Luke 9

I Jisu sa Garunuria ira ka Manogarua Sepele

(Matiu 10.5-15; Maka 6.7-13)

1Ego sa kuku vaikamuniria i Jisu sira ka manogarua sepele, ko sa vaniria na neqi ko mai ijiju pale tomate ikikeredi beto mai salanaria sira sa vairia na mo sau. 2Beto sa garunuria tugu vei sira ko mai taraenia na binangara tana Tamasa, beto mai salanaria sira qai mo sauniria. 3Beto sa pira sauniria, <<Munake pogosia kai sa pa miu rerege lao, munake pogoso kolu opopatana, na mane, na besa, na poata beto ko munake pogoso varua soti. 4Ketakoi mai tavaragua vatogagou ko mai vasuveregou sa muna suvere gu pa ruma isa, tinganai muna taloa riu pa gugusu isa. 5Ketakoi maike tavaragua vatogagou ira na tinoni sa muna turu loa pale sa na gugusu isa. Tonai muna taloa riu sa muna tavusu paleria sa na kavuruna na peso pa gugusu isa qai ramata pa nenemiu. Ko isa sa na vinagigilana kode mina vakilasaria na Tamasa sira,>> sau sisa.

6Ego ko qai taloa riu sira na sepele, ko qai rerege lao pa doru gugugusu, qai taraenia na nongoro jongana beto qai salanaria sira qai mo pa doru eqa qai lao vei.

Na Rura ti Herodi

(Matiu 14.1-12; Maka 6.14-29)

7Ego totonai sa nongoronia i Herodi, na bangara pa Qalili, sira doru sakasava sa roitiniria i Jisu, sa sa rura betona sisa. Ura qai pojania ira kaki tinoni sa i Jone Paputaiso sa sa tei toa mule tu qarigu. 8Ira kaki mule sa qai paranga sa i Elaija sa sa tei bola tu qarigu, goto kaki ira sa qai paranga sa kame ira na tinoni kokorotai pa moa sa tei toa mule tu qarigu. 9Pira sau si Herodi, <<I Jone sa qa tei kujuku pale tu na batuna ara. Goto i sei sa na tinoni isa sa roitiniria doru ginugua qa nongoroniria aipira?>> sau sisa. Ko sa nyoguania isa ko bi batia si Jisu sau.

I Jisu sa Vatetekuria ira ka Lima Tina Tinoni

(Matiu 14.13-21; Maka 6.30-44; Jone 6.1-14)

10Ego tonai qai mule kamu sira na tinoni tagarunudi sa qai vavakato vania i Jisu sira doru sakasava qai roitiniria. Poni sa toniria isa sira ko qai lao pa kai ia kaloina pa kai gugusu na isongona pa Betiseda. 11Ba totonai qai gigilai ira na minete tinoni sa ketakoi sa lao vei, sa qai tuti laoia ira si Jisu. Poni sa vakamu vataleria tugu isa sira, sa taraenia tugu isa tadira sa na veveina na binangara tana Tamasa, beto ko sa salanaria tugu sira qai mo ko qai nyogua tasalana.

12Ego totonai sa podalai gore sa na vevelu, sa qai lao tana sira ka manogarua sepele ko pira qarigunia, <<Mu garunu variuria pa gugusu lalavata beto ikikete pa vailivutaina sira na tinoni mai, ko mai boka nyaqogadia gagani beto mai nyaqoa ketakoi mai puta. Ura na ia taqe korapa suveria api sa na qega ko sa kepore kai savana,>> qarigu.

13Poni pira sauniria i Jisu sira, <<Agou gu sa mu ianiria na tetekuna!>> sau.

Poni pira qarigu, <<Kepore mutugu sa kai sa be vagaroa goto isa tugu ka lima bereti beto karu igana momoqasadi gu sa qai kole pira! Ko ai vei? Qu nyoguanigei ao ko me lao vai vaniria na gagani agei sira na minete tinoni lavata pira?>> qarigu. 14(Ura sa papada vei ka lima tina sa na anyedi ira na marene gu.)

Poni sa pira sauniria i Jisu sira na ona sepele, <<Mu vatoqo okoto bobokoria sira na tinoni papada vei ka limangavulu pa kai pukuna,>> sau. 15Ego ko tonai qai beto vatoqo betoria ira na sepele sira na tinoni, 16sa sa tekuria i Jisu sa ka lima bereti beto karu igana, ko sa enga sae pa noka ko sa mananiria, beto sa kikiparia, beto sa sa vaniria ira na ona sepele, ko ira qai iaria sira na minete tinoni. 17Ko qai teteku ko qai pote beto sira doru, beto sa qai buti kura vapugeleniria na kikipa gagani kole joladi ira na sepele sa ka manogarua topa lavatadi.

I Pita sa Poja Votunia na Veveina i Jisu

(Matiu 16.13-19; Maka 8.27-29)

18Ego kai rane totonai sa korapa vavara mekana si Jisu, sa qai lame vaikamunia sira na ona sepele. Poni sa nanasaria i Jisu sira, <<I sei qaqarigunisiu ira na minete tinoni sara?.>> sauniria.

19Poni qai oea pira qarigunia, <<I Jone Paputaiso sao qarigu, goto kaki sa i Elaija sao qarigu, goto kaki mutu sa kame ira na tinoni kokorotai pa moa sao qarigu,>> qarigu sira na sepele.

20Poni sa nanasaria mule isa sira, <<Goto agou sa i sei ququgunisiu sara?>> sauniria.

Poni sa oea i Pita sisa, pira saunia, <<Ao tugu sa na Karisito tavilena tana Tamasa!>> saunia.

I Jisu sa Vavakatonia na ona Mate beto na Turumule

(Matiu 16.20-28; Maka 8.30-9.1)

21Beto sa sa naquria beto sa paranga vaneneqiniria i Jisu sira na ona sepele ko maike tei vavakatonia tu tadira na tinoni sa na veveina isa sa na Karisito sauniria. 22Ko sa pojaniria mutugu sira, <<Na Tuna na Tinoni sa kode mina gosororia soku vitigi, beto mai kilu pale ira na tinoni mamata, na kuta iama beto ko ira qai vaivagigalainia na Vavanau. Kode mina tavamate sisa ba pa rane vinaue sa mina tavatoa mule,>> sau.

23Beto sa paranga laoria ira doru sisa, <<Na tinoni sa nyogua tutisiu ara sa mi kilu pale tu sa nona toa mekana, ko mi pogosia na ona korosi doru rane ko mi tutisiu sara. 24Ura na tinoni sa nyorogua kopu vasarenia nona toa mekana sa kode mina saivia tugu sa nona toa. Goto na tinoni sake rabekia nona toa pa ona tutiqu ara sa isa sa mina aloa nona toa. 25Ura na sa sa mina boka vagavoria na tinoni bi gona pale na ona toa ko bi isongia na kasia gusu doruna? Bi julingai tu! 26Na tinoni sa keanisiu ara beto na qua paranga sa na Tuna na Tinoni ba mina keania tugu sisa totonai mina lame sisa pa ona neqi lavata, pa neqi tana Tamasa beto tadira na mateana tabuna. 27Ma poja sosotonigou ara sagou: kaki agou qu korapa suvere aipira sa mai oqoro mate tinganai mai batia na binangara tana Tamasa,>> sau si Jisu.

Sa Dogoro Goto na Tinina i Jisu

(Matiu 17.1-8; Maka 9.2-8)

28Ego pa liguna sa pojaria isa sa na sakasava aipira ko pa vinavesu rane, sa sa toniria isa sira Pita, i Jone, beto i Jekopi ko qai sae pa kubo ko sa kole vavara. 29Ko totonai sa korapa vavara isa, poni sa sa dogoro goto sa na isumatana beto na ona poko sa sa keka vavalaka. 30Beto api! Karu tinoni ira Mosese i Elaija 31qai bola votu pa leo kabere noka ko qai kole paparangia si Jisu ko qai kole vavavakatonia ira karu tai Jisu sa na soana vei beto mina taloa isa sa tata kode mina gore votu pa Jerusalema. 32I Pita beto ira karu sepele tavitina sa sa tei ngaoloria tu na nyoputa, ba qai dorava sira ko qai batia sa na tinina i Jisu sa kabere beto ko vei tugu ira karu tinoni qai turu tavitia isa. 33Ego ko totonai qai korapa iolo taloa ti Jisu qarigu sira karu, sa sa paranga lao ti Jisu si Pita, <<Qokolo, sa jongana jola sa qe suvere lani sagei! Ko me roitinia kue aqaqo ropi, ko kame tamu, kame ti Mosese beto kame ti Elaija, uve?>> sau. Ba sake gigila vatalea i Pita sa na manugu sa korapa pojai isa.

34Totonai sa korapa tugu paranga vei inara i Pita sa sa lame gu sa kai lei ko sa amu vapaeria sira doru, ko qai matagutu sira na sepele totonai qai tome sae pa lei sira Mosese i Elaija. 35Beto kai ovovele sa sa votu lame vei pa lei, pira sau, <<Alepi sa na Tuqu isa qa vilea ara. Mu nongoria sisa!>> sau. 36Totonai sa noso na ovovele, sa i Jisu gu mekana sa sa suvere jola. Qaike isongo vavavakatonia tugu ira ka visa sepele aipira tadira tinoni totonai sira doru ginugua qai batiria pira.

I Jisu sa Salania kai Koburu Marene sa Kolea na Tomate Ikikerena

(Matiu 17.14-18; Maka 9.14-27)

37Ego pa vuvugei ranena tonai sa taloa mule gore koko pa kubo si Jisu beto ira kue sepele, sa kai minete tinoni lavata sa sa gore gosoria i Jisu. 38Ko kai tinoni pa vaikamu tinoni isa sa sa kuku vevela, pira sau, <<Tinoni vaivagigalai! Qa tepa vivitigigo ara sao ko mu lame mai dogoria na tuqu marene, ura isa tugu kai tuqu memekaina sisa. 39Sa tomea na tomate ikikerena, ko lao vei sa kamua sa sa kukuku vasiboro, beto sa gogona pedalania pa peso ko sa dadao tu na mangana. Ko sa aru vavivitigi palea mai tu beto sa taloa tana sa na tomate ikikerena. 40Qa tei pojaniria tugu sira na mua sepele ko mai iju palea sa na tomate ikikerena qauniria, ba qaike bokai,>> sau.

41Poni sa oea i Jisu sisa, pira saunia, <<Koi, na sasae tinoni kepore miu rarange beto na ikikeremiu sagou! Ai tu mina koi vei sovaina sa mana suvere tavitigou beto mana jujunonigou ara? Ao mu toni lamenia taqu sa na tumu ina!>> sau.

42Ego ko totonai sa korapa rerege lao sa na koburu, sa sa vakamu vaikikeria mule, ko sa gona pedalania na tomate ikikerena pa peso ko sa neneqere beto sa garata tu. Ba sa lao i Jisu ko sa iju palea sa na tomate ikikerena, ko sa salania sa na koburu marene, beto sa vamule lao vania na tamana. 43Ko qai gabara betonia ira doru tinoni sa na neqi lavata tana Tamasa.

I Jisu sa Poja Ligua na Veveina na ona Mate

(Matiu 17.22-23; Maka 9.30-32)

Totonai qai korapa gabarania ira na tinoni sa na veveidi doru sakasava sa roitiniria i Jisu, poni sa pira sauniria ira na ona sepele, 44<<Agou mu nongoro vakoititiria sira na paranga mana ule vanigou aipira. Na Tuna na Tinoni sa kode mina tavakarovo lao pa limadi ira na tinoni,>> sau. 45Ba qaike vakaberia ira na sepele sa na ginuana na paranga sa pojai isa. Sa tavapae tadira sa na ginuana, ko qaike gigilai, beto ko mekadi ba qai pangaga nanasania sa na ginuana na paranga sa pojai isa.

I Sei sa na Poreveveina Jola?

(Matiu 18.1-5; Maka 9.33-37)

46Ego kai vaitoke na veveina i sei sa na poreveveina jola qarigu sa sa poraka votu pa vaikorapaidi ira na sepele. 47Ba sa tei gigilaiona tu i Jisu sa isa qai roroqu vei pa bulodi ira, ko sa aru tekua isa sa kai koburu ikete ko sa vaturua pa kekerena, 48beto sa pira sauniria, <<Na tinoni sa vakamu vatalea pa isongoqu ara sa kame ira na koburu vevei api, sa sa vakamu vatalesiu tugu isa sara. Beto na tinoni sa vakamu vatalesiu ara sa sa vakamu vatalea tugu isa sisa sa garunusiu ara. Ura isa sa kepore veveina jolanigou agou doru sa isa tugu sa sa poreveveina jola,>> sau si Jisu.

Ira Qaike Rajagou sa qai Kole vei pa miu Kalena

(Maka 9.38-40)

49Beto sa oe si Jone, pira sau, <<Qokolo, kai tinoni sa qe batia agei sa ijiju pale tomate ikikeredi pa isongomu ao, ko qe pojania agei sisa ko mi noso qeunia, ura sake somana tavitigei agei pa tutimu ao sisa,>> saunia.

50Poni pira saunia i Jisu sisa, <<Muke vanosoa! Ura na tinoni sake kanagou sa sa kole vei pa miu kalena,>> sau.

Kai Gusu Sameria sake Nyogua Vakamua si Jisu

51Ego totonai sa adanga lame na totoso beto mina mule sae pa noka si Jisu, poni sa vatoqo vatalea sa nona roroqu ko mi sae pa Jerusalema sau. 52Sa garunu momoe laoniria isa sira kaki ona tinoni pogoso nongoro ko qai lao pa kai gugusu pa Sameria ko mai vatana momoe vania sa ketakoi mai vajola bongi tonai mai kamu ketakoi sau. 53Ba qai daidia vakamua ira pa gugusu isa sisa, ura qai gigilaidia ira sa pa Jerusalema tu sa korapa gore vei sisa qarigu. 54Totonai qai nongoria ira karu ona sepele, na isongodi ira Jekopi i Jone, sa sa vei inara sa pira qarigu sira karu, <<Bangara, vei jongana munagu ao, sa mu kuku vagore lageria na iku pa noka ko mi vurungu beto paleria sira na tinoni ketakoi!>> qarigunia. 55Ba sa balinga i Jisu ko sa tokeria sira karu. 56Beto sa rerege jola laona pa kai goto gugusu si Jisu beto ko ira na ona sepele.

Ira Qai Nyogua Tutia i Jisu ba Qai Rabeke

(Matiu 8.19-22)

57Totonai qai korapa rerege lalaodia pa soana sa sa lame sa kai tinoni ko sa parangia si Jisu, pira sau, <<Ara mana tutigo doru eqa muna lao vei ao,>> saunia.

58Poni pira saunia i Jisu sisa, <<Ira na pokese sa koleona na dia baongo, beto ira na manugu tatava sa koleona na dia vovori, goto na Tuna na Tinoni sa kepore na ona ia mina kole minere,>> saunia.

59Beto pira saunia isa sa kai goto tinoni, <<Ao mu lame tutisiu ara,>> saunia.

Ba pira sau sa na tinoni isa, <<Bangara, mu vamalumusiu ko ma mule golomia mai na tamaqu,>> sau.

60Poni pira saunia i Jisu sisa, <<Mu loaria sira na matedi ko mai vaigolomo mekadi. Goto ao sa mu lao ko mu taraenia na binangara tana Tamasa,>> saunia i Jisu sisa.

61Beto sa pira mutugu sau sa kai goto tinoni, <<Bangara, ara sa mana tutigo ao. Ba mu vamalumusiu mai ko ma mule lao loloaria ira pa qua tatamana,>> saunia.

62Ba pira saunia i Jisu sa na tinoni isa, <<Na tinoni sa tei aru tamana tu pa gegelini peso taragatana beto sa babalinga sa sake pada pa binangara tana Tamasa sisa,>> sau si Jisu.

Currently Selected:

Luke 9: LGA

Highlight

Copy