Nau Ntơm 5
5
Noi deh Y-Ađam ntơm bơh Y-Set tât Y-Nôê.
(I Nau Rêh Jêng 1:1-4)
1Aơ jêng noi deh Y-Ađam.#Ntơm 1:27-28.
Rnôk Brah Ndu rhăk njêng bunuyh, Păng njêng kon bunuyh tâm ban ma Brah Ndu. 2Brah Ndu rhăk njêng bu klâu jêh ri bu ur, ăn nau ueh uĭn ma khân păng, jêh ri tâm amoh jêng “bunuyh” rnôk Păng rhăk njêng khân păng.#Mat 19:4; Mark 10:6.
3Y-Ađam geh du rhiăng pe jât năm păng bă du huê kon bu klâu, tâm ban păng nơm jêh ri amoh jêng Y-Set. 4Jêh deh Y-Set, Y-Ađam hôm gŭ rêh pham rhiăng năm, deh kon bu klâu kon bu ur. 5Pôri Y-Ađam dơi rêh sĭn rhiăng pe jât năm, jêh nây păng khĭt.
6Y-Set geh du rhiăng ma prăm năm păng bă Y-Ênôs. 7Jêh păng deh Y-Ênôs, Y-Set hôm gŭ rêh pham rhiăng ma pơh năm, deh kon bu klâu kon bu ur. 8Pôri Y-Set dơi rêh sĭn rhiăng jât ma bar năm, jêh nây păng khĭt.
9Y-Ênôs geh sĭn jât năm păng bă Y-Kênan. 10Jêh deh Y-Kênan, Y-Ênôs hôm gŭ rêh pham rhiăng jât mprăm năm, deh kon bu klâu kon bu ur. 11Pôri Y-Ênôs dơi rêh sĭn rhiăng ma prăm năm, jêh nây păng khĭt.
12Y-Kênan geh pơh jât năm păng bă Y-Mahalalel. 13Jêh deh Y-Mahalalel, Y-Kênan hôm gŭ rêh pham rhiăng puăn jât năm, păng deh kon bu klâu kon bu ur. 14Pôri Y-Kênan dơi rêh sĭn rhiăng jât năm, jêh ri păng khĭt.
15Y-Mahalalel geh prao jât mprăm năm, păng bă Y-Jaret. 16Jêh deh Y-Jaret, Mahalalel hôm gŭ rêh pham rhiăng pe jât năm, deh kon bu klâu kon bu ur. 17Pôri Y-Mahalalel dơi rêh pham rhiăng sĭn jât mprăm năm, jêh ri păng khĭt.
18Y-Jaret geh du rhiăng prao jât ma bar năm păng bă Y-Ênŏk. 19Jêh deh Y-Ênŏk, Y-Jaret hôm gŭ rêh pham rhiăng năm, deh kon bu klâu kon bu ur. 20Pôri Y-Jaret dơi rêh sĭn rhiăng prao jât ma bar năm, jêh ri păng khĭt.
21Y-Ênŏk geh prao jât mprăm năm păng bă Y-Mêtusêla. 22Jêh deh Y-Mêtusêla, Y-Ênŏk hăn ndrel ma Brah Ndu tâm pe rhiăng năm, deh kon bu klâu kon bu ur. 23Pôri Y-Ênŏk rêh pe rhiăng prao jât mprăm năm. 24Y-Ênŏk hăn ndrel Brah Ndu, jêh nây roh klăk, yorlah Brah Ndu vơt chông păng.#Hêb 11:5; Yut 14.
25Y-Mêtusêla geh du rhiăng pham jât mpơh năm păng bă Y-Lamek. 26Jêh bu deh Y-Lamek, Y-Mêtusêla hôm gŭ rêh pơh rhiăng pham jât ma bar năm, deh kon bu klâu kon bu ur. 27Pônây Y-Mêtusêla dơi rêh sĭn rhiăng prao jât msĭn năm, jêh ri păng khĭt.
28Nôk Y-Lamek geh du rhiăng pham jât ma bar năm, păng bă du huê kon bu klâu, 29Ntơ amoh jêng Y-Nôê,#5:29 Nôê: Tâm nau ngơi Hêbrơ, rplay ngơi aơ geh bâr nau ngơi tâm ban rplay ngơi nâm ntĭt jêng “nau maak”, “nau bonh leng”. jêh ri lah: “Tâm kan he, tâm nau jâk jêr hŏt r'ah bơh ti he, nơm aơ mra njŭn leo he ma nau bonh leng ntơm bơh neh Brah Yêhôva hŏ rtăp rak jêh.” 30Jêh deh Y-Nôê, Y-Lamek hôm gŭ rêh prăm rhiăng sĭn jât mprăm năm, deh kon bu klâu kon bu ur. 31Pôri Y-Lamek dơi rêh pơh rhiăng pơh jât mpơh năm, jêh ri păng khĭt.
32Nôk Y-Nôê geh prăm rhiăng năm păng bă Y-Sem, Y-Cham jêh ri Y-Japhet.
Currently Selected:
Nau Ntơm 5: CMO2023
Highlight
Share
Copy
Want to have your highlights saved across all your devices? Sign up or sign in
© 2023 United Bible Societies. All rights reserved.
