1 Koriniti 12
12
Ira na vaivana tana Gagala Tabuna
1Ego na veveidi ira na vaivana tana Gagala sa, ka visa tavitiqu, ara qake nyoroguanigou ko bu suvere kole rurura pana kalena isa. 2Qu tei gigilaimiu tu agou sa totonai qu korapa toania na toa karovona perangaina sa qu tatotoni vapiru sagou ko qu vatarasaeria sira na beku kepore dia toa. 3Ko sa vei sa ara qa nyoguanigou ko mu gigilai agou sa kepore sa kai tinoni sa tatoni pana Gagalana na Tamasa mina paranga <<I Jisu mi taleleve!>> minagu, beto ko kepore sa kai tinoni mina paranga <<I Jisu sa na Bangara>> minagu vei minake tatoni tana na Gagala Tabuna sisa.
4Ego qai okokoto sira na vaivana, ba kai muqisi Gagala gu sa valameria sa dorudi. 5Qai okokoto sira na roiti ninabulu, ba kai muqisi Bangara gu sa sa tanabulu. 6Qai okokoto sira na boboka pana roiti ninabulu, ba kai muqisi na Tamasa gu sa vaniria na boboka sira na tinoni ko qai boka roiti. 7Qai okoto taiania ira doru tinoni sa na vatadogorona na somana tana Gagala ko ira doru pa ekelesia mai tatoka. 8Tana kame na Gagala sa vania na boboka ko sa paranga votunia na paranga tavagigalana, goto tana kai goto sa kai muqisi Gagala tugu isa sa vania na boboka ko sa paranga votunia na paranga gigalaina. 9Tana kame sa kai muqisi Gagala tugu isa sa vania na rarange, goto tana kai goto sa kai Gagala tugu isa sa vania sa na vaivana pana vaisalana. 10Tana kame na Gagala sa vania na boboka pana roitidi na roiti vaivagabaradi, tana kai goto sa vania na boboka ko sa ule votunia na nongoro tana Tamasa, tana kai goto sa vania na boboka ko sa doro pikataria na gagala ikeredi na jongadi, tana kai goto sa vania na boboka ko sa parangania na paranga gotona, beto tana kame sa vania na boboka ko sa boka ruvatia na ginuana na paranga gotona. 11Ba ira dorudi aipira sa isa tugu kai muqisi Gagala sa roitiniria, ko isa tu sa okokoto ia veiniria isa sa nyoroguania isa sira na tinoni.
Kai tini ba soku okokoto kokobu tinina
12Na tini tinoni sa kame gu ba sa soku okokoto kobuna. Ko sa soku okokoto kobuna sa na tini ba kai tini gu sisa. Ko na Karisito ba sa kai muqisi podeke vei tugu isa. 13Ura kai Gagala gu taqe tapaputaisonia ko kai tini gu sa gita doru, bi tinoni Jiu babi na tinoni karovodi, bi pinausu babi na tinoni taruvatana. Beto ko gita doru sa na Tamasa sa vanigita kai muqisi Gagala gu.
14Ura na tini sa nake kai kobu tini gu, ba soku okokoto kokobu tini tu. 15Vei bi paranga sa na nene, <<Ara sa nake lima, ko sa vei isa sa nake tana na tini sara,>> biu, poni sa ba nake pana ginugua vei isa sa na nene sa nake ona na tini. 16Beto bi paranga sa na talingi, <<Ara sa nake mata, ko sa vei isa sa nake tana na tini sara,>> biu, poni sa ba nake pana ginugua vei isa sa na talingi sa nake ona na tini. 17Vei na tini doruna sa bi gagale mata gu, poni sa ai mina vei mina boka nonongoro? Vei na tini doruna sa bi gagale talingi gu, poni sa ai mina vei mina boka umumanga? 18Ba na Tamasa tu sa vakoleria pana tini sira na kokobu tini, ko sa vakole veiniria tugu isa sa nyoroguania isa. 19Vei bi gagale kai memeka kobu tini gu sa na tini, poni sa kode mina kepore sa na tini! 20Goto qai soku sira na kokobu tini ba kame gu sa na tini.
21Ko na mata minake boka paranga lao vei pira tana lima, <<Kepore mua vaitokai sao ko qake nyoroguanigo!>> minakeu. Beto na batu minake boka paranga lao vei pira tana nene, <<Kepore mua vaitokai sao ko qake nyoroguanigo!>> minakeu. 22Goto ira tu na kobu tini qai doro vei qai munyala sa taqeke gona paleria. 23Beto ko ira tu na kokobu tini qaike loka poreveveidi sa taqe vaporeveveinaria, ira na kobu tini qaike tavavotu goboro sa taqe popoko vapae vataleria, 24ko taqe kopu mamadi vatale jolaniria ira na kokobu tini qaike kilu tavapae. Ba na Tamasa tu sa aru vaikamu veinia ina sa na tini ko qai tavaporeveveina sira na kokobu tini qaike loka poreveveidi, 25ko mi kepore sa na vaipikatai pana tini, goto ira doru okokoto kobuna sa mai mekarai vaikopu vatale. 26Ko vei bi gosoria na vitigi sa kai kobu tini, sa doru kobu tini sa qai mekarai vitigi tugu. Vei bi tavatarasae sa kai kobu tini, poni sa doru kobu tini sa qai mekarai qeqera tugu.
27Agou sa na tinina na Karisito ko na okokoto kokobuna isa sagou. 28Ko na Tamasa sa tei vakoleria tu pana ekelesia sira, momoe na tinoni tagarunudi, vinarua ira qai ule votunia na nongoro tana Tamasa, vinaue ira na tinoni vaivagigalai, beto ira qai boka roitiniria na roiti vaivagabaradi, ira qai isongia na vaivana vaisalana, ira na tinoni vaitokai, ira na tinoni totoli, ira qai isongia na vaivana ko qai boka parangania na paranga gotona. 29Ba nake ira doru sa na tinoni kokorotai. Nake ira doru sa qai ule votunia na nongoro tana Tamasa. Nake ira doru sa qai vaivagigalai. Nake ira doru sa qai boka roitiniria na roiti vaivagabaradi. 30Nake ira doru sa qai isongia na vaivana vaisalana. Nake ira doru sa qai isongia na vaivana ko qai boka parangania na paranga gotona. Nake ira doru sa qai ruruvatia na paranga gotona. 31Agou qu nyaqo vivitigiria ira na vaivana poreveveidi, ko ara ma vadogoronigou ropi kai soana isa sa vavagua jola vivitigi.
Currently Selected:
1 Koriniti 12: LGA
Highlight
Copy
Compare
Share
Want to have your highlights saved across all your devices? Sign up or sign in
© 2024, Islands Bible Ministries. All rights reserved.