2 Koriniti 4
4
Nake munyalana sa na taraenia na nongoro jongana
1Ko inara sa vei sa agei qeke munyala ura na Tamasa tu sa roroqu tokanigei ko sa vanigei sa na roiti ninabulu api. 2Goto agei qe dainiriamei sira na uana vaivakea golomodi, ko qeke toania na uana sesekena beto qeke bei vapirua sa na paranga tana Tamasa. Goto qe poja lodakia gu agei sa na sosoto, ko na monanadi ira na tinoni mai rangegei pa moena na Tamasa qeu. 3Ba vei bi pae sa na nongoro jongana tamigei, sa pana tadira qai muma gu sa pae sisa. 4Ira na tinoni ira sa qaike vasosoto ura na tamasa ikerena pana kasia gusu api sa valeqai na roqudi, ko qaike batia sa na kaberena na nongoro jongana na veveina na malakapina na Karisito, isa na kirena na Tamasa. 5Ura agei nake veveimei mekamei sa qe taraenia, goto na veveina i Jisu Karisito tu isa na Bangara. Goto agei mekamei sa na nabulu gu tamugou pana mei somana kole kame tana Karisito. 6Ura isa tugu na Tamasa sa paranga, <<Na kabere sa mi tolanga votu lame vei tu pana rodomo!>> sau, sa isa tugu sa na Tamasa sa tolanga pa bulomei, ko sa vanigei na kaberena na gigalaina na malakapina na Tamasa pa moena na Karisito.
7Ba agei sa qe vei na raro sa taroiti pana nyelaka ko sa kolea na isisongo poreveveina api, ko sa tadogoro sa na neqi lavatana sa sa koko vei tu tana Tamasa goto nake tamigei. 8Qe tavatapata pa doru soana sagei, ba qeke tanono vagore sosoto; qe rura tugu, ba qeke vaivasevi sosoto; 9qe takomiti, ba qeke taloa pale; qe tavavukele tugu, ba qeke tavaaboro puta sosoto. 10Doru totoso qe pogosia pa tinimei agei sa na mate ti Jisu, ko na toa ti Jisu sa mi bola votu pa tinimei. 11Pana mei toa agei doru totoso sa qe kole alala lao vei gu pa mate pa laena i Jisu, ko na toa ti Jisu mi bola votu pana tinimei isa sa boka manyaona. 12Ko na mate sa sa korapa roiti pana tamigei, ba tamugou na toa sa sa korapa roiti.
13Pira sau sa kai kukuti, <<Qa vasosoto ko sa vei sa qa paranga!>> sau. Ko pana kai muqisi uana vei isa sa agei ba qe vasosoto ko vei sa qe paranga. 14Ura qe gigilaimei sa na Tamasa, isa sa vaturu mulea pana toa na Bangara i Jisu sa isa tugu sa mina vaturu mulegei sagei pana mei kole kame tavitia i Jisu beto mina mekarai vaikamu tavitinigei agou pana moena isa. 15Ura dorudi aipira sa na tokamiu agou, ko totonai na vairoqu tana Tamasa mi kamu poni sa mai pugele nyonyoania ira sa na paranga jongana sa valavatia na Tamasa.
Na toa pana rarange
16Ko inara sa vei sa agei qeke boka tavamunyala. Sosoto na tinimei pa peguruna sa korapa lelu gore, ba na gagalamei sa sa tavakorega doru rane. 17Na tapata ikikete beto na aputaidi taqe gosororia aipira sa qai korapa vanaqitinigei agei sa na kabere kole jolana sa jolania doru tapata qe gigilaria kopira. 18Ko gita taqeke dogoro laoria sira na sakasa qai boka tabata goto ira tu na sakasa qaike tabata. Ura ira na sakasa qai tabata sa qaike kole sovai, goto ira na sakasava qaike tabata tu sa qai kole jola.
Currently Selected:
2 Koriniti 4: LGA
Highlight
Copy
Compare
Share
Want to have your highlights saved across all your devices? Sign up or sign in
© 2024, Islands Bible Ministries. All rights reserved.