Genesis 38
38
Juda no Tama
1Te sada ta, Juda sa kesini oyra likae no oye sa zo juolo la no sa la kuo koype keike boysi ni Adulami ka kelikini Hira. 2Te ngoyni noyene Juda sa mia ni toytuquole keike boysi ni Kenani ka kelikini Sua. Juda sa pale oye no sa vakapoyto oye, 3oye sa iro so no sa vapuodo keike toytuleike, oye sa vataritingini Oy. 4Oye sa araero napu no sa vapuodo keike toytuleike no oye sa vataritingini oye Onani. 5Oye sa vapuodo noypo vele keike toytuleike no oye sa vataritingini oye Sela. No oyra ka kuo te kumala ni Kezibi sada oye sa vapuodo oye.
6Juda sa pale koyna Oy, ona soleike puodo kinaka oye keike quole no toritongoa oye Tama. 7Ba Oy, soleike puodo kinaka te Juda, sa boysi roka kama vakolani vo Iaova; si Iaova sa voyevale oye.
8Sa voy goyti Juda te kue Onani, <<Re mo la vakapoyto nabokoa likam no mo toyro so te kue oye saseva tamana sa soyna, soy re mo vapuodo koyna likam sokutu arasumae.>> 9Ba Onani sa utini, oyra so moyra puodo me te kue Tama kama majala vo oye me tungene vatasuku, sa voy ta oye, te oyra sada oye sa la vakapoyto nabokoa likae, oye sa vajelesia lukae te lua, soy taka likae me zari sumae. 10Ba Iaova kama kemani vo pita roka oye sa joyjuni si, Iaova sa voyevale noypo oye.
11Sa voy goyti Juda te kue Tama ravae quole oye, <<Re mo vele la te toke te tamam no mo la kuo sa seva naboko me doka sada toquleike ro Sela me kaji.>> Oye sa noyne pita goyti bati, <<Moyna voy Sela sa lei napu seva oyru likae.>> Si Tama sa vele sa la kuo te toke te tamae.
12Sa muini sada ona quolekutae Juda, toytuquole Sua sa lei. Sada Juda sa beito ona sadae noyqata, oye sa zola Timana, ngoyni oyra boysi jaju ka potini voyrangae ona sipi, no ona kenao oye Hira boysi ni Adulamu sa zo koype oye.
13Sada oyra ka soynani Tama, <<Vanata! Ravam sa zola Timana soy me pote voyrangae oyra ona sipi,>> 14Tama sa soka oyra ona bubute ni naboko, sa sapinini tarakenakae sapunu voy kareo ka boysi me mia utini oye, no sa la tongunu te mataqamanae kumala ni Enaimu, te zoka sa zo voy la Timana. Bati oye sa mia, Sela kati kaji, ba Juda kama varekini vo oye, me ona quolekutae.
15Sada Juda sa mia oye, oye sa nanana oye sa quole aravabu, bati sa sapene tarakenakae. 16Oye kama mia utini vo quole goyti sa ravae, oye sa zo la te kue quole te tavelea zoka no sa voy goyti, <<Zo me, aro me vakapoymo amo re,>> sa voy.
<< Ata pita re mo koyna aqo ro sada ko vakapoymo amo ne?>> Sa voy.
17Juda sa vatavele la, <<Aro me peqani latu keike toytu qoti te qo vau,>> sa voy.
Savoy goyti quole, <<Ata pita re mo kea aqo ro me seva lalae pui me doka sada re mo peqani me toytu qoti ne?>> Sa voy.
18Juda sa tanani oye, <<Ata pita me lalae pui aro me koyna amo re ne?>> Sa voy. <<Kea aqo ro mo kakalu sa kue ritongom, no puru re ko pale toyro te koyrisim,>> sa voy. Si Juda sa koyna oye, no sa vakapoymo oye, no sa vaironi oye so.
19Sada Tama sa sipele vele la, oye sa pale kesini sapunu, no sa vapoka noypo oyra ona bubute naboko.
20Sa doka sada Juda sa peqani la toytu qoti te kue boysi ni Adulama voy me la pale velini pati te kue quole, ba oye kama la mia vo oye. 21Oye sa tanani oyra leike ka kuo te ngoyni noyene, <<Be sa kue quole aravabu sa kuo goyti te tavelea zoka ni Enaimu ne?>> sa voy.
Oyra ka vatavele la, <<Kareo ka quole aravabu goyti>> ka voy.
22Si, oye sa vele napu la te kue Juda no sa voy goyti, <<Aro kama la mia qo oye. Oyra leike ka kuo te ngoyni noyene ka voy vele, <Kareo ka quole aravabu te ngoyni goyti,> >> sa voy.
23Sa voy goyti Juda, <<Sa noyi to me pale to ona oye oyra pita, mana voy ka bire itu oyra boysi. Vanata! Aro ko peqani la te kue oye toytu qoti, ba re kama la mia mo oye,>> sa voy.
24Sa paqolo soypa tulu ukene Juda sa pale vatana, <<Ravam Tama sa zaqala sa seva quole aravabu, no sinani oye sa araero,>> ka voy.
Savoy goyti Juda, <<Koype vajele la oye no mam la sebe vale oye!>>
25Sada oyra ka la koype vajele oye, Tama sa peqani la vatana te kue ravae. <<Aro ko iro so te kue leike sa tungene oyra pita goyti,>> sa voy. No oye sa voy vele goyti, <<Me mo mia, moyna re mo mia utini ada sa tungene kakalu sa kue ritongo no puru goyti,>> sa voy.
26Juda sa mia utini oyra pita ta no sa voy, <<Oye sa tutungono koyini aqo ro, bati aro kama koyna qo oye toquleike Sela.>> No Juda kama vakapoymo noypo vele vo oye.
27Sa voto sada oye me puodopuodo, keri soleike vaqe kuru kuo te pipisia oye. 28Sada oye sa puodopuodo, keike te oyru sa vajele kineke me koyrisi; si, quole aramitoyke te puodopuodo sa pale tereti mesiri no sa poyka te tapoydoa koyrisi no sa voy, <<Oye goyti sa juolo kinaka me.>> 29Ba sada oye sa vavelini la koyrisi, da soy likae oye sa juolo kinaka, no oye sa voy, <<Sa seva goyti re ko lopa me zoka!>> No oye ka vataritingini oye Perezi. 30Sinani likae, oye sa kue tereti mesiri te tapoydoa koyrisi sa juolo me, no oye ka vataritingini Zera.
Currently Selected:
Genesis 38: BAA
Highlight
Share
Compare
Copy
Want to have your highlights saved across all your devices? Sign up or sign in
© 2024, Islands Bible Ministries. All rights reserved.
