Luka 10
10
Brah Yêsu njuăl pơh jât oh mon hăn
1Jêh nây, Kôranh Brah săch pơh jât oh mon êng,#10:1 Geh ƀaƀă nau rblang ntơm saơm nchih: pơh jât bar. jêh ri njuăl bar hê bar hê hăn lor ma Păng lăp lĕ rngôch ƀon jêh ri lam ntŭk Păng mra hăn tât. 2Păng lah ma khân păng: “Yan rek geh âk ba ƀiălah bunuyh rek geh djê̆. Pôri yơh, dăn hom ma Kôranh Brah yan rek njuăl phung rek lăp yan rek Păng.#Mat 9:37-38. 3Hăn hom! Aơ, Gâp njuăl khân may hăn nâm bu kon biăp ta nklang phung so bri.#Mat 10:16. 4Lơi djôt dŭng prăk, dŭng cheng, ntâu jot, jêh ri lơi mbah ma bu ôh rŏ trong.#Mat 10:7-14; Mark 6:8-11; Luk 9:3-5. 5Tơlah khân may lăp ngih, lor lơn ngơi: ‘Dăn nau đăp mpăn gŭ ma ngih aơ!’ 6Tơlah ngih nây geh bunuyh ŭch dơn nau đăp mpăn, nau đăp mpăn khân may mra gŭ tâm bunuyh nây; tơlah mâu, nau đăp mpăn nây mra plơ̆ sĭt ma phung kon. 7Gŭ hom tâm ngih nây, sông sa nhêt ndrel ma khân păng, yorlah bunuyh pah kan nkhôm găl geh prăk nau nkhôm păng nơm. Lơi chalơi ngih aơ trơn ngih êng.#I Kô 9:14; I Ti 5:18. 8Moh ƀon khân may lăp jêh ri bu mra vơt rom khân may, sa hom ndơ bu ndrăp ma khân may. 9Ƀư bah hom bunuyh ji gŭ ta nây jêh ri lah ma khân păng pô aơ: ‘Ƀon bri hađăch Brah Ndu văch dăch jêh ma khân may.’ 10Lah phung kon mra lăp tâm du ƀon, ƀiălah khân păng mâu vơt rom phung kon, hăn luh hom tâm trong jêh ri lah:#Kan 13:51. 11‘Nđâp ma neh muy ƀon krêp ta jâng khân may, hên rtuh lơi đŏng gay tâm rdâng đah khân may; ƀiălah, ăn khân may gĭt nau nây: Ƀon bri hađăch Brah Ndu văch dăch ma khân may jêh.’ 12Gâp lah ma khân may tâm nar phat dôih, ƀon Sôdôm mra dơn nau tâm rmal n'gơch lơn ma ƀon nây.#Ntơm 19:24-28; Mat 10:15; 11:24.
13Rêh ni ngăn ma may, ƀon Kôrasin! Rêh ni ngăn ma may, ƀon Ƀêtsaiđa! Yorlah tơlah nau mbên khlay ƀư jêh ta nklang khân may, dơi ƀư nâm bu ta ƀon Tyre jêh ri ƀon Sidôn, ri mơ khân păng hŏ nsoh ao ƀau, ndô buh jêh ri rmal nau tih jŏ jêh.#Êsai 23:1-18; Êsê 26:1–28:26; Yôel 3:4-8; Amôt 1:9-10; Sak 9:2-4. 14Pôri, tât nar phat dôih, ƀon Tyre jêh ri ƀon Sidôn mra dơn nau tâm rmal n'gơch lơn ma khân may. 15Bi may, ƀon Kapernum, bu n'hao jêh may tât klơ trôk? Mâu, may mra ntrŭnh tâm dâng tât ta ƀon phung khĭt!#10:15 Uănh rblang ta Mat 11:23.#Êsai 14:13-15. 16Mbu nơm iăt khân may, jêng iăt Gâp; mbu nơm dun khân may, jêng dun Gâp. Mbu dun Gâp, jêng dun Nơm hŏ njuăl Gâp.”#Mat 10:40; Mark 9:37; Luk 9:48; Yôh 13:20.
Phung oh mon plơ̆ sĭt
17Pơh jât oh mon#10:17 Uănh rblang ta trong 1. plơ̆ sĭt răm maak jêh ri nkoch pô aơ: “Ơ Kôranh Brah, tâm amoh May, phung brah mhĭk lăp gŭ tâm dâng ma hên.” 18Brah Yêsu lah ma khân păng: “Gâp saơ jêh Satan tŭp tă bơh trôk tâm ban ma lơp nglaih. 19Aơ, Gâp ăn jêh ma khân may nau dơi gay jot bêh, phung ndŭr vơng jêh ri lĕ nau ktang phung rlăng tâm dâng jâng. Mâu geh ndơ ƀư mhĭk ma khân may ôh.#Mprơ Ơm 91:13. 20Ƀiălah, lơi răm maak ôh yor phung brah mhĭk tông bâr ma khân may, maak răm hom yor amoh săk phung kon hŏ nchih jêh ta klơ trôk.”
Nau Mhe Mhan Ueh tâm mpơl ma bunuyh mleh tâm ban kon se
(Mathiơ 11:25-27; 13:16-17)
21Tâm mông nây, Brah Yêsu răm maak tâm Brah Huêng Ueh jêh ri lah: “Ơ Mbơ̆ jêng Kôranh Brah trôk jêh ri neh ntu! Gâp tâm rnê ma Mbơ̆ yorlah Mbơ̆ pôn jêh lĕ nau nây ma bunuyh blau mĭn jêh ri gĭt rbăng, ƀiălah tâm mpơl jêh ma phung kon se jê̆! N'hêl nanê̆ ngăn, ơ Mbơ̆, yorlah nau nây ƀư ueh nau mĭn Mbơ̆ ŭch. 22Mbơ̆ jao jêh lĕ rngôch nau ma Gâp. Padih Mbơ̆, mâu geh bu dơi gĭt Kon; padih Kon jêh ri mbu moh Kon ŭch tâm mpơl dơi gĭt Mbơ̆.”#Yôh 3:35; 10:15. 23Jêh nây Păng n'gĭl uănh phung oh mon jêh ri lah êng: “Ueh maak yơh măt dơi saơ nau phung kon saơ! 24Yorlah Gâp mbơh ma khân may, geh âk phung nơm mbơh lor jêh ri phung hađăch ŭch saơ nau khân may saơ ƀiălah mâu saơ ôh, ŭch tăng nau khân may tăng ƀiălah mâu tăng ôh.”
Nau hôr ma bunuyh Samari ueh
25Nôk nây, geh du huê nơm nti nau vay dâk jêh ri ôp gay rlong uănh Brah Yêsu pô aơ: “Hơi Nơm Nti, moh nau gâp mra ƀư gay ma dơn nau rêh n'ho ro?”#Mat 22:35-40; Mark 12:28-34. 26Brah Yêsu plơ̆ lah: “Moh ndơ bu nchih jêh tâm nau vay? Mâm nau may gĭt vât?” 27Bunuyh nây ơh: “Ăn may lĕ nuih n'hâm, ma lĕ huêng, ma lĕ n'hâm suan, lĕ nau mĭn; yơk rŏng Brah jêng Kôranh Brah Ndu may; jêh ri rŏng ma phung chiau meng may tâm ban ma may nơm lĕ.”#Nkah 6:5; Lêvi 19:18. 28Brah Yêsu lah: “May plơ̆ lah di ngăn. Ƀư hom nau nây ri mơ may mra rêh.”#Lêvi 18:5.
29Ƀiălah păng ŭch mpơl păng nơm jêng sŏng srăng rĭ dĭng lah ma Brah Yêsu: “Mbu jêng bunuyh chiau meng gâp?” 30Brah Yêsu plơ̆ lah: “Du huê tă bơh ƀon Yêrusalem jŭr ta ƀon Yêrikô tâm mâp đah phung ntŭng. Khân păng sŏk lĕ kho ao jêh ri dong mbang chalơi ta nĕ, n'gul khĭt n'gul rêh bunuyh nây. 31Nôk nây, geh du huê kôranh ƀư brah nkhêp hăn jŭr trong nây, saơ bunuyh rmanh ri hăn der rgăn trong đah rĭ. 32Tâm ban kơt nây, du huê Lêvi tât đŏng ta ntŭk nây, saơ jêh der đŏng rgăn trong đah rĭ gay hăn. 33Ƀiălah geh du huê Samari hăn trong, văch dăch saơ bunuyh rmanh ri mơ geh nuih n'hâm yô̆ nđach#II Rêh Jêng 28:15. 34hăn dăch ro, sŏk dak ngi ôlive jêh ri ndrănh mhĭng ntŭk sôt, put n'grêp, jêh nây sâm rdâk ăn bunuyh rmanh klơ mpa păng nơm jêh ri njŭn tât ntŭk njưh gay mât mray. 35Nar ôi taơ, păng sŏk bar đơniê ăn ma kôranh ngih njưh jêh ri lah: ‘Mât mray hom bunuyh aơ, tơlah huach ntop đŏng, nôk plơ̆ sĭt gâp mra mplơ̆ tay.’ 36Tĭng nau may mĭn, tâm phung pe nuyh nây, mbu moh jêng bunuyh chiau meng đah nơm mâp phung ntŭng?” 37Nơm nti nau vay ơh: “Nây jêng nơm tâm mpơl jêh nuih n'hâm yô̆ nđach ma bunuyh rmanh.” Brah Yêsu lah: “Hăn hom, ƀư tĭng kơt nây.”
H'Mathê jêh ri H'Mari
38Dôl ndrel hăn trong ma oh mon, Brah Yêsu veh lăp tâm du ƀon jê̆ ri. Geh du huê bu ur tâm amoh H'Mathê vơt rom Păng lăp tâm ngih păng nơm.#Yôh 11:1. 39Păng geh du huê oh bu ur amoh păng H'Mari gŭ ta jâng Kôranh Brah gay iăt nau Păng ngơi. 40Bi H'Mathê rvê âk ir ma nau pah kan, rĭ dĭng păng văch lah ma Păng: “Ơ Kôranh Brah, oh gâp gay gâp pah kan êng du huê, Kôranh Brah mâu ntreng uănh ƀơh? Dăn Kôranh Brah đă păng kơl gâp.” 41Kôranh Brah plơ̆ lah: “Hơi H'Mathê, H'Mathê, kon rvê ir jêh ri jêng rŭng răng âk nau; 42ƀiălah knŏng geh du ntil kan săch dơm. H'Mari săch jêh nau ueh jêng nau bu mâu mra dơi pit sŏk bơh păng ôh.”
Currently Selected:
Luka 10: CMO2023
Highlight
Share
Copy
Want to have your highlights saved across all your devices? Sign up or sign in
© 2023 United Bible Societies. All rights reserved.
