2 Koriniti 6
6
1Agei qe roiti tavitia na Tamasa sagei, ko sa vei sa qe tepa vivitigigou sagou qu tei isongia tu na vairoqu vaialona tana Tamasa ko muke doro vagoboria sa na vairoqu vaialona isa. 2Ura pira sau sa na Tamasa,
<<Pana totoso tavilena ara qa nongorigo sao,
beto ko pana rane inaalo qa tokanigo sao,>> sau.#Aisea 49.8.
Mu vainongoro ko! Kopira tugu sa na totoso tavilena. Mu vainongoro ko! Kopira tugu sa na rane inaalo. 3Agei qeke roitinia kai sa bai tatupenia ira na tinoni, ko kepore sa kai sela mi tabata pana mei roiti ninabulu qeu. 4Goto doruna mei uana sa agei qe vatadogoronia sa agei sa na nabulu tana Tamasa pana turu vangajudi ira na tapata qe gosororia, na vitigi, na tapata beto na takulanga. 5Qe tapiqolo, qe tavatome pa ruma vaipiu beto qe tarapata. Qe roiti mamalagoso beto qeke teteku vatale na minere vatale. 6Pana mei uana liosona, na mei gigalai, na mei vera vamomoso, na mei tokana na goto tinoni, pana Gagala Tabuna, na mei vairoqu sosotona, 7pana nongoro sosotona, beto pana neqi tana Tamasa sa qe vatadogoronia na nabulu tana Tamasa sagei. Na toa tuvisina sa vanigei na Tamasa qe nanaqe vaikalenigei beto qe vaiperania. 8Kaki tinoni qai pangaganigei, goto kaki qai vakeagei. Kaki tinoni qai vavaledenigei, goto kaki tinoni qai vatarasaegei. Kaki tinoni qai jutunigei na tinoni sesekemiu qarigunigei, ba agei qe pojai gu sa isa sa sosoto. 9Qeke tadoro gigila tadira kaki, ba agei qe tagigila vatale gu tadira doru, qe tadoro vei kale qe tei mate tu, ba mu doriamiu gu sa agei qe korapa toamei. Qe tangangulu ba qeke tavamate. 10Qai vatakulangagei, ba qe qeqera lao gu. Qe golaba, ba qe vaisisongoria pana rarange soku tinoni. Qe doro vei qeke isongia kai sava ba doru sakasava sa qe isongoria gu.
11Ka visa turamei pa Koriniti! Kepore kai sa be aru golomia pana mei paranga lao tamugou. Agou sa qu korapamiu pa bulomei agei! 12Nake agei sa qe aru mulenia na mei vairoqu lao tamugou, goto agou tu sa qu aru mulenia na miu vairoqu lame tamigei. 13Kopira ara ma paranga veinigou na qua koburu: na beina sa agou ba muke aru mulenia na miu vairoqu lame tamigei!
Muke toania na toa tadira qaike gigilai na Tamasa
14Muke mekarai roiti vaikamu tavitiria ira qaike vasosoto, ura ai mina vei sa na tuvisi beto na sela mai boka vaibaere? Babi ai mina vei na kabere beto na rodomo mai boka mekarai suvere vaikamu? 15Ai mina vei na Karisito beto i Beliali na tomate mai boka vaivaegonia na dia roroqu? Babi na sava sa qai mekarai vaiisongainia na tinoni sa vasosoto beto na tinoni sake vasosoto? 16Na sa sa qai mekarai vaivajonganania ira na zelepade madina tana Tamasa beto na beku? Ura gita sa na zelepade madina tana Tamasa toana, vei sa pojai Tamasa, pira sau,
<<Ara mana suvere beto mana kanoko pa vaikorapaidi,
ara mana dia Tamasa beto ira sa mai qua tinoni.#Jeremae 32.38; Izikeli 37.27.
17Ko inara sa vei sa mu votu taloa lame pana vaikorapaidi
beto mu pikata taloa pana tadira, sau sa na Bangara,
beto muke uliria sira qaike lioso,
beto ara mana vakamugou.#Aisea 52.11; Izikeli 20.34, 41; Dodogoro 18.
18Ara sa mina Tamamiu agou,
beto agou sa muna tuqu marene beto na tuqu rereko ara,
sau sa na Bangara na Tamasa vivana jola.>>#2 Samuela 7.14.
Currently Selected:
2 Koriniti 6: LGA
Highlight
Copy
Compare
Share
Want to have your highlights saved across all your devices? Sign up or sign in
© 2024, Islands Bible Ministries. All rights reserved.