Romu 8
8
Na toa pana Gagala
1Ego ko kopira na Tamasa minake pituria na vakilasaria sira qai kole kame tavitia i Jisu Karisito. 2Ura na neqi tana na Gagala sa vanigita na toa tonai taqe kole kame tavitia i Jisu Karisito sa tei ruvatigo tu pana neqi tana na sela beto tana na mate sao. 3Isa na Vavanau ti Mosese sake boka roitinia ura na tinida gita sa tavamunyala pana sela, poni sa na Tamasa sa roitinia. Isa sa garunia sa na Tuna mekaina ko isa sa lame podo pana kai tini vevei tugu na tini tana tinoni sela beto ko na veveina na sela sa sa lamenia isa. Ko tonai sa lame poni sa vakilasia isa sa na sela tonai sa gosoria isa sa na vitigi pana toa tini, 4ko na uana tuvisina sa nyoroguania na Vavanau sa kopira sa gore votu pana tadagita taqe toania nake nyorogua ikikeredi pana oda toa goto na nyorogua tu tana na Gagala. 5Ira qai toania na nyorogua ikikeredi tana na toa tini sa na sakasava ikikeredi tana toa tini sa qai kole roroquria, goto ira qai toania na nyorogua tana na Gagala sa na sakasava tana Gagala sa qai kole roroquria. 6Na juno roqu totonia na nyorogua ikikeredi tana na toa tini sa sa vuania na mate, goto na juno roqu totonia na nyorogua tana Gagala sa vuania na toa beto na bule. 7Ko sa vei sa na tinoni sa juno roqu totonia na nyorogua ikikeredi tana na toa tini sa sa kanai sa na Tamasa, ura isa sake vatabea na Vavanau tana Tamasa, beto ko sa kepore tugu vei na ona neqi ko mina boka vatabe. 8Ko ira qai toania sa na nyorogua ikikeredi tana toa tini sa qaike boka vaqerai sa na Tamasa. 9Ba agou sa quke toania na nyorogua ikikeredi tana na toa tini goto qu toa vei tu sa totolinigou na Gagala, ura na Gagalana na Tamasa sa korapa kole pana tamugou. Na tinoni sake isongia na Gagalana na Karisito, poni na tinoni isa sa nake tana Karisito. 10Ko vei mina kole pana miu toa sa na Karisito, poni sa na tinimiu kode mai mate tugu ura sa kolea na sela ba na gagalamiu sa tei toa tu ura qu tei tavatuvisi tu pana moena na Tamasa sagou. 11Ba na Gagalana na Tamasa, isa sa vaturu mulea pana mate si Jisu, sa sa tei kole tu pana toa tamugou, ko na Tamasa kode mina vatoaria sa na tinimiu kode mai mate. Isa tugu na Tamasa sa vaturu mulea na Karisito pana mate sa isa tugu sa mina roiti vei api pana neqi tana Gagalana sa kole tamugou.
12Ego ko, ka visa tavitiqu, gita sa taqeke tapiunia na toa tini ko tabe kole toaniria sira na toa ikikeredi sa nyoroguania na toa tini. 13Ura vei muna toaniria sira na nyorogua ikikeredi tana na toa tini, poni sa na mate tugu sa muna gosoria. Ba vei pana neqi tana Gagala muna vamateria agou sira na roiti ikikeredi tana toa tini, poni sa kode muna tekua agou sa na toa. 14Ura ira doru qai korapa tatoli pana Gagalana na Tamasa sa ira tugu sa na tuna na Tamasa sira. 15Agou ko na Gagala qu tekua sa sake vaivapinausu ko bu kole matagutunia mule na Tamasa. Goto na Gagala qu tekua agou sa isa sa teku pausugou pana tatamana tana Tamasa ko isa sa boka vaparanga veinigita pira lao tana Tamasa, <<Aba! Ao na Tamaqu!>> sau. 16Na Gagalana mekana na Tamasa sa somana ule votunia vei sa pojai na gagalada gita sa gita sa na koburu tana Tamasa. 17Ko kopira na koburu tana Tamasa sa gita ke, ko kode tana somana isongoria tugu sira na mana sa vakole kale vaniria na Tamasa ira nona tinoni. Ego ko kode tana somana isongoria sira na mana sa vakoleria na Tamasa ke, ko kode tana somana isongoria tugu sira na mana vei tugu na Karisito sa isongoria. Ko vei tana somana gosoria gita sa na vitigi tonai tana roitinia na roiti jongana sa vei na Karisito, poni sa kode tana somana tavalavata tugu sa gita.
Na vinalavata tadira na tinoni qai vasosoto
18Ara qa vasosotoa sa na vitigi taqe gosororia gita pana totoso kopira sa sake pada ko tana dogoro matagutuniria ura na vinalavata kode tana tekua gita sa na lavatana jola. 19Doruna na vinapodaka sa korapa nyorogua vivitiginia beto sa korapa vera vatalenia sa na totoso tonai na Tamasa mina ule votuniria sa ira na tuna sosoto. 20Ura na vinapodaka sa sa talevenia ko minake boka vagore votua sa na nyorogua tana Tamasa. Ko nake pana ona nyorogua mekana na vinapodaka sa sa vei isa, goto na Tamasa tu sa roiti veinia ura sa nyoroguania ko na vinapodaka mi kole vera gegelenia sau. 21Ura kai rane na vinapodaka sa mina taruvata ko minake nyabo beto ko mina tekua isa tugu na vinalavata qai isongia ira na koburu tana Tamasa. 22Taqe tei gigilaioda tu gita sa podalai tu pa moa ko sa kamua kopira sa na vinapodaka doruna sa gosoria na vitigi ko sa mekarai kei, sa kole kei vei na rereko sa vivitigi ko sa tata vaivapodo. 23Ba nake vinapodaka gu mekana sa sa kei, goto gita taqe isongia na Gagala Tabuna, isa sa vei na kobuna momoe na vaivana tana tekua vuka risa, ba taqe korapa tugu kei pana leoda tonai taqe korapa gegelenia sa na totoso tonai na Tamasa mina teku pausugita beto mina ruvatia pana sela sa na tinida. 24Ko podalai tu tonai taqe taalo sa taqe kole vera gegele sa gita, ba na sakasava sa tei ta bata tu sa sake tavera gegele. Ura i sei sa kole vera gegelenia mule na sakasava sa tei batia tu? 25Ba vei na sakasava taqe oqoro batia sa taqe korapa vera gelenia, poni sa taqe turu vangaju tonai taqe gele vatatalenia gita sisa.
26Ko pana soana vei tugu na oda vera gegele sa vamauru poni sa na Gagala ba sa lame tugu somana tokanigita tonai taqe munyala. Taqeke gigilai ai sa na tuvisina tana vavara vei gita, ba na Gagala Tabuna mekana sa vavara tokanigita pana kei vitigi sake boka tapoja pikata pana paranga. 27Ko na Tamasa isa sa tiro kamua na bulo tinoni sa gigilaiona sa na sa sa na roroqu tana Gagala, ko na Tamasa sa gigilai sa na Gagala sa vavara tokaniria sira na tinoni tana Tamasa pana soana vei sa nyoroguania na Tamasa. 28Ko gita taqe gigilai sa tadira qai roroqua na Tamasa sa isa sa roitiniria doru sakasava pana soana sa votua na jongana, ko sa roiti vei inara sisa pana tadira sa kukuria ura isa sa na ona nyorogua isa pana tadira. 29Ko ira sa tei gigilariaona tu perangana, sa ira ba sa tei vileria tu perangana ko kode mai tekua sa na uana tana Tuna mekai, ko na Tuna mekai sa sa vei na marene podo kimanaqe goto ira sa na boko tasina marene. 30Ko ira sa tei vileria tu perangana sa ira ba sa tei soruria tu, ko ira sa tei soruria tu perangana sa ira ba sa tei vatuvisiria tu pa moena mekana, beto ko ira sa tei vatuvisiria tu pa moena mekana sa ira ba sa tei valavataria tu.
Na vairoqu tana Tamasa
31Ego ko na sa tanagu sa gita tonai tana dogororia sira doru sakasava sa roiti vanigita na Tamasa aipira. Na Tamasa sa tei roiti vanigita tu, ko i sei mina boka vakilasagita sa vei? 32Na Tuna tu mekana ba sake aru mulenia goto sa valageria ko sa mate vanigita gita doru, ko ai vei kode minake boka vatamo vanigita mutugu sira doru vaivana jongadi? 33I sei sa mina pitugita pa moena na Tamasa ko mina boka vakilasagita gita na tinoni ta viledi tana Tamasa? Ura na Tamasa tu mekana sa sa tei vatuvisigita tu pa moena mekana sa gita. 34I sei sa mina boka jutunigita qai oqoro tavulasa noda sela sa gita minagu? Ura i Jisu Karisito tugu mekana sa sa matenigita, ko sa turu mule, beto ko isa tugu sa sa toqo pa kale matuana na Tamasa, ko isa tugu sa sa korapa vavara tokanigita gita. 35Bi mija sosoto tu sa kai tinoni babi kai sakasava mina boka pikata palenigita gita pana vairoqu tana Karisito. Tonai tu taqe gosoria na tapata ko taqe takulanga, tonai taqe takomiti ura taqe rangea na Karisito, taqe gosoria na songe, sa keporenigita na poko, taqe gosororia na sakasava vaivamatedi, babi tabe tavamate tu, ba na Tamasa sake beto roroqugita sa gita. 36Na tapata taqe gosororia aipira sa qai tei tapojadi tu pa Kukuti Tabuna, tonai pira sau,
<<Tamasa, na mua tinoni ao sagei ko sa vei sa ira na goto tinoni qai nyorogua vamategei doru totoso,
qai dogoro veinigei na padamei sa mene takubolo vei gu na sipi,>> sau.#Kera Vinatarasae 44.22.
37Ba tonai taqe tomeria sira na tapata aipira sa gita taqeke tavakilasa goto sa vavarenegita tu na Karisito isa sa roroqugita. 38Ara qa vagigila vatalea sa kepore sosoto sa kai sa mina boka pikata palenigita pana vairoqu tana Tamasa. Nake mate babi na toa, nake ira na mateana babi ira na bangara pa vavagalo eqa, nake sakasava pana totoso kopira babi na sakasava vuka risa, nake ira qai isongo gogoto neqi pana kasia gusu api, 39nake ira pa narena na kasia gusu babi ira pa kauruna na kasia gusu, sa mai boka pikata palenigita gita pana vairoqu tana Tamasa isa sa tabata votu pana ti Jisu Karisito na oda Bangara.
Currently Selected:
Romu 8: LGA
Highlight
Copy
Compare
Share
Want to have your highlights saved across all your devices? Sign up or sign in
© 2024, Islands Bible Ministries. All rights reserved.
