Luka 24

Nau Brah Yêsu dâk rêh tay

(Mathiơ 28:1-10; Markôs 16:1-8; Yôhan 20:1-10)

1Nar nguay tâm pơh, ƀhit ang bri hôm ngo, phung bu ur nây sŏk dak si ƀâu kah hŏ ndrăp lor djôt leo tât ta môch Păng. 2Khân păng saơ lŭ toyh hŏ rlă lơi jêh bơh trôm môch, 3ƀiălah dôl khân păng hăn lăp mâu hôm saơ ôh săk jăn Brah Yêsu. 4Tâm dôl khân păng mĭn rvê ma nau nây, nôk aơ geh bar hê bu klâu nsoh ao nglang nchrat ral ngăn dâk êp ta meng khân păng. 5Dôl khân păng klach ngăn, nkŭp muh măt ta neh, bar bunuyh nây đă khân păng: “Mâm ƀư khân ay joi bunuyh rêh ta nklang phung khĭt? 6Păng mâu gŭ ta aơ ôh, Păng hŏ dâk rêh tay jêh! Kah gĭt tay hom nôk hôm gŭ tâm n'gor Galilê, Păng lah jêh ma khân ay#Mat 16:21; 17:22-23; 20:18-19; Mark 8:31; 9:31; 10:33-34; Luk 9:22; 18:31-33. 7pô aơ: ‘Bu mra jao Kon Bunuyh tâm ti phung tih, pâng păng ma kđĭn ta si tâm rkăng jêh ri nar rơh pe Păng dâk rêh tay.’ ” 8Khân păng kah gĭt tay lĕ nau Brah Yêsu ngơi jêh. 9Plơ̆ sĭt tă bơh môch, khân păng nkoch tay lĕ nau nây ma jât ma nguay kôranh oh mon jêh ri ma phung êng. 10Phung bunuyh nkoch tay lĕ nau nây ma phung kôranh oh mon jêng H'Mari Mađala, H'Yôana, H'Mari mê̆ Yakơ, jêh ri phung bu ur hăn ndrel ma khân păng. 11Ƀiălah phung kôranh oh mon mâu chroh ôh, yor mĭn lĕ nau nây mâu nanê̆. 12Nđâp lah pônây, Y-Pêtrôs dâk, nchuăt tât ta môch jêh ri kŭnh uănh ƀiălah knŏng saơ knŏng bok bu put Brah Yêsu hôm ta nây. Păng sĭt ta ngih, hih rhâl ma nau tât jêh.#24:12 Geh ƀaƀă nau rblang ntơm saơm mâu geh trong 12.

Bar hê oh mon hăn ta trong Êmaus

(Markôs 16:12,13)

13Tâm nar nây lĕ, geh bar hê oh mon hăn tât ta ƀon jê̆, tâm amoh Êmaus, ngai đah ƀon Yêrusalem klăp lah jât ma bar kilômet.#24:13 Nrn: prao jât êchtađơ. 14Khân păng ngơi ndrel đah ndrăng khân păng ma lĕ nau tât jêh. 15Dôl khân păng ngơi jêh ri tâm rlăch, Brah Yêsu hăn dăch jêh ri hăn ndrel ma khân păng. 16Ƀiălah măt khân păng bu nkŭm jêh, mâu gĭt năl Brah Yêsu ôh. 17Păng lah ma khân păng: “Moh nau khân may tâm nchră dôl hăn trong?” Khân păng nsrŭng ma nau rngot. 18Du huê tâm bar bunuyh, amoh păng Y-Klêôpas plơ̆ lah: “Di lĕ knŏng êng may jêng bu năch gŭ ta ƀon Yêrusalem mâu gĭt lĕ nau tât jêh ta nây tâm bar pe nar pa năp nơh?” 19Brah Yêsu ôp: “Moh nau tât?” Khân păng plơ̆ lah: “Nây jêng nau tât jêh ma Brah Yêsu bunuyh Nasaret, du huê nơm mbơh lor geh nau brah tâm kan jêh ri tâm nau ngơi tanăp Brah Ndu jêh ri lĕ phung ƀon lan, 20ƀiălah mâu gĭt mâm dĭng phung kôranh ƀư brah toyh jêh ri phung kôranh chiă uănh hên jao jêh Păng gay bu nkhĭt jêh ri pâng Păng ma kđĭn klơ si tâm rkăng. 21Hên kâp gân Păng jêng Nơm mra tâm chuai phung Israel. Nđâp tơlah nau nây hŏ tât geh dơi pe nar jêh. 22Rlau lơn ma nĕ, geh ƀaƀă phung bu ur tâm phung hên hŏ ƀư jêh ma hên hih rhâl ngăn: Nôk ƀhit ang bri hôm ngo, khân păng hăn tât ta môch 23ƀiălah mâu hôm saơ săk jăn Păng ôh jêh ri khân păng plơ̆ sĭt lah pô aơ geh tông mpăr tâm mpơl gay mbơh lah Păng gŭ rêh. 24Geh ƀaƀă tâm phung hên đŏng hăn chop jêh ta môch jêh ri saơ lĕ nau di tâm ban ma phung bu ur mbơh jêh, ƀiălah khân păng mâu hôm saơ Brah Yêsu ôh.” 25Nôk nây Brah Yêsu lah ma khân păng: “Nanê̆ ngăn khân may rluk mâl jêh ri geh nuih n'hâm băt chroh lĕ nau phung nơm mbơh lor hŏ lah! 26Mâu di hĕ Brah Krist dơn lĕ nau nđêh nji tâm ban pônây jêh nây Păng hăn lăp tâm nau chrêk rmah Păng?” 27Jêh nây ntơm tă bơh Y-Môis tât ma lĕ rngôch phung nơm mbơh lor, Păng rblang ma khân păng lĕ nau knŏng ma Păng tâm lĕ Nau Brah Ndu Ngơi.

28Tơlah bar oh mon dăch tât jêh ta ƀon jê̆ jê̆ khân păng ŭch hăn, Brah Yêsu mĭn ŭch hăn ngai lơn đŏng. 29Ƀiălah khân păng nchâp Păng: “Gŭ ndrel ma hên, yorlah trôk hŏ kêng mhaơ jêh ri nar dăch kêng măng jêh.” Pôri, Păng lăp gŭ ndrel ma khân păng. 30Dôl Brah Yêsu gŭ sông sa ndrel ma khân păng, Păng sŏk piăng let, lah ueh jêh ri nkê̆ch pă ăn ma phung nây. 31Dôl nây măt khân păng pơk jêh ri khân păng gĭt năl Păng, ƀiălah du roh ro. 32Bar hê tâm ngơi ndrăng khân păng nơm: “Tâm nôk hăn trong, Păng nkoch bri jêh ri rblang kloh rah vah Nau Brah Ndu Ngơi ma hên, nuih n'hâm he duh nâm bu su hit lĕ ƀơh?” 33Ta mông nây, khân păng dâk ro plơ̆ sĭt ta ƀon Yêrusalem, tâm mâp đah jât ma nguay kôranh oh mon ndrel ma phung oh mon êng tâm rgum, 34jêh ri lah: “Kôranh Brah dâk rêh tay ngăn jêh ri tâm mpơl jêh đah Y-Simôn!” 35Jêh nây bar hê oh mon nkoch bri nau tât jêh tâm nôk rŏ trong jêh ri khân păng gĭt năl Brah Yêsu dôl Păng nkê̆ch piăng let mâm nau.

Brah Yêsu tâm mpơl đah jât ma nguay kôranh oh mon

(Mathiơ 28:16-20; Markôs 16:14-18; Yôhan 20:19-23; Kan Kôranh Oh Mon 1:6-8)

36Dôl bar hê oh mon ngơi ma lĕ nau nây, Brah Yêsu nơm tâm mpơl ta nklang khân păng jêh ri lah: “Ăn nau đăp mpăn gŭ ndrel ma khân may!”#24:36 Geh ƀaƀă nau rblang ntơm saơm mâu geh lĕ rplay samƀŭt: jêh ri lah: “Nau đăp mpăn ma khân may!” 37Phung oh mon klach jêh ri hih rhâl ngăn, mĭn saơ brah huêng. 38Brah Yêsu lah: “Mâm ƀư khân may rŭng răng jêh ri nuih n'hâm khân may ăt hôm vĭ vĕ pônây? 39Uănh hom ti jêh ri jâng Gâp, nanê̆ ngăn Gâp nơm yơh! Pah bi hom ta Gâp jêh ri uănh! Brah huêng mâu geh nglay săk mâu lah nting ôh, ƀiălah khân may saơ Gâp geh!” 40Dôl lah lôch jêh, Păng yơr ti jêh ri jâng Păng ma khân păng uănh.#24:40 Geh ƀaƀă nau rblang ntơm saơm mâu geh trong 40. 41Tâm dôl phung oh mon ê hŏ chroh yorlah răm maak rlau ir jêh ri hih rhâl, ri mơ Păng lah ma khân păng: “Khân may geh lĕ ndơ sa ta aơ mâu lah mâu?” 42Phung oh mon nhhơr ma Păng du rngơl ka gŭch. 43Păng sŏk jêh ri sa tanăp khân păng.

44Brah Yêsu lah: “Aơ jêng lĕ nau Gâp hŏ ntăm jêh ma khân may, dôl Gâp hôm gŭ ndrel ma khân may: Lĕ nau bu nchih ma Gâp tâm Nau Vay Y-Môis, tâm lĕ ndrom samƀŭt Mbơh Lor, jêh ri tâm ndrom samƀŭt Nau Mprơ Ơm dơi tât di ngăn.” 45Nôk nây, Păng pơk nau mĭn ma phung oh mon gay gĭt vât Nau Brah Ndu Ngơi. 46Păng lah: “Geh nau bu nchih jêh ma Brah Krist dơn nau nđêh nji, tât nar rơh pe mra dâk rêh tay tă bơh nau khĭt; 47bu sŏk amoh Păng gay mbơh nkoch ma lĕ rngôch bri dak ma nau rmal tih gay dơi nau yô̆ an ma nau tih, ntơm bơh ƀon Yêrusalem. 48Khân may jêng phung nơm mbơh ma lĕ nau nây. Gâp aơ, mra ăn ma khân may nau Mbơ̆ Gâp hŏ ton jêh; 49bi ma khân may, gŭ kâp hom tâm ƀon tât khân may dơi nsoh jêh nau brah tă bơh klơ.”#Kan 1:4.

Nau Brah Yêsu hao sĭt ta klơ

(Markôs 16:19,20; Kan Kôranh Oh Mon 1:9-11)

50Pakơi nây, Păng leo phung oh mon văch dăch ƀon Bêthani jêh ri păng yơr ti klơ ăn nau ueh uĭn ma khân păng.#Kan 1:9-11. 51Dôl ăn nau ueh uĭn, Păng du tă bơh phung oh mon jêh ri dơi djôt leo hao klơ trôk.#24:51 Geh ƀaƀă nau rblang ntơm saơm mâu geh trong: jêh ri dơi djôt leo hao ta klơ trôk. 52Phung oh mon yơk mbah ma Brah Yêsu, jêh nây khân păng plơ̆ sĭt ta ƀon Yêrusalem bêng ma nau răm maak. 53Khân păng gŭ tay tâm ngih brah, tâm rnê ma Brah Ndu.

Currently Selected:

Luka 24: CMO2023

Highlight

Copy