Bhaa-bhaana 16
16
Siti Hajar tee Laahiriana Ismail
16:1-16
1Sarai, bhawinena Abram, inda uka apalaahiri siwuluna to Abram. Maka incia dhaangia samia bhatua bhawine, miana Mesir, o sarona Hajar. 2Apogaumo Sarai i Abram, "Kamatea, KAWASANA OPU padhamo atutubhi kadhumaku to kupalaahiri anaana. Kawimo tee bhatuaku, incema mataua kumembali kupotibhaaka anaana minaaka i incia."
Abram aperangoia pogauna Sarai. 3Kasiimpo Sarai, bhawinena Abram, abhawa Hajar, bhatuana, miana Mesir sumai, tee adhawuakamea i Abram, umanena, to apamembalia bhawinena. I wakutuu incia sumai, Abram padhamo amboore i Tana Kanaan sapulu tao kangengena. 4Abram uka aporomu tee Hajar, kasiimpo abhawa-bhawamo bhawine sumai.
Wakutuu Hajar amataua ande incia abhawa-bhawa, incia apandaʼente Sarai, opuna. 5Kasiimpo Sarai apogaumo i Abram, "Kahina ipotibhaakaku sii satotuuna rampaakanamo ingkoo! Iaku inciamo modhawuko bhatuaku i sangoamu, maka siimpomo mpuu amataua ande incia abhawa-bhawa, incia apandaʼenteakumo. Maasangia KAWASANA OPU amembali Haakimu i tanga-tangaku tee ingkoo, incema mosalana."
6Pogaumo Abram i Sarai, "Satotuuna, bhatuamu sumai dhaangia i nuncana kuasamu. Pewaumea incia mboomo opea ikamatamu amalape." Saanampuu, Sarai apisakimo Hajar; sabutuna apalaiakamea.
7Kasiimpomo, malaaʼekatina KAWASANA OPU apokawaakea inda maridho minaaka i saangu matana uwe i tana matuu, i saripina dhala moporopena i Syur. 8Apogaumo, "E Hajar, bhatuana Sarai, minaaka iapai ingkoo tee bheulingka iapai?"
Alawanimo bhawine sumai, "Iaku kupalaiaka karoku minaaka i Sarai, opuku."
9Apogaumo malaaʼekatina KAWASANA OPU i incia, "Mbulimo i opumu tee tungkumo i tambena kuasana." 10Apogaumo uka malaaʼekatina KAWASANA OPU i incia, "Iaku bhekupewau siwulumu abhari mpuu, sampe indamo atogagari kabharina."
11Sapadhana sumai, malaaʼekatina KAWASANA OPU apogaumo i incia,
"Ingkoo tangasaana ubhawa-bhawa
tee ingkoo bheupalaahiri samia anaana umane.
Sarongiakea Ismail,#16:11 Ismail: I nuncana pogau Ibrani, saro sii maʼanana "Aulataʼala arango" (kamata uka Bhaa. 17:20; 21:17).
roonamo KAWASANA OPU padhamo arangoa pekeena kanarakaamu.
12Incia bheamembali mia o dhadhina mboomo keledai maila.#16:12 Mboomo keledai maila: Sifatuna abebasi, maridho minaaka i tampana mia bhari, tee apekalingka-lingka (kamata Ayb. 39:8-11).
Limana bheabhali incema-incemapo uka, tee o limana samia-samia bheabhali incia.
Incia bheamboore apogera-gera tee bhari-bharia manga witinaina."
13Kasiimpomo Hajar aabha i nuncana ngangarandana, "Atotuu iaku padhamo kukamata KAWASANA OPU momaheruakaaku?" Sabutuna sumai, incia asarongiakea KAWASANA OPU mopadhana apogau tee incia mboo sii kooni, "Ingkoomo Aulataʼala Momaheruakaaku." 14Siitumo sababuna sumu incia sumai asarongiakea Lahai-Roi#16:14 Lahai-Roi: I nuncana pogau Ibrani saro sii maʼanana "Incia Modhadhina, Momaheruakaaku.", o tampana i tanga-tangana Kades tee Bered.
15Kasiimpo Hajar apalaahiri samia anaana umane to Abram, tee Abram asarongiakea anaana ipalaahirina Hajar sumai Ismail. 16Abram akoʼumurumo 86 tao wakutuuna Hajar apalaahiri Ismail to incia.
Currently Selected:
Bhaa-bhaana 16: KMW
Highlight
Share
Copy
Want to have your highlights saved across all your devices? Sign up or sign in
Ongoing © Wycliffe Bible Translators, Inc
