Lubungo 7
7
1Nyakasane anacibwîra Mûsa, erhi: «Kàli nkujizire nka Nyamuzinda wa Faraoni mwâmi w’e Mîsiri na mwene winyu Aroni ye wabà mulêbi wâwe#7, 1 Rhulole omu Lub 4, 16.. 2“We wakaziderha ngasi byoshi nakurhegeka, na mwene winyu Aroni abwîre Faraoni mwâmi w’e Mîsiri aleke Bene-Israheli barhenge omu cihugo câge”. 3“Ci kwône nadundaguza omurhima gwa Faraoni mwâmi w’e Mîsiri. Naluza ebimanyîso n’ebirhangâzo omu cihugo c’e Mîsiri”. 4“Ci Faraoni mwâmi w’e Mîsiri arhammuyumve. Nalambûlira okuboko kwâni kuli Mîsiri, emirhwe yâni, lwo lubaga lwâni, bene-Israheli, nyirhenze n’obuhashe e Mîsiri”. 5“Abanya-Mîsiri bamanye obwo oku nie Nyakasane, hano ndambûlira okuboko kwâni oku Mîsiri, nnantenzamwo bene-Israheli”». 6Mûsa na Aroni bajira ntyo; bajira oku Nyakasane anali abarhegesire. 7Mûsa ali agwêrhe myâka makumi gali munâni, na Aroni makumi gali munâni n’isharhu, ago mango bajagiganiza Faraoni mwâmi w’e Mîsiri.
Akarhi kahinduka njoka
8Nyakasane anacibwîra Mûsa na Aroni, erhi: 9«Faraoni mwâmi w’e Mîsiri akammubwîra, erhi: Jiragi ecirhangâzo, onabwîre Aroni, erhi: Rhôla akarhi kâwe, okakwêbe embere za Faraoni mwâmi w’e Mîsiri, kahinduke njoka!» 10Mûsa na Aroni bacibanda aha mwa Faraoni mwâmi w’e Mîsiri, bajira nk’oku Nyakasane ali abarhegesire. Aroni akweba akarhi kâge embere za Faraoni mwâmi w’e Mîsiri n’embere z’abambali, na kalya karhî kahinduka njoka. 11Ci oku bwâge, Faraoni mwâmi w’e Mîsiri naye ahamagala abagula n’abashonga bâge, abakurungu b’e Mîsiri bajira nabo okwo n’amakurungu gâbo. 12Ngasi muguma akazikweba akarhi kâge, kakazihinduka njoka. Ci akarhi ka Aroni kamirangusa rhulya rhurhi rhwâbo. 13Ci omurhima gwa Faraoni mwâmi w’e Mîsiri gwadundagula; arhayumvagya Mûsa na Aroni, nk’oku Nyakasane anaderhaga. Obuhanya burhanzi:
Amîshi gahinduka mukò
14Nyakasane anacibwîra Mûsa, erhi: «Faraoni mwâmi w’e Mîsiri azinzibîre; alâlîre mpu arhalika olubaga lugende. 15“Kanya emwa Faraoni mwâmi w’e Mîsiri irhondo bunacànûla, hano ahuluka mpu ajà ebwa lwîshi. Omulindire eburhambi bw’olwîshi. Na kalya karhî kahindukaga njoka, okafumbarhe omu nfune”. 16“Obwîre Faraoni mwâmi w’e Mîsiri, erhi: Nyakasane, Nyamuzinda w’Abayahudi, ambwiriga mpu nkubwîre, erhi: Leka olubaga lwâni lugende, lujinterekêra omu irungu”». Ci kuhika ene orhayumvagya. 17Ntya kwo Nyakasane adesire: «Eci co wamanyirakwo oku nie Nyakasane: Nkolaga nashurha amîshi g’olwîshi n’aka karhî nfumbasire omu nfune, gahinduke mukò. 18“Enfî z’omu lwîshi zafa, olwîshi lwakazibaya n’Abanyamîsiri bayabirwa okunywa amîshi g’omu lwîshi.”» 19Nyakasane abwîra Mûsa, erhi: «Bwîra Aroni, erhi: Rhôla akarhi kâwe, olambûlire okuboko oku mîshi g’omu Mîsiri, oku nyîshi zamwo, oku mibunda yamwo, oku biyanja byamwo, ngasi hoshi hanabà amîshi, gahinduke mukò! Omukò gubè omu cihugo coshi c’e Mîsiri, omu rhubehe rhwemirhi n’omu rhubehe rhw’amabuye!» 20Mûsa na Aroni banacijira nk’oku Nyakasane anabarhegekaga. Aroni alengeza akarhi, akarhimba oku mîshi g’omu lwîshi embere z’amasù ga Faraoni mwâmi w’e Mîsiri n’embere z’amasù g’abambali. Amîshi g’omu lwîshi goshi gahinduka mukò. 21Enfî z’omu lwîshi zoshi zafà, olwîshi lwakazibaya kuhika Abanya- Mîsiri bayabirwa n’okunywa amîshi ga mw’olwo lwîshi. Ecihugo c’e Mîsiri coshi cayunjula mukò. 22Ci abakurungu b’e Mîsiri nabo bajira ntyo n’amakurungu gâbo. Omurhima gwa Faraoni mwâmi w’e Mîsiri gwadundagula, arhayumvagya Mûsa na Aroni, nka kulya Nyakasane anaderhaga. 23Faraoni mwâmi w’e Mîsiri ahindamuka, acîshubirira emwâge buzira kutwa ihuzihuzi kw’ebyo byoshi. 24Abanya-Mîsiri boshi bakazijà bahumba eburhambi bw’olwîshi mpu babone amîshi banywe, bulya barhankacihashirinywa amîshi g’omu lwîshi. 25Nsiku nda zoshi zagera kurhenga ago mango Nyakasane ahânaga olwîshi.
Obuhanya bwa kabirhi: Ebikere
26Nyakasane anacibwîra Mûsa, erhi: «Ojè aha mwa Faraoni mwâmi w’e Mîsiri, omubwîre, erhi: Ntya kwo Nyakasane adesire: Leka olubaga lwâni lugende, luj’inkolera. 27“Okalahira mpu lurhagenda, nahana ecihugo câwe coshi n’obuhanya bw’ebikere”. 28“Olwîshi lwayunjulira bikere, byarherema, bishesherere omu mwâwe, bije omu nyumpa olala, oku ncingo yâwe, omu nyumpa za bambali bâwe, omu mw’olubaga lwâwe, omu matanuru gâwe, omu nyîna zâwe”. 29“Ebyo bikere byakàkucanukirakwo wêne, oku lubaga lwâwe na kuli bambali bâwe.”»
Currently Selected:
Lubungo 7: MKB
Highlight
Share
Copy
Want to have your highlights saved across all your devices? Sign up or sign in
Mashi Bible © BUKAVU Archdiocese of Bukavu, 2024.
