Matiu 15

Na Vaivagigalai Kolena Tadira na Tinoni Jiu

(Maka 7.1-13)

1Ego pa liguna isa sa na koko veidi pa Jerusalema qai kamu sira kaki Parese beto ira qai vaivagigalainia na Vavanau ko qai lao nanasia si Jisu, pira qarigu, 2<<Ai sa vei sa ira na sepele tamu qai majai na uana tututidi tadira na oda tite? Ura qaike loqa lima momoe mai beto qai teteku,>> qarigu sira.

3Poni sa oeria i Jisu, pira sauniria, <<Goto agou sa ai sa vei ko qu majai sa na garunu tana Tamasa ko qu tutia gu agou sa na miu uana tututidi mekamiu? 4Ura sa paranga sa na Tamasa, <Mu valavatia na tinamu na tamamu,>#Votu 20.12; Vavanau 5.16. sau, beto ko, <Isa sa poja vivikeria na tinana beto na tamana sa mina tavamate,>#Votu 21.17; Iama 20.9. sau. 5Ba agou sa qu paranga tu sa vei kai tinoni bi parangia na tinana babi na tamana, pira biunia, <Na sakasava api sa pada ba boka tokanigo ao, ba qa tei valao vania tu na Tamasa ara,> biu, 6poni sa <Minake kilu valavatia isa sa na tinana na tamana ba jongana gu,> qugu sagou. Ko pa soana vei api sa qu vakeporea agou sa na paranga tana Tamasa, ko qu tutia gu agou sa na miu uana tututidi mekamiu. 7Na tinoni jola vavabatamiu na sesekemiu sagou! Sa sotona gu sa i Aisea tonai sa ululenia na veveimiu agou:

8<Ira na tinoni aipira sa qai valavatasiu sara

pa beberu mangadi gu,

goto na bulodi sa sou vivitigi taqu.

9Na goborona gu sa na dia vinatarasaequ ara,

qai vaivagigalainiria na vaivagigalaidi

na vinaturu tadira na tinoni gu,>#Aisea 29.13. sau,>> sau si Jisu.

Na Sakasava sa Vapajia Na Tinoni

(Maka 7.14-23)

10Ego beto sa kuku valameria i Jisu sira na minete tinoni, ko pira sauniria, <<Mu vainongoro ko mu vakoititia sa isa vei mana pojai ara! 11Nake isa sa teku ponyolia pa mangana na tinoni sa sa vapajia sa na ona toa, goto ira tu na sakasava qai votu lame vei pa mangana sa qai vapajia sisa,>> sau si Jisu.

12Beto sa qai lame ti Jisu sira na ona sepele ko pira qarigunia, <<Qu gigilaimua tugu beka ao sa qaike qerania ira na Parese sira vei qu pojaria ao?>> qarigu.

13Poni sa oeria i Jisu, pira sauniria, <<Doru umuma sake umaniria na Tamaqu pa noka sa mai tasobulu gogona pale beto. 14Ko muke pavu takulanganiria sira. Ira na tinoni vaitoni leleqadi sira. Ba vei na tinoni vaitoni leleqana sa mina tonia sa kai tinoni leleqana mutugu, sa kode ira karu doru sa mai mekarai vukele beto pa kai oqili,>> sau sisa.

15Poni sa oe lao i Pita, pira saunia, <<Mu vakabere vatalea moko tamigei sa na vaivagigalai qu pojaniria ira na Parese api?>> sau.

16Poni pira sau i Jisu, <<Ko agou ba qu korapa tugu rururamiu sa? 17Quke vakoinonoa tu agou sa na sakasava sa gania pa mangana na tinoni sa sa gore gu kole pa borina na tinoni beto sa votu riuona gu? 18Goto ira tu qai votu vei pa manga sa na koko veidi pa bulo, ko ira tu sa qai vapajia na toa tana tinoni. 19Ura na koko lame veidi pa bulo sira na roroqu ikikeredi, na varivai, na babarata, na toa lulasana, na ikiko, na jutu sesekeria na goto tinoni, beto na poja vivikereria na goto tinoni. 20Aipira tu sira qai vapajia na toa tana tinoni. Goto nake loqa lima mai beto na teteku sa sake vapajia na toa tana tinoni sisa,>> sau si Jisu.

Na Rarange tana Rereko pa Kenani

(Maka 7.24-30)

21Ego sa iolo ketakoi si Jisu ko sa taloa riuona pa pikata ia pa Turosi beto pa Sidoni. 22Ko sa taloa lame sa kai rereko Kenani na susuverena pa gugusu isa, ko sa kuku lulukana lao tai Jisu, <<Kei, Bangara! Ao na Tuna i Devita! Mei ko mu roroqu tokanisiu! Na tuqu rereko sa sa tomea na tomate ikikerena, ko sa mo vivitigi,>> sau sisa.

23Ba sake pavu vagalania i Jisu sisa. Beto qai lame sira na sepele ko qai kole tepa totokai pira qarigunia sisa, <<Mu iju vamule riua! Sa korapa lukana tututigita gita sina!>> qarigu.

24Poni pira sau si Jisu, <<Ara sa qa tagarunu ko mana lao tadira na tinoni Izireli gu qai muma vei na sipi,>> sau sisa.

25Totonai sa sa rerege lao tu sa na rereko api ko sa lao toqo sori tutungu pa moena i Jisu ko pira sau, <<Tokanisiu, Bangara!>> sau.

26Poni sa oe i Jisu, pira saunia, <<Nake jongana sa bi tateku sa na gagani tadira na koburu ko bi tavalao vaniria na sie tapausudi#15.26 Ira na tinoni Jiu qai boka gigalaniria na sie sira na tinoni karovodi ura qaike vasosotoa na Tamasa. pa ruma,>> sau sisa.

27Poni pira sau sa na rereko api, <<Sotomua tugu Bangara, ba ira na sie pausudi kisa ba qai kole gu vera gagani vuvusudi pa tevolo tadira qai pausuria,>> sau sa na rereko.

28Poni sa oe i Jisu, pira saunia, <<Koi tinaqu, na lavatana jola sa na mua vasosoto! Mi taroiti vanigo tu ropi sa isa vei qu nyoguania ao,>> sau. Ko na totoso tugu isa sa sa tasalana sa na tuna rereko isa.

I Jisu sa Salanaria Kubo Tinoni

29Ego sa taloa ketakoi si Jisu ko sa poana vei pa ovuku Qalili, beto sa sagere saea isa sa kai kubo ko sa toqo ketakoi. 30Ego ko qai vaikamu lame tana sira soku pupuku minete tinoni. Qai okoto toni lameniria ira tana sira qai qao, ira sa mate kale kaki kobu tinidi, ira na leqa, ira na poka beto kubo tinoni mo mule. Ko qai lao loaria pa kekerena i Jisu, ko sa salana betoria i Jisu. 31Ko qai gabara beto sira na tinoni tonai qai batia na poka sa paranga, ira sa mate kale na tinidi qai jonga ligu, na qao sa rerege beto na leqa ba sa babata. Ko qai vatarasaea ira sa na Tamasa tadira na tinoni Izireli.

I Jisu Sa Vatetekuria Ka Made Tina Tinoni

(Maka 8.1-10)

32Ego sa kuku tekuria i Jisu sira na ona sepele ko pira sauniria, <<Qa roroqu vivitigiria ara sira na tinoni pira, ura tei kue ranedi tu sa qai kole tututi taqu ko kopira sa kepore kai sava mai tekua. Qake nyoguania ara sa ba garunu variu buburanaria, ura kode mai rake ko mai tabubulo pa soana,>> sau sisa.

33Poni qai parangia sira na ona sepele, <<E, ba na minete tinoni lavata sapi ko pai tana boka teku gagani ko tana vateteku vapoteniria sa pa ia kaloina vei pira?>> qarigu sira.

34<<Ka visa bereti sa qu isongia?>> sau si Jisu.

<<Ka vitu gu, beto ko ka visa igana ikikete gu,>> qarigu sira.

35Poni sa pojaniria i Jisu sira na minete tinoni ko qai toqo beto pa peso. 36Beto sa tekuria isa sa ka vitu bereti beto vei tugu na igana, ko sa paranga jongananiria, beto sa kikiparia, ko sa vaniria ira na sepele ko ira na sepele qai ia lao vaniria na minete tinoni. 37Ko qai teteku beto sira doru tinoni, ko qai pote vatale beto. Beto sa qai tekuria ira na sepele sa ka vitu totopa, ko qai vapugele nyonyoaniria na gagani kole joladi. 38Ko na anyedi ira na tinoni qai teteku sira ka made tina na marene, goto ira na rereko beto ko ira na koburu sa qaike taanye.

39Ego ko pa liguna sa garunu vamule riuria i Jisu sira na minete tinoni, poni sa sa lao koi pa koaka sisa, ko sa toka lao vei tu pa gugusu pa Magadani.

Currently Selected:

Matiu 15: LGA

Highlight

Copy

Compare