1 Koriniti 2
2
Na nongorona na Karisito sa tavamate pa korosi
1Ka visa tavitiqu, ara tonai qa lame tamugou sa qake lame taraenia pana paranga vavagegoai lalavatadi babi pana gigalai tomedi sa na gigalai golomona na veveina na Tamasa. 2Ura ara qa vatoqo vatalea pa roququ ko kepore mule sa kai sa qa nyorogua gigilai tonai qa suvere tavitigou agou goto na veveina gu i Jisu na Karisito, isa na Karisito sa tavamate pa korosi. 3Ko ara tonai qa lame tamugou sa qa munyala, beto qa matagutu ko qa neneqere. 4Ko na qua paranga beto na tarae sa sake koko lame vei pana paranga gigalaidi ko vei ko bu vasosotosiu agou qakeu, goto sa tadogoro votu na sosotona ura na neqi tana Gagala tana Tamasa sa tabata votu. 5Ko sa vei sa na rarange tamugou sake togasa pana gigalai tana tinoni goto pana neqi tu tana Tamasa.
Na gigalai tana Tamasa
6Ba kai gigalai tugu sa qe vavakatonia agei pana tadira qai matua pana rarange. Ba na gigalai isa sa nake gigalai tadira pa kasia gusu api babi tadira poredia neqi pana kasia gusu api, ira kode mai mumuridia. 7Goto agei sa na gigalai tana Tamasa qe vavakatonia sa isa na gigalai golomona tana Tamasa. Na tagolomo kolena sisa ba na Tamasa sa tei nguti vakolea tu tonai sa oqoro taroiti na kasia gusu ko na gigalai golomona sa na valavatadagita sau. 8Kepore ira sa poredia neqi pa kasia gusu bai gigilai na veveina sa na gigalai golomona api, ura vei bai gigilaidia ira poni sa baike vamatea ira pa korosi sa na Bangara lavata. 9Ba pira tei sau tu sa na Kukuti Tabuna,
<<Na sakasa sake doro kamua na mata
beto sake nongoria na talingi,
beto ko sake rove kamua pa roquna na tinoni,
sa isa tugu sa sa vanaqiti vaniria na Tamasa
ira qai roroqua isa,>>#Aisea 64.4; 52.15. sau.
10Na Tamasa sa garunia sa na ona Gagala ko isa sa tei vakabere vanigita tu sa na ona gigalai golomona. Ura na Gagala sa nyaqo votuniria doru sakasa, tataviti vei tugu na sakasa koridi tana Tamasa. 11Ira na tinoni qaike gigilai sa doru veveina kai goto tinoni goto na gagalana gu mekana na tinoni isa sa sa gigilai. Ko sa vei sa doruna veveina na Tamasa ba kepore tugu kame sa gigilai goto na Gagalana gu mekana na Tamasa. 12Ba gita sa nake gagala tana kasia gusu sa taqe tekua goto isa tu na Gagala sa koko lame pana tana Tamasa, ko sa vei sa taqe gigila vataleria sira na vaivana sa vanigita na Tamasa. 13Beto ko na vaivana pira sa qe vavakatoniria agei nake pana vaivagigalai tomedi tadira na tinoni gigalai goto pana vaivagigalai tu tana Gagala, tonai qe vilasa vakabereria sira na vaivagigalai sosotodi tana Gagala. 14Na tinoni sake isongia na Gagala sa sake boka tekuria sira na vaivana tana Tamasa. Qai kepore veveidi sosoto pana tana sira beto sake boka doro vakabereria, ura na sakasa ira sa qai boka tadoro vakabere tonai sa isongia gu na Gagala na tinoni. 15Na tinoni sa isongia na Gagala sa boka doro vilotoria ai na poreveveidi vei doru sakasa, ba ira na goto tinoni sa maike boka doro vilotia sisa mekana. 16Ura pira sau sa na Kukuti Tabuna,
<<I sei sa tei tomea mai tu sa na roquna na Bangara?
I sei sa tei vavanaua mai tu sisa?>> sau.#Aisea 40.13; Romu 11.34.
Ba gita sa taqe tei isongia tu sa na roquna na Karisito.
Currently Selected:
1 Koriniti 2: LGA
Highlight
Copy
Compare
Share
Want to have your highlights saved across all your devices? Sign up or sign in
© 2024, Islands Bible Ministries. All rights reserved.