Luka 18

Nau hôr ma du huê kôranh phat dôih jêh ri bu ur ndrô

1Brah Yêsu nkoch bri du nau hôr ma phung oh mon gay ăn khân păng mbơh sơm ƀaƀơ, lơi rdja nuih n'hâm ôh. 2Păng lah: “Tâm ƀon ri, geh du huê kôranh phat dôih mâu klach yơk ma Brah Ndu, mâu đŏng chrê ma bu ôh. 3Geh du huê bu ur ndrô tâm ƀon nây ăt văch lah ma kôranh phat dôih: ‘Dăn phat dôih hom tâm nau di ma gâp gay tâm rdâng đah nơm ƀư rlăng ma gâp.’ 4Kôranh phat dôih dun du mông nar. Ƀiălah pakơi nây, păng mĭn êng: ‘Nđâp tơlah gâp mâu klach Brah Ndu mâu đŏng chrê ma bu, 5ƀiălah yor bu ur ndrô aơ ƀư rsuak gâp, pôri gâp phat dôih nau di ma păng, klach lah păng hăn tay ƀư rsĭk tôr gâp.’ ” 6Brah Yêsu lah: “Khân may iăt nau kôranh phat dôih kue lah mâu lah mâu? 7Pônây, lĕ ƀơh Brah Ndu mâu phat dôih sŏng ma phung Păng săch, jêng phung kuăl dăn Păng măng nâm nar, jêh ri mbrĕ mbrơi kơl an khân păng? 8Gâp lah ma khân may, Păng mra gơnh ro phat dôih sŏng ma khân păng. Ƀiălah tơlah Kon Bunuyh văch, Păng hôm saơ nau chroh ta klơ neh ƀơh?”

Nau hôr ma bunuyh Pharisi jêh ri ma bunuyh riu pi

9Brah Yêsu ngơi tay nau hôr aơ ma phung bunuyh mĭn khân păng nơm sŏng srăng ƀiălah mưch rmot ma bunuyh êng: 10“Bar hê bunuyh hăn ta ngih brah mbơh sơm: du huê bunuyh Pharisi jêh ri du huê bunuyh riu pi. 11Bunuyh Pharisi nây dâk jêh ri mbơh sơm ma păng nơm#18:11 Ƀaƀă nau rblang ntơm saơm nchih jêng: mbơh sơm tâm nuih n'hâm. pô aơ: ‘Ơ Brah Ndu gâp lah ueh ma May, yorlah gâp mâu di tâm ban ma lĕ phung êng ôh: kơnh rlau ir, kue, văng tĭr, mâu đŏng tâm ban ma bunuyh riu pi aơ. 12Gâp ât sông sa bar tơ̆ tâm du pơh, jêh ri chê̆ du kô̆ tâm jât lĕ ndơ gâp geh.’ 13Bi bunuyh riu pi gŭ ngai ngai, kŏ tât mâu nănh n'gơr măt klơ trôk, knŏng tŭr ntang ntơh jêh ri lah: ‘Ơ Brah Ndu, dăn yô̆ nđach ma gâp, yorlah gâp jêng du huê bunuyh tih!’ 14Gâp mbơh ma khân may, bunuyh aơ plơ̆ sĭt ta ngih păng, dơi kơp sŏng srăng, mâu di bunuyh ri. Yorlah mbu n'hao êng mra hŭch tâm dâng, ƀiălah mbu nơm hŭch tâm dâng êng mra n'hao.”#Mat 23:12; Luk 14:11.

Brah Yêsu ăn nau ueh uĭn ma phung kon se

(Mathiơ 19:13-15; Markôs 10:13-16)

15Bu leo đŏng ma phung kon se jê̆ tât ma Brah Yêsu gay ma Păng pah ta khân păng. Saơ kơt nây, phung oh mon nduyh phung kon se tât. 16Ƀiălah Brah Yêsu kuăl khân păng jêh ri lah pô aơ: “Ăn phung kon se jê̆ văch ta Gâp, lơi ta buay khân păng ôh; yorlah ƀon bri hađăch Brah Ndu prăp ma phung bunuyh tâm ban ma phung kon se jê̆ nây. 17Nanê̆ ngăn, Gâp lah ma khân may, mbu nơm mâu sŏk dơn ƀon bri hađăch Brah Ndu nâm bu du huê kon se jê̆, khân may mâu dơi lăp ta nây ôh.”

Du huê kôranh ndrŏng

(Mathiơ 19:16-30; Markôs 10:17-31)

18Geh du huê kôranh ôp Brah Yêsu: “Hơi Nơm Nti ueh, moh nau gâp mra ƀư gay ma dơn nau rêh n'ho ro?” 19Brah Yêsu lah: “Mâm ƀư may kuăl ma Gâp jêng ueh? Mâu geh nơm ueh ôh, knŏng êng Brah Ndu dơm. 20Nanê̆ may gĭt jêh nau vay ntăm nây: ‘Lơi ƀư tih nau văng tĭr, lơi nkhĭt bunuyh, lơi ntŭng, lơi ngơi mƀruh, yơk hom ma mê̆ mbơ̆ may.’ ”#Ngluh 20:12-16; Nkah 5:16-20. 21Bu klâu nây ơh: “Gâp tông jêh lĕ nau nây ntơm bơh gâp hôm ndăm.” 22Tơlah Brah Yêsu tăng nau nây, Păng lah: “May hôm pưt du ntil: Tăch hom lĕ rngôch ndơ may geh jêh ri tâm pă ma phung o ach, ri mơ may mra geh jay ndơ khlay klơ trôk, jêh nây văch hom tĭng Gâp.” 23Ƀiălah dôl tăng lĕ nau nây, păng rngot, yorlah păng ndrŏng ngăn ngên. 24Brah Yêsu uănh păng jêh ri lah: “Bunuyh ndrŏng lăp tâm ƀon bri hađăch Brah Ndu jêr ngăn! 25Yorlah seh samô lăp tâm trôm nglai dơh lơn ma bunuyh ndrŏng lăp tâm ƀon bri hađăch Brah Ndu!” 26Phung bunuyh tăng nau nây lah pô aơ: “Pôri mbu nơm dơi klaih?” 27Brah Yêsu plơ̆ lah: “Nau bunuyh mâu dơi ƀư Brah Ndu ƀư dơi.” 28Pêtrôs ơh: “Aơ, hên chalơi lĕ rngôch ndơ hên geh gay tĭng May.” 29Brah Yêsu plơ̆ lah: “Nanê̆ ngăn, Gâp đă ma khân may, mbu mâu chalơi ngih vâl, mê̆ mbơ̆, oh nâu, ur kon yor ƀon bri hađăch Brah Ndu 30ƀiălah mâu dơn âk râk tâm rnôk aơ, jêh ri geh nau rêh n'ho ro tâm rnôk pakơi.”

Brah Yêsu mbơh lor tal pe ma nau Păng khĭt jêh ri dâk rêh tay

(Mathiơ 20:17-19; Markôs 10:32-34)

31Brah Yêsu djôt leo jât ma bar kôranh oh mon ntŭk êng jêh ri lah ma khân Păng: “Aơ, he hăn ta ƀon Yêrusalem; lĕ nau phung nơm mbơh lor nchih jêh ma Kon Bunuyh mra dơi ƀư nanê̆. 32Yorlah bu mra jao Păng ma phung bu năch, bu mra mưch rmot, suai rak jêh ri soh dak diu ta măt Păng. 33Khân păng mra dong Păng ma mâng jêh ri nkhĭt Păng; tât nar rơh pe, Păng mra dâk rêh tay.” 34Ƀiălah phung oh mon mâu gĭt rbăng ôh nau nây, yor nau nây hôm pôn ndâp ma khân păng, jêh ri khân păng mâu gĭt rbăng Kôranh Brah ŭch ngơi ma moh nau.

Brah Yêsu ƀư bah bunuyh chieh măt ta ƀon Yêrikô

(Mathiơ 20:29-34; Markôs 10:46-52)

35Tơlah Brah Yêsu dăch tât ta ƀon Yêrikô, geh du huê bunuyh chieh măt gŭ kâp dăn ndơ sa ta meng trong. 36Tăng phung bunuyh hăn rgăn ta nây, păng ôp moh nau nây. 37Bu lah ma păng gĭt Brah Yêsu, bunuyh ƀon Nasaret hăn rgăn ta nây. 38Bunuyh chieh măt nter: “Hơi Brah Yêsu, Kon hađăch Đavit, dăn yô̆ nđach ma gâp!” 39Phung hăn panăp buay păng, đă gŭ rklăk. Ƀiălah păng nter dŭt huy: “Hơi Kon hađăch Đavit, dăn yô̆ nđach ma gâp ƀă!” 40Brah Yêsu nsrŭng, đă bu leo bunuyh chieh măt tât. Nôk Păng hăn dăch, Păng ôp: 41“Moh may ŭch Gâp ƀư ma may?” Păng ơh: “Hơi Kôranh Brah, dăn ăn măt gâp dơi saơ ang.” 42Brah Yêsu lah: “Ang hom măt tay! Nau chroh may ƀư bah jêh may!” 43Ƀât lât, bunuyh chieh măt dơi saơ ang, hăn tĭng Păng jêh ri tâm rnê Brah Ndu. Lĕ rngôch phung ƀon lan saơ nau nây tâm rnê ma Brah Ndu.

Currently Selected:

Luka 18: CMO2023

Highlight

Copy