Yôhan 3

Brah Yêsu jêh ri Y-Nikôđem

1Tâm phung Pharisi,#3:1 Uănh rblang ta Mat 3:7. geh du huê bunuyh amoh păng Y-Nikôđem, du huê kôranh chiă uănh tâm phung Yuđa. 2Dôl măng, păng văch ta Brah Yêsu jêh ri lah: “Hơi Nơm Nti, hên gĭt May jêng kôranh nơm nti văch tă bơh Brah Ndu. Tơlah Brah Ndu mâu gŭ ndrel, mâu geh bunuyh dơi ƀư lĕ nau mbên khlay May hŏ ƀư.” 3Brah Yêsu lah: “Nanê̆ ngăn, Gâp lah ngăn ma may, tơlah du huê bunuyh mâu deh mhe tay,#3:3,7 deh mhe tay; Mlr: deh luh tă bơh klơ prêh. mâu dơi saơ ƀon bri hađăch Brah Ndu ôh.” 4Y-Nikôđem ơh pô aơ: “Mâm ƀư bunuyh lĕ ranh dơi deh tay? Mâm dơi păng plơ̆ lăp tâm ndŭl mê̆ jêh ri deh rơh bar?” 5Brah Yêsu lah: “Nanê̆ ngăn, Gâp lah ngăn ma may: Tơlah du huê bunuyh mâu rnơm ôh ma dak jêh ri ma Brah Huêng Ueh gay deh, mâu dơi lăp tâm ƀon bri hađăch Brah Ndu ôh. 6Moh ndơ tă bơh nglay săk jêng nglay săk, moh ndơ deh tă bơh Brah Huêng Ueh jêng brah. 7Lơi ta hih rhâl ma nau Gâp hŏ lah jêh ma may, ăn may deh mhe đŏng! 8Sial khôm ntŭk păng ŭch khôm, may tăng sial, ƀiălah mâu gĭt sial ntŭk tă luh jêh ri ntŭk păng hăn. Mbu nơm deh mhe tă bơh Brah Huêng Ueh kơt nây đŏng.”

9Y-Nikôđem lah tay: “Mâm ƀư nau nây dơi tât geh?” 10Brah Yêsu plơ̆ lah: “May jêng kôranh nơm nti tâm phung Israel, mâm ƀư mâu gĭt rbăng lĕ nau nây? 11Nanê̆ ngăn, Gâp lah ngăn ma may: He ngơi nau he gĭt, mbơh nkoch nau he hŏ saơ, ƀiălah khân may mâu dơn ôh nau hên mbơh nkoch. 12Tơlah Gâp lah ma khân may lĕ nau tâm neh ntu khân may hôm mâu chroh, rlau lơn ma nĕ Gâp nkoch lĕ nau ta klơ trôk, mâm ƀư khân may dơi chroh? 13Ê hŏ geh du huê hao ta klơ trôk, ƀiălah knŏng geh Nơm jŭr tă bơh trôk, jêng Kon Bunuyh. 14Tâm ban Y-Môis yông bêh tâm bri rdah tâm ban lĕ, pôri bu mra yông Kon Bunuyh kơt nây lĕ,#Kơp 21:9. 15gay mbu moh chroh ma Păng dơi nau rêh n'ho ro.

16Yorlah Brah Ndu rŏng hâu ngăn ma neh ntu#3:16 Mlr: kon bunuyh. kŏ tât Păng ăn Kon Dul Păng nơm, gay ăn ma mbu nơm chroh ma Kon Păng nây, mâu rai yot ôh, ƀiălah geh nau rêh n'ho ro. 17Yorlah Brah Ndu hŏ njuăl Kon Păng văch ta neh ntu, mâu di gay tâm rmal neh ntu ôh, ƀiălah gay neh ntu yor ma Kon Păng dơi tâm rklaih. 18Mbu nơm chroh ma Kon nây, mâu geh tâm rmal ôh, ƀiălah mbu nơm mâu chroh ôh, hŏ geh nau tâm rmal jêh, yorlah mâu chroh ma amoh Kon Dul Brah Ndu. 19Nau tâm rmal nây jêng kơt aơ: Nau ang hŏ tât jêh ta neh ntu, ƀiălah kon bunuyh ŭch nau ngo rlau lơn ma nau ang, yorlah kan khân păng jêng nau djơh mhĭk. 20Yorlah mbu nơm ƀư mhĭk, păng tâm rmot ma nau ang jêh ri mâu ŭch văch ôh ta nau ang, klach mpơl nau kan păng ƀư. 21Ƀiălah mbu nơm ƀư tĭng nau ngăn, ri mơ văch tâm nau ang gay lĕ nau păng nơm hŏ ƀư jêh tâm Brah Ndu dơi saơ rah vah.”

Nau Y-Yôhan mbơh nglĕ dŭt

22Jêh nau nây, Brah Yêsu jêh ri phung oh mon hăn ta n'gor Yuđa. Păng gŭ ndrel ma khân păng jêh ri ƀư ƀaptem. 23Y-Yôhan ƀư đŏng ƀaptem ta ƀon Ênôn, dăch Salim, yorlah ta nây geh âk dak jêh ri bu văch dơn nau ƀaptem. 24Nôk nĕ Y-Yôhan ê hŏ bu krŭng ôh.#Mat 14:3; Mark 6:17; Luk 3:19-20.

25Nôk nây, geh nau tâm rlăch ma nau rƀŭn ƀư kloh ta nklang phung oh mon Y-Yôhan jêh ri du huê bunuyh Yuđa.#3:25 Geh ƀaƀă nau rblang ntơm saơm nchih: ƀaƀă phung Yuđa. 26Khân păng văch ta Y-Yôhan jêh ri lah: “Hơi nơm nti, bunuyh gŭ ndrel ma may mpeh kăl tê̆ dak krong Yurdan, may hŏ mbơh nkoch ueh jêh, aƀaơ aơ dôl ƀư ƀaptem jêh ri lĕ rngôch bunuyh hăn ta păng da dê.” 27Y-Yôhan plơ̆ lah: “Lah mâu di tă klơ trôk ăn, mâu geh du huê bunuyh dơi sŏk dơn du ntil ndơ ôh. 28Khân may nơm hŏ mbơh nkoch ma gâp pô aơ gâp hŏ lah gâp mâu di jêng Brah Krist ôh, ƀiălah bu hŏ njuăl gâp văch lor ma Păng.#Yôh 1:20. 29Mbu mhe gŭ ur, păng nây jêng klay; ƀiălah mĭt jiăng klay gŭ iăt jêh ri maak răm ngăn nôk tăng bâr klay ngơi. Nây jêng nau gâp răm maak nanê̆ rĭng ngăn. 30Păng khư geh nau tâm n'hao prêh, bi gâp ăn trŭnh tâm dâng.

31Nơm văch tă bơh klơ prêh jêng klơ lĕ rngôch. Mbu luh tă bơh neh jêng ndơ neh ntu, ngơi lĕ nau jêng ndơ neh ntu; ƀiălah Nơm văch tă bơh trôk jêng klơ lĕ rngôch. 32Păng mbơh nkoch lĕ nau Păng hŏ saơ jêh ri tăng, ƀiălah bu mâu sŏk dơn ôh nau Păng mbơh knoch. 33Mbu hŏ sŏk dơn nau Păng mbơh knoch, ƀư nâp pô aơ Brah Ndu jêng nau nanê̆ ngăn. 34Yorlah Nơm Brah Ndu hŏ njuăl văch jêh mbơh knoch nau ngơi Brah Ndu, yorlah Brah Ndu ăn Brah Huêng Ueh ma Păng mâu geh dŭt. 35Mbơ̆ rŏng ma Kon jêh ri hŏ jao lĕ ntil ndơ tâm ti Kon.#Mat 11:27; Luk 10:22. 36Mbu nơm chroh ma Kon dơi geh nau rêh n'ho ro, mbu mâu ŭch chroh ma Kon mâu dơi geh nau rêh ôh, ƀiălah nau Brah Ndu ji nuih hôm gŭ ta klơ bunuyh nây.”

Currently Selected:

Yôhan 3: CMO2023

Highlight

Copy