Genesis 16
16
Ega No Isimeli
1Sinani Serai, quolekutae te Abarami, kama vapuodovo koyna oye ka so. Ba oye sa zari keike ona quole nabulu ni Ijipi, taritongo Ega. 2Sa voy goyti Serai te kue Abarami, <<Vanata! Iaova sa sedeni aqo ro me vapuodo so. Zo la mo pam koype qo quole nabulu; moyna aro ko majala vapuoro keike tunitatama te kue oye,>> sa voy.
Abarami sa kuritini pita Serai sa soyna. 3Rokusua sada Abarami sa kuo mano ave te vodu ni Kenani, Serai ona quolekutae Abarami sa kinikini ona quole nabulu ni Ijipi no sa la koyna Abarami me ona quolekutae. 4Sada Abarami sa pam koype Ega, no Ega sa iro so. Sada Ega sa mia utini oye sa iro so, oye sa touto mia vajele Serai ona quole buoe.
5Sinani Serai sa soynani Abarami, <<Te mo soli re soy aro ko tepere pita goyti. Aro ko koyna amo re qo nabulu, no sinani oye sa mia utini oye sa iro so, oye sa mia vajele aqo ro. Iaova to me aratanaeni amo re no aro soy,>> sa voy.
6Abarami sa vatavele la te kue Serai, <<Mia! oye aba sa mo nabulu to re, mo joyjuni to ka pita sa majala noyi te kue re.>> Sinani Serai sa vatakani Ega; no Ega sa paki kesini oye.
7Matizana te Iaova sa tepere Ega vatanga te malavuala te kadalesana; goyti malavuala sa kuo te tavelea zoka sa zo voy la Soya. 8No sa voy goyti oye, <<Ega, nabulu te Serai, be ko tae me, no be mo lae ko voy re ne?>> Sa voy.
Oye sa vatavele la, <<Aro ko poykini qo quole buoe Serai,>> sa voy.
9Matizana te Iaova sa soynani oye, <<Mo vele napu la te kue mo quole buoe no mo la kuo te sarajouloa karapota te oye,>> sa voy. 10No sa voy vele goyti matizana te Iaova te kue oye, <<Aro me vazadeve oyra sokutu arasumam re, moyra taba sua me taka ngeae oyra,>> sa voy.
11Matizana te Iaova sa soynani vele oye:
<<Mia! Re ko araero,
No re mo vapuodo keike tomleike.
Re mo vataritengeni oye Isimeli,
Bati Iaova sa ase qilam re sada ko kuo taka.#16.11 Te ngelu ni Iburu lolopua taritongo Isimeli ne Bangara sa ase.
12Oye me seva keike dongki peru te kue boysi;
Oye me kanani oyra taba,
No ora moyra kanani oye,
No oye me kuo vaoyle to tani,
Te kue oyra likae.>>
13Ega sa vataritingini Iaova sa vakingiere oye: <<Re Bangara ko mia aqo ro,>> bati sa voy goyti oye <<Aro sinani ko mia oye sa mia aqo,>> sa voy. 14Ta sa voy soy, ka kelikini bi quara sa kuo te arakaluoboroa Kadese no Beredi, Bia Lahai Roi.#16.14 Te ngelu ni Iburu lolopoa ngeoro Bia Lahai Roi ne bi quara te Bangara tu, oye sa mia aqo.
15Ega sa vapuodo koyna Abarami toytuleike, no Abarami sa vataritengeni Isimeli toytuleike sa vapuodo koyna oye Ega. 16Abarami sa viungulu- unomo avea, sada Ega sa vapuodo koyna oye Isimeli.
Currently Selected:
Genesis 16: BAA
Highlight
Share
Copy
Want to have your highlights saved across all your devices? Sign up or sign in
© 2024, Islands Bible Ministries. All rights reserved.
