Yowane 15

Yezu ye cigundu c’omuzâbîbu

1«Nie cigundu c’omuzâbîbu c’okunali, na larha ye muhinzi. 2“Ngasi ishami lindikwo lirhayâna malehe analihagule, na ngasi ishami liyâna amalehe analishogolere mpu lyo liyâna kulusha”. 3“Okuca, mîra mwacâga, ecinwa nammubwîzire cirhumire”. 4“Mumbêremwo, nâni nâmmubêramwo. Kulya ishami lirhankayâna lyône lirhanasêziri oku cigundu, kwo n’okwo ninyu akabà murhansêzirikwo”. 5“Nie cigundu, ninyu mwe mashami. Obêra muli nie nâni muli ye, oyo ye yâna malehe manji; bulya buzira nie, ntâco mwankahash’ijira”. 6“Orhambêzirimwo, anakabulirwa embuga nk’ishami, ayûme; n’amashami mûmu banagarhôle, bagajugunje omu cibêye, gasingônoke”. 7“Mukambêramwo n’ebinwa byâni bikasêra omu mirhima yinyu, muhûne ngasi coshi mulonzize, mwâcibona”. 8“Liri irenge lya Larha mukayâna malehe manji, na ntyo kwo mwâbà baganda bâni”. 9“Oku Larha anzigira, kwo nâni mmuzigira. Mubêre omu buzigire bwâni”. 10“Mukashimba amarhegeko gâni, mwâbêra omu buzigire bwâni, nk’oku nâni nashimbire amarhegeko ga Larha, nambêra omu buzigire bwâge”. 11“Mmubwîzire ebyo byoshi, nti lyo obushagaluke bwâni bummubâmwo, lyo n’obushagaluke bwinyu bubà bwimâna”. 12“Irhegeko lyâni ly’eri”: “muzigirane nk’oku nammuzigire”. 13“Ntâye wankajira obuzigire bulushire okuhâna obuzîne abîra bâge barhumire”. 14“Muli bîra bâni mukajira ebi mmurhegesire”. 15“Ntakacimmuderha bambali bâni, bulya omushizi arhishi eci nnawâbo ajira; mmudesire bîra, bulya ngasi byoshi Larha amanyîsize, nammuyigîrizebyo”. 16“Arhali mwe mwacînyishogaga, ci nie nacîmmwishogaga, nammuyimanza nti mugende, muyâne amalehe, n’amalehe ginyu gabêreho, lyo Larha ammushobôza ngasi kantu mwâmusengere oku izîno lyâni”. 17“Mmurhegesire nti muzigirane mwene na nnene”».

Igulu lishomba Yezu n’abaganda bâge

18«Igulu likammushomba, mukengêre oku nie lyarhangag’ishomba. 19“Mucibâga b’igulu, igulu lyankasîmire ecalyo; ci kulya kubà murhali b’igulu, bulya erhi ncimmwîshoga nammuyegûla n’igulu, igulu likola limmushomba”. 20“Kengêri akanwa nammubwîraga: Omushizi arhankalusha nnawâbo. Erhi bantindibuza, ninyu bâmmurhindibuze; akabà bayumvirhîze akanwa kâni, n’akinyu bâkayumvirhize”. 21“Ci ebyo byoshi bammujirirebyo izîno lyâni lirhuma, bulya barhishi owantumaga.” 22“Ncibulaga buyisha na ncibâga ntabayigîrizagya, rhinga ntà câha bagwêrhe; ci lêro buno ntà bulyo bacigwêrhe oku câha câbo”. 23“Onshomba erhi ashomba Larha”. 24“Ntàcijiraga ekarhî kâbo ebijiro birhasâg’ijirwa na wundi muntu, barhankabîre na câha; ci buno bàbwîne, bagal’irhushomba rhwe na Larha”. 25“Ci okwo kwoshi mpu lyo ecinwa ciyandisirwe omu Marhegeko gâbo ciyunjula: Banshombire buzira igwârhiro#15, 25 Banshombire buzira igwârhiro: Lul 34(35), 19; 68(69), 5..” 26“Mango Omurhûlirizi nâmmurhumira kurhenga emwa Larha ayisha, ye Mûka gw’okunali, ohubuka kuli Larha, ayish’impamîriza”. 27“Ninyu mwayish’impamîriza, kulya kubà mubà nâni kurhenga omurhondêro”».

Currently Selected:

Yowane 15: MKB

Highlight

Copy