Tơm krăk ƀâu nây geh pe n'gĭng. Lah n'gĭng ntơm chăt nse, kao dang, jêh ri dơi jêng âk rkŭm play krăk ƀâu dŭm. 11Tâm ti gâp hôm djôt kachok Pharaôn. Gâp pĕ play krăk ƀâu, păt dak, nkhŭt tâm kachok jêh nây nhhơr ta ti Pharaôn.” 12Y-Yôsep lah: “Aơ jêng nau rblang ma nau mbơi nây: Pe n'gĭng krăk ƀâu jêng pe nar. 13Hôm pe nar Pharaôn mra yô̆ an may jêh ri ăn tay nau pah kan ma may; may mra nhhơr ndrănh ta ti Pharaôn nâm bu may ƀư lor dôl may hôm jêng kôranh djôt kachok. 14Ƀiălah nôk lĕ kan may hŏ geh nau ueh jêh, dăn ma may kah gĭt ma gâp, sâm ngơi an ma gâp đah Pharaôn, jêh ri djôt leo gâp luh bơh ntŭk aơ. 15Yorlah di ngăn, bu nhŭp ntŭng jêh ri leo gâp luh bơh n'gor phung Hêbrơ, jêh ri ta aơ gâp mâu ƀư tih du ntil ndơ ôh nkhơng ma bu krŭng gâp tâm ndrung ngo aơ.”
16Kôranh ƀư piăng let saơ nau rblang Y-Yôsep jêng ueh, păng lah: “Gâp geh đŏng nau mbơi: gâp saơ ta klơ bôk gâp nơm ndô pe mlâm bĭ piăng let. 17Tâm bĭ piăng let prêh lơn geh ăp lĕ ndơ piăng let tă bơh ti nơm êng ăn ma Pharaôn, ƀiălah sĭm trŭnh sa lĕ piăng let tâm bĭ ta klơ bôk gâp.” 18Y-Yôsep lah: “Aơ jêng nau rblang ma nau mbơi nây: pe mlâm bĭ jêng pe nar. 19Hôm pe nar, Pharaôn mra koh trô ko may jêh ri yông may ta tơm si. Sĭm och mra sa puăch may.”
20Tât nar tal pe, jêng kah gĭt nar deh Pharaôn, hađăch ƀư nau sông sa ma lĕ rngôch phung oh mon păng, jêh ri ăn ma kôranh djôt kachok jêh ri kôranh ƀư piăng let luh bơh ndrung. 21Hađăch ăn tay nau pah kan ma kôranh djôt kachok jêh ri păng dơi nhhơr kachok ta ti Pharaôn. 22Ƀiălah hađăch đă yông trô ko kôranh ƀư piăng let, nâm nau Y-Yôsep hŏ rblang jêh.
23Kôranh djôt kachok ndrănh mâu hôm kah gĭt ôh ma Y-Yôsep, păng lĕ chuêl hêng Y-Yôsep.
Currently Selected:
Nau Ntơm 40: CMO2023
Highlight
Share
Copy
Want to have your highlights saved across all your devices? Sign up or sign in
© 2023 United Bible Societies. All rights reserved.
