Luka 16
16
Nau hôr ma bunuyh mât uănh mâu răp jăp. – Lĕ nau đă êng
1Brah Yêsu lah tay ma phung oh mon: “Du huê bunuyh ndrŏng geh du huê bunuyh mât uănh ngih jêh ri bu phong nơm nây ƀư mpŭng jêh drăp ndơ kôranh păng. 2Yor ri, kôranh kuăl păng tât jêh ri lah: ‘Gâp tăng bu phong may moh nau nây! Mbơh nkoch rah vah hom nau may mât uănh, yorlah ntơm aƀaơ may mâu mra dơi mât ngih gâp ôh!’ 3Bunuyh mât ngih mĭn êng: ‘Kôranh n'glưh nsot nau gâp mât uănh, moh gâp mra ƀư? Pŏk neh gâp mâu geh n'hâm suan, bi hăn ƀư dan gâp bêk prêng. 4Gâp gĭt jêh moh gâp mra ƀư gay nôk bu n'glưh nsot gâp geh bunuyh mra rom gâp tâm ngih khân păng.’ 5Pôri, păng kuăl ăp nơm iang rnon kôranh tât jêh ri lah ma nơm tal nguay: ‘Ndah âk may iang rnon kôranh gâp?’ 6Bunuyh nây plơ̆ lah: ‘Du rhiăng thŭng dak ngi ôlive.’ Bunuyh mât ngih lah: ‘Sŏk hom pŏk samƀŭt rnon, gŭ ta nây nchih gơnh: Prăm jât.’ 7Jêh nây păng lah ma bunuyh tal bar: ‘Ndah âk may iang rnon?’ Nơm nây plơ̆ lah: ‘Du rhiăng sah#16:7 Nrn: koros, du koros tâm rnôk Nau Tâm Rnglăp Mhe klăp lah 400 lit, dăch 10 ƀau. ba ƀlê.’ Bunuyh mât ngih lah: ‘Sŏk hom pŏk samƀŭt rnon nchih: Pham jât.’ 8Kôranh păng tâm rnê ma bunuyh mât uănh ngih kue nây ƀư blau gĭt mĭn ngăn kơt nây. Yorlah phung kon rnôk aơ blau rlau lơn phung kon nau ang tâm nau gŭ ngao ma phung băl khân păng. 9Jêh ri Gâp lah ma khân may: Ăn dŏng prăk ndơ mâu sŏng gay ƀư mĭt jiăng, gay ma tât prăk ndơ nây lĕ jêh, khân păng mra rom khân may lăp tâm ngih n'ho ro.
10Mbu nơm răp jăp tâm kan dŭt jê̆, răp jăp đŏng tâm kan toyh, mbu nơm kue tâm nau dŭt jê̆, kue đŏng tâm kan toyh. 11Pôri tơlah khân may mâu răp jăp ma drăp ndơ mâu sŏng, mbu mra djôt drăp ndơ ngăn jao ma khân may? 12Tơlah khân may mâu răp jăp ma drăp ndơ bunuyh êng, mbu mra jao ma khân may drăp ndơ prăp êng ma khân may nơm? 13Mâu geh du huê oh mon dơi pah kan ma bar hê kôranh, yorlah mra tâm rmot ma kôranh aơ, jêh ri rŏng ma kôranh ri, mâu lah yơk ma kôranh aơ jêh ri mưch ma kôranh êng. Khân may mâu dơi ôh pah kan ma Brah Ndu, nđâp pah kan ma prăk ndô ndơ#16:13 Uănh rblang ta Mat 6:24. ôh.”#Mat 6:24.
14Phung Pharisi jêng phung rŏng ma prăk rêl tăng lĕ nau nây, ri mơ mưch rmot ma Brah Yêsu. 15Păng lah ma khân păng: “Khân may ŭch jan sŏng srăng tanăp bunuyh, ƀiălah Brah Ndu gĭt năl nuih n'hâm khân may; yorlah nau bunuyh n'hao jêng nau mưch rmot tanăp Brah Ndu. 16Nau vay jêh ri nau mbơh lor ăt hôm tât ta rnôk Y-Yôhan dơm. Ntơm nar nĕ, bu mbơh nkoch Nau Mhe Mhan Ueh ma ƀon bri hađăch Brah Ndu jêh ri lĕ rngôch bunuyh dŏng nau dơi ktang gay lăp ta nây.#Mat 11:12-13. 17Trôk neh rlau lôch dơh lơn ma nau jut lơi du rplay samƀŭt dŭt jê̆#16:17 Mlr: du têk rplay samƀŭt. tâm nau vay.#Mat 5:18. 18Mbu nơm chalơi ur păng jêh ri gŭ bu ur êng jêng ƀư tih văng tĭr, bi mbu nơm gŭ bu ur sai păng chalơi jêh, păng ƀư tih văng tĭr đŏng.” #Mat 5:32; I Kô 7:10-11.
Bunuyh ndrŏng jêh ri Y-Lasar
19“Geh jêh du huê bunuyh ndrŏng nsoh ao chăng krăk jêh ri ao bok mhay rhên, ăp nar nhêt sa răm maak ngăn. 20Geh du huê o ach amoh păng Y-Lasar bê̆ch padih mpông ngih bunuyh ndrŏng nây, săk jăn păng bêng toh ok. 21Păng ŭch dơi sa lĕ ndơ sông sa ndăk tŭp tă bơh sưng ndrŏng. Geh đŏng phung so tât ler ntŭk sôt ok păng. 22Bunuyh o ach nây khĭt, tông mpăr Brah Ndu leo păng n'gân tâm ntang ntơh Y-Abraham. Bunuyh ndrŏng khĭt đŏng jêh ri bu leo tâp păng. 23Bunuyh ndrŏng gŭ tâm ƀon phung khĭt#16:23 Nrn: Hades: ntĭt jêng neh ntu bunuyh khĭt. geh nau nđêh nji, n'gơr măt uănh saơ Y-Abraham bơh ngai jêh ri Y-Lasar gŭ ta ntang ntơh păng. 24Păng kuăl huy: ‘Hơi chô yau Y-Abraham, yô̆ nđach an gâp ƀă, njuăl Y-Lasar mbŭk nglau ti tâm dak gay nđik ta mpiăt gâp, yorlah gâp rêh ni dŭt hâu ngăn tâm mpiăt ŭnh aơ.’ 25Ƀiălah Y-Abraham plơ̆ lah: ‘Hơi kon, kah gĭt tay hom dôl may gŭ rêh, may dơi dơn lĕ nau ueh jêh, bi Y-Lasar dơn âk nau djơh; aƀaơ aơ, păng geh nau bonh leng, bi may gŭ tâm nau rêh ni dŭt hâu ngăn. 26Rlau lơn ma nĕ, geh du brŏng jru dŭt huy vah vang may đah hên, kŏ tât mbu nơm ŭch ntơm bơh ntŭk aơ rgăn ta ntŭk nây mâu dơi, mbu nơm ŭch ntơm bơh ntŭk nây rgăn ta ntŭk aơ mâu dơi ôh.’ 27Bunuyh ndrŏng lah: ‘Hơi chô yau! Pôri dăn ma may njuăl Y-Lasar hăn tât ta ngih mbơ̆ gâp, 28yorlah gâp geh prăm nuyh oh, gay ma păng mbơh lor khân păng, gay ăn khân păng mâu hăn jŭr ntŭk nau rêh ni dŭt hâu ngăn aơ.’ 29Ƀiălah Y-Abraham plơ̆ lah: ‘Khân păng geh jêh Y-Môis jêh ri phung nơm mbơh lor. Ăn khân păng iăt nau phung nây!’ 30Bunuyh ndrŏng lah tay: ‘Hơi chô yau Y-Abraham, mâu di pônây ôh! Ƀiălah tơlah geh bunuyh khĭt dâk rêh tay mâp ta păng, ri mơ khân păng mra rmal nau tih.’ 31Y-Abraham plơ̆ lah: ‘Tơlah khân păng mâu iăt nau Y-Môis ngơi jêh ri nau phung nơm mbơh lor ngơi, nđâp tơlah geh bunuyh khĭt dâk rêh tay, khăn păng mâu lĕ chroh.’ ”
Currently Selected:
Luka 16: CMO2023
Highlight
Share
Copy
Want to have your highlights saved across all your devices? Sign up or sign in
© 2023 United Bible Societies. All rights reserved.
