Nau Ntơm 42
42
Phung nâu Y-Yôsep hăn trŭnh ta n'gor Êjipt
1Y-Yakôb gĭt geh tăch ba ƀlê ta Êjipt, păng lah ma phung kon bu klâu păng: “Mâm ƀư khân may gŭ uănh ndrăng khân may nơm kơt nây? 2Aơ, gâp tăng jêh tâm Êjipt geh ba. Jŭr hăn hom ta nây rvăt ba ma he, gay ma he dơi rêh jêh ri mâu khĭt ôh.”#Kan 7:12. 3Jât nuyh nâu Y-Yôsep hăn tât n'gor Êjipt gay rvăt ba. 4Ƀiălah Y-Yakôb mâu ăn ôh Y-Benjamin, oh Y-Yôsep hăn ndrel phung nâu khân păng, yorlah păng klach nau mhĭk mra tât ma păng. 5Pôri, tâm lĕ phung hăn ta Êjipt ŭch rvăt ba, tâm nây geh phung kon bu klâu Y-Israel, yorlah n'gor Kanaan geh nau sa sât ji ngot tâm ban đŏng.
6Aƀaơ Y-Yôsep jêng kôranh chiă uănh Êjipt; păng jêng nơm tăch ba ma lĕ rngôch bunuyh ƀon lan tâm n'gor. Phung nâu Y-Yôsep hăn tât chon mon tanăp măt păng. 7Y-Yôsep saơ phung nâu păng jêh ri gĭt năl khân păng, ƀiălah păng ƀư tâm ban ma bu năch đah phung nâu păng, jêh ri ngơi dăng đah phung nâu păng: “Mbah tă khân may?” Khân păng ơh: “Tă bơh n'gor Kanaan ŭch rvăt ndơ sông sa.” 8Y-Yôsep gĭt năl phung nâu păng, ƀiălah phung nâu păng, mâu ôh gĭt năl păng. 9Y-Yôsep kah gĭt tay lĕ nau mbơi păng saơ ma phung nâu păng, jêh ri lah: “Khân may jêng phung n'hut văch ta aơ gay gĭt lĕ ntŭk huơi tâm n'gor aơ.”#Ntơm 37:5-10. 10Phung nâu păng lah: “Mâu, kôranh hên ah! Phung oh mon may văch ta aơ knŏng rvăt ndơ sông sa. 11Hên jêng phung kon du mbơ̆, jêng phung bunuyh sŏng, mâu jêng ôh phung n'hut.” 12Păng lah: “Mâu! Khân may văch gay gĭt lĕ ntŭk huơi tâm n'gor aơ.” 13Khân păng lah: “Hên jêng phung oh mon may, jêng phung jât ma bar nuyh oh nâu, phung kon du mbơ̆, tâm n'gor Kanaan. Oh mpŏt aƀaơ gŭ ndrel ma mbơ̆ hên, bi du huê bunuyh roh hêng.” 14Y-Yôsep lah: “Di ngăn nâm bu gâp hŏ lah jêh, khân may jêng phung n'hut. 15Ƀiălah aơ jêng nau gâp mra rlong uănh khân may: Gâp sŏk tĭng nau rêh Pharaôn gay ton pô aơ, khân may mâu mra du luh ôh tă bơh ntŭk aơ, tơlah oh mpŏt khân may mâu văch ôh ta aơ. 16Prơh hom du huê bunuyh tâm khân may hăn sĭt gay njŭn leo oh mpŏt khân may văch ta aơ, lĕ phung hôm e ăn gŭ tâm ndrung ta aơ. Gay rlong uănh khân may ngơi ngăn mâu lah mâu. Lah mâu di ôh kơt pônây, gâp sŏk nau rêh Pharaôn ton pô aơ, khân may jêng phung n'hut.” 17Jêh nây păng krŭng nsum khân păng tâm ndrung pe nar.
Y-Yôsep dơi djôt Y-Benjamin trŭnh
18Tât nar tal pe, Y-Yôsep lah ma khân păng: “Yorlah gâp klach yơk ma Brah Ndu, lah khân may ŭch rêh ăn khân may ƀư hom kơt aơ. 19Tơlah khân may jêng phung bunuyh sŏng, ăn du huê bunuyh gŭ tâm ndrung aơ, ăn phung ƀaƀă njŭn ndơ sông sa sĭt gay bah ji ngot ma rnăk ngih khân may. 20Jêh nây, khân may leo oh mpŏt khân may hăn trŭnh ma gâp. Pôri nau ngơi khân may jêng nau ngăn, jêh ri khân may mâu mra khĭt ôh.” Khân păng dơn nau kơt nây.
21Khân păng tâm ngơi ndrăng khân păng nơm: “Nanê̆ ngăn he hŏ tih jêh đah oh he. He hŏ saơ jêh nau rngot tâm nuih n'hâm păng nôk păng vơl dăn ma he, ƀiălah he mâu ŭch iăt ôh. Yor nây nar aơ he anh nau rngot aơ.” 22Y-Ruben nduyh khân păng: “Mâu di hĕ gâp hŏ lah jêh ma khân may lơi ƀư nau mhĭk ôh đah ndăm jê̆ nây? Ƀiălah khân may mâu iăt ôh. Aƀaơ aơ ăn he ntrok rnon mham păng dơm.”#Ntơm 37:21-22. 23Khân păng mâu gĭt ôh Y-Yôsep gĭt vât nau khân păng ngơi, yorlah păng geh du huê bunuyh rblang.
24Y-Yôsep du ntŭk êng jêh ri nhĭm, jêh nây mơ ngơi tay ma khân păng. Tâm phung nây, Y-Yôsep đă nhŭp Y-Simêôn bơh khân păng jêh ri chăp tanăp măt khân păng.
Phung nâu Y-Yôsep sĭt ta Kanaan
25Y-Yôsep đă bu sŏk ba ƀlê troch bêng ăp ƀau khân păng jêh ri mplơ̆ tay rnoh prăk; prăk mbu nơm dơm tâm ƀau ba nơm nây, jêh ri ăn ma khân păng ndơ sông sa njŏ trong. Bu ƀư di kơt nây.
26Khân păng dăp ba klơ ndŭr kơi seh bri jêh nây luh hăn. 27Tât ntŭk khân păng veh bê̆ch, du huê tâm phung khân păng pơk ƀau gay sŏk ba ăn ma seh bri păng sa, păng saơ prăk tâm bâr ƀau păng. 28Păng lah ma phung oh nâu păng: “Uănh aơ, prăk gâp bu hŏ mplơ̆ tay ma gâp. Prăk gŭ ta bâr ƀau gâp!” nâm bu bunuyh roh nuih n'hâm, râm sâr ngơi ndrăng khân păng: “Moh nau Brah Ndu hŏ ƀư ma he aơ?”
Y-Yakôb mâu ăn Y-Benjamin hăn
29Nôk khân păng hăn plơ̆ sĭt gay mâp mbơ̆ khân păng jêng Y-Yakôb ta n'gor Kanaan, khân păng nkoch bri lĕ nau hŏ tât jêh. Khân păng lah: 30“Nơm jêng kôranh n'gor Êjipt hŏ ngơi dăng đah hên, păng lah ma hên jêng phung luh lăp n'hut uănh n'gor aơ. 31Hên hŏ lah jêh ma păng: ‘Hên jêng bunuyh sŏng, hên mâu jêng phung n'hut ôh. 32Hên geh jât ma bar nuyh oh nâu, kon du mbơ̆ bă; du huê bunuyh hŏ roh hêng, oh mpŏt hên dôl gŭ ta ngih ndrel mbơ̆ ta n'gor Kanaan.’ 33Ƀiălah kôranh n'gor nây lah ma hên: ‘Pô aơ gâp mra gĭt ma khân may jêng phung bunuyh sŏng. Ăn du huê bunuyh tâm khân may gŭ ta aơ ndrel gâp, ăn phung ƀaƀă djôt leo ndơ sông sa sĭt ma rnăk vâl khân may, 34jêh nây njŭn leo oh mpŏt khân may mâp gâp. Pôri, gâp mra gĭt khân may mâu jêng ôh phung n'hut, ƀiălah jêng phung sŏng ngăn. Gâp mra jao mplơ̆ oh nâu khân may, jêh ri khân may mra dơi tăch rgâl tâm n'gor aơ.’”
35Nôk khân păng nkhŭt ba bơh ƀau, khân păng saơ nklâm prăk ăp nơm gŭ tâm ƀau păng, Saơ nklâm prăk nây, khân păng jêh ri nđâp ma mbơ̆ khân păng klach da dê ngăn. 36Y-Yakôb, mbơ̆ khân păng, lah: “Khân may hŏ ăn roh jêh phung kon gâp! Y-Yôsep roh hêng, Y-Simêôn mâu hôm, aƀaơ khân may ŭch sŏk Y-Benjamin! Lĕ nau nkhŭt ta klơ bôk gâp da dê!” 37Y-Ruben lah ma mbơ̆ păng: “Dăn mbơ̆ jao oh ma gâp, gâp mra leo păng mplơ̆ ma may. Tơlah gâp mâu leo mplơ̆ păng, ăn may nkhĭt bar hê kon bu klâu gâp.” 38Ƀiălah Y-Yakôb lah: “Kon mpŏt gâp mâu mra hăn trŭnh ndrel ma khân may ôh, yorlah nâu păng hŏ khĭt jêh, knŏng hôm du huê păng aơ dơm. Tơlah rŏ trong geh nau mhĭk tât ma păng, khân may ƀư ma bunuyh bôk mbra aơ trŭnh ma ƀon phung khĭt ma nau rngot.”
Currently Selected:
Nau Ntơm 42: CMO2023
Highlight
Share
Copy
Want to have your highlights saved across all your devices? Sign up or sign in
© 2023 United Bible Societies. All rights reserved.
