Jone 4

I Jisu beto na Rereko Sameria

1Ego qai nongoronia ira na Parese sa i Jisu sa teku vasoku sepele beto ko sa paputaisoria soku tinoni jolaniria ira sa paputaisoria i Jone qarigu. 2(Ba i Jisu mekana sake vaipaputaiso sa, goto ira tu na ona sepele sa qai vei.) 3Ko totonai sa nongoria i Jisu inara qai paranga vei sira na tinoni, poni sa sa taloa pa Jiudia ko sa mule goreona pa Qalili sisa. 4Ko pa ona rerege mule pa Qalili sa rorovea sa mina jola vei tugu pa korapa ia pa Sameria sisa sau. 5Ko pa Sameria sa kamu pa kai gugusu lavata na isongona pa Suka, nake souna pa kobu peso ti Jekopi qi vania i Josepa na tuna.

6Ego na kolena tugu ketakoi sa na oqili pie takorina tai Jekopi, ko sa pavu talenia na kole rerege si Jisu ko sa toqona tugu pa keketai oqili pie isa. Ko na korapa rane sa totonai.

7Kai rereko pa Sameria sa sa lame ko mi nobu pie sau, poni sa paranga laoa i Jisu aza, <<Bu vanisiu iapeki buku qau,>> sau. 8(Totonai sa qai tei taloa riu tu pa gugusu sira nona sepele ko mai riu vaigagani qarigu.)

9Poni sa paranga sa na rereko Sameria, <<Ao na Jiu tu, goto ara na tinoni Sameria tu, ba ai sa vei qu korapa tu tepanisiu na pie sara?>> sau. (Ura pa dia tuti sa qaike mekarai teteku pa kai pepetani gagani babi qaike mekarai buku pa kai nonobuni pie sira na Jiu beto na Sameria.)

10Poni sa oea i Jisu sisa, pira saunia, <<Vei bu gigilai ao sisa na vaivana tana Tamasa beto ko i sei sisa sa korapa tepanigo na pie, sa bu tei tepani buku tu beto ko isa bi tei vanigo tu na pie vaivatoana sao,>> saunia.

11Poni sa paranga sa na rereko, <<Kepore na mua titinuna sao beto ko na dori kori gorena sa na oqili pie api. Ko pai muna tekunia ao sa na pie vaivatoana? 12Ao quke lavata jolania si Jekopi na tamamei agei, sa oko? I Jekopi tu sa sa vanigei na oqili pie api, ko isa mekana beto ira na tuna, na ona papausu sa qai buku beto tugu pa pie ina,>> saunia.

13Poni sa oea i Jisu sisa, pira saunia, <<Isa sa bukua na pie sa kole pa oqili pie api sa kode mina kidepe ligu gu sisa, 14goto isa mina bukua na pie mana vania ara sa minake isongo kidepe ligu. Ba na pie mana vania ara sa mina bubukala vuvugu sa pa bulona, ko mina bukala vania na toa kole jolana,>> sau si Jisu.

15Poni sa paranga sa na rereko, <<Bangara! Vei mu vanisiu tu ropi sa na pie isa, ko make kidepe ligu, beto make papavu lalame vutugu ligu pie lani,>> sau sa na rereko.

16Poni pira saunia i Jisu sisa, <<Mu lao, ko mu kukua na marenemu ko mu toni lamenia lani,>> saunia.

17Poni sa paranga sa na rereko, <<Koi, ara kepore marenequ!>> sau.

Poni pira saunia i Jisu sisa, <<Qu sotomua tugu sao tonai kepore marenequ qugu. 18Ura ira ka lima marene mai tu sa qu tei nanagoria tu ao, ko isa qu korapa nanagoa ao kopira sa nake marenemu sosoto ao sisa. Ko na sosotona gu sa qu pojai ao,>> sau si Jisu.

19Poni sa paranga sa na rereko, <<Bangara, kopira tu qa gigilai ara sa kai tinoni kokorotai sao! 20Ura ira na mei tite pa moa agei sa pa kubo tugu api sa qai vatarasaea na Tamasa, ba agou na tinoni Jiu sa qu paranga sa pa Jerusalema tu sa na ia tana vatarasaea gita na Tamasa qugu,>> sau sa na rereko.

21Poni sa parangia i Jisu sisa, <<Ago, mu vasosotoa sapi! Sa korapa lame sa na totoso totonai nake pa kubo api babi pa Jerusalema sa muna vatarasaenia agou sa na Tamada. 22Agou na tinoni Sameria sa quke gigila vatalea sisa qu korapa vatarasaea; goto agei na tinoni Jiu sa qe gigila vataleamei sisa qe vatarasaea, ura na inaalo sa sa votu lame vei tamigei tu na tinoni Jiu. 23Ba sa korapa lame sa na totoso ko kopira sa tei kamua tu sa na totoso isa, tonai ira na tinoni vatarasae sosoto sa mai vatarasaea pa gagala beto pa sosoto sa na Tamana. Isa sa na vinatarasae sosoto sa nyoroguania na Tamana. 24Na Tamasa sa na Gagala ko ira mai vatarasaea isa sa mai vatarasaea pa Gagala beto pa sosoto tu,>> sau.

25Poni sa paranga sa na rereko, <<Qa gigilaiqua ara sa kode mina lame sa na Mesaea (isa sa tagigala na Karisito), ko mina kamu tu isa sa mina ule vanigita sa doru sakasava,>> sau.

26Poni sa oe laoa i Jisu sisa, <<Ara tugu sisa, ara qa korapa parangigo kopira api sisa,>> saunia.

27Pana totoso tugu isa sa qai mule kamu sira na ona sepele ko qai gabarania sa qai mule batia sa korapa paparangia kai rereko isa. Ba kepore kame ira sa bi paranga, babi nanasa lao veinia pira, <<Koi, na sa qu nyoroguania?>> biunia na rereko isa, babi, <<Ai sa vei ko qu vavavakato tavitia tu na rereko ina sao?>> biunia si Jisu.

28Beto sa sa loa vakole pale na rereko sa na ona bogu pie, ko sa mule lao tu pa gugusu, ko sa parangaria sira na tinoni, 29<<Mei, lame! Mu dogoria kai tinoni sa pojanisiu doru qua toa qa roitiniria ara. Nake api tugu beka sa na Karisito?>> sau. 30Ko qai taloa pa gugusu ketakoi sira na tinoni ko qai votu lao tai Jisu.

31Totonai qai oqoro bola lame ira na tinoni pori sa qai kole gagarunia ira na sepele si Jisu, <<Rabi, mu teteku mai tu,>> qarigunia.

32Ba pira sauniria i Jisu sira, <<Ara sa koleona na qua tetekuna isa quke gigilai na veveina agou,>> sau.

33Poni qai podalai vavainanasa mekadi sira na sepele, <<Kaki tinoni beka qai tei pogoso kamu vania tu na tetekuna sisa?>> qarigu.

34Poni sa parangaria i Jisu sira, <<Na qua tetekuna sa ara ma vatabea gu na nyorogua tana isa sa garunusiu beto ma vaokotia sa na roiti tana. 35Pira qu paranga vei sagou, <Ka made popu gu sa sa kole beto mina kamu na totoso ababu,> qugu sagou. Ba mu vainongoro ko ma pojanigou ara: mu vaengaria na matamiu ko mu dogororia sira na inuma! Qai tei matua tu ko qai tei pada taabu tu sira na umuma! 36Na tinoni sa ababu sa sa tatabara beto sa pogoso vaikamuniria sira na vua ko mai tekua na toa jola, ko na tinoni sa umuma beto isa sa ababu sa mai mekarai qera beto.

37Ko sa sosoto gu sa na paranga pira sau, <Kai tinoni sa umuma beto kai goto tinoni tu sa ababu,> sau. 38Ara qa garunugou sagou ko qu riu abua sisa quke pavu talenia agou. Ira kaki tu qai pavu talenia sa na roiti, goto agou sa qu abua na vuana gu na pavu tadira goto tinoni,>> sau si Jisu.

39Ego ko kubo ira na tinoni Sameria pa gugusu isa sa qai vasosotoa si Jisu, tonai qai nongoria na ulule tana rereko isa, pira sau, <<Sa poja betonisiu sira doru roiti qa roitiniria ara,>> sau. 40Ko tonai qai lao kamua isa sira na tinoni Sameria, sa qai tepa vasosogo lao tana ko bi suvere iapeki mai tadira qarigu. Poni sa suvere ketakoi karu rane sisa. 41Ego ko na kubo jola mule sira na tinoni qai vasosoto tonai qai nongoria na paranga ti Jisu. 42Ko qai parangia sa na rereko, <<Kopira sa nake parangamu gu ao sa qe vasosotoa, goto kopira qe vasosoto ura qe batia beto qe nongoria mekamei sa isa tugu sosoto sa na inaalo pa kasia gusu,>> qarigu.

I Jisu sa Salania na Tuna Kai Iviva Qavuna

43Ego sa jola karu rane beto sa taloa ketakoi si Jisu, ko sa mule gore pa Qalili. 44(I Jisu mekana sa tei ululenia tu sa na tinoni kokorotai sa pa ona gugusu ketakoi sa lavata sae gu sa sake tatavaragua sauniria.) 45Ko totonai sa kamu pa Qalili sisa sa qai vatoga vatalea ira na tinoni ketakoi sisa, ura qai tei somanania tu ira sa na vavolo Alokata pa Jerusalema ko qai tei batiadia tu ira sira na sakasava sa roitiniria isa pa totoso vavolo isa.

46Ego sa gabala mule lame pa Kena pa Qalili si Jisu, ketakoi sa pelukuni vaini na kolo perangana. Ko na suverena tugu ketakoi sa kai iviva qavuna, sa mo na tuna marene pa Kepaniami. 47Ko sa nongoronia na iviva isa si Jisu sa tei taloa tu pa Jiudia ko sa gore vei tu pa Qalili qarigu, poni sa lao gosoria ko sa tepaia ko bi lao salania sa na tuna marene pa Kepaniami, ura sa tata sosoto mina mate sisa sau.

48Poni pira saunia i Jisu sisa, <<Agou sa qu nyorogua isongo batiria mai tu na roiti vinagigila beto na roiti vaivagabaradi beto sa bu vasosoto qugu,>> sau.

49Poni sa paranga sa na iviva isa, <<Bangara, mu siqarai tuti lame pinakoi sa oqoro mate na tuqu,>> sau.

50Poni sa parangia i Jisu sisa, <<Mu mule lao, na tumu marene sa kode mina toaona gu!>> saunia.

Poni sa vasosotoa tugu na iviva api sa na paranga ti Jisu ko sa mule riuona. 51Ko tonai sa korapa gogoreona isa sa qai gosoria pa soana sira na ona nabulu, ko qai pojania, <<Na tumu marene sa sa tei jonga tu,>> qarigunia.

52Poni sa nanasaria sira papada ai totoso sa vei sa podalai jonga sisa sauniria, poni pira qarigunia, <<Pada kai koloko korapa rane pa nyoro sa gore na mangini,>> qarigunia.

53Poni sa gigila kamua na iviva api sa isa tugu sa na totoso qi poja veinia pira i Jisu, <<Na tumu marene sa kode mina toaona gu,>> qiunia. Ko isa beto ira na ona tatamana doruna sa qai vasosotoa si Jisu.

54Api sa na roiti vinagigila vinarua sa roitinia i Jisu pa liguna sa taloa pa Jiudia ko sa gore pa Qalili.

Currently Selected:

Jone 4: LGA

Highlight

Copy