Matthew 20
20
Pik o somtey raaqshiton
1 “Rangmungtan raa irimal: napkha o pik tangteywa thalat eq upik sho somlot ma jaksom tey tang thalang ma hal kata. 2Piq aa jaksom tey tang thima saal shey o ashey denari kot ma shing ta etho ning tha upik thináng takatta. 3Rangham akhu tho piq thalat atho piq aa tangwang sangching katáng na miqtang somlot hung aa rong lang atha kap khita. 4Piq aa batta, ‘Nim tho pik náng jaksom ma ka inn, etho bara khakla sha, nga nim ma kopha náng.’ 5Ethi rangma ning tha tho ukat angta. Rangney kampang etho rangham atom tho, piq aa ethimal hun wey somlo ta. 6Rangpal ma rangham shey sey tong ajo, piq wey thalat atho miqtang ronglang aa tha wey khita, etho piq aa batta, ‘Nim iri na chamtho somlot hung aa salthing chamlang ma lang inn?’ 7Ning aa piq ma batta, ‘Miq eq jaksom ma thalang phami rangma lang i.’ Piq aa ning ma batta, ‘Nim tho i pik náng ka eq somlo inn.’”
8 “Rang sey ja atho, pik tangteywa they pik rimteywa thima batta, ‘Pik somtey tang ni hal eq jiwang tha jakho tang ma ning jakthang ni ko u.’ 9Ning thu atho bara rangpal ma rangham shey sey tong ta langtey tang thima ashey ashey denari kota. 10Esha khi eq, jakho kattey tang they tathin ta, ‘Í aa ahan kapni.’ Etharin ning atho ashey ashey denari kapta. 11Jakthang kap atho ning pik tangteywa thima khaba tita. 12Ning aa batta, ‘Iri tang rey, jio ka eq chomrey sa somlo ta. Nang aa í jamoq ning shi chamal eq tatut phu? Í aa salthing lang eq rangsal nanti!’ 13Piq aa ning thiwang ashey thima thawel battta, ‘I nokwa, nga nang ma tashit pha mong, nang hun ashey denari jakthang o lang tu. 14Ba ràng bara eshi tun som eq qhing chuwang u. Nga nang ma chamtan kophang, eshitan hun jiitey rima tho ukot eq ma i tinthin. 15I lik aa ngin riwang chammal som ang tha jin som mong i? Nga qhal shi, nang chamma ngel jo phu?’”
16Etho Jesu aa tathun eq batta, “Ethi mal jitey tang jakho na angna etho jakho tey tang jina angna.”
Jesu aa utik tung aa raaq wey batta
(Mark 10:32–34; Luke 18:31–34)
17Jesu Jerusalem náng ka chey ta etho lam o, asi ani ujiphantey tang tha shu shu eq hal eq batta. 18“Hiqtang Jerusalem náng ka chey i, eshina Miqna Sa tha ajong tingwa tang ma etho thong tataltey tang ma sangphakna, etho ning aa piq tha aja somtey ta raaq eq shing na. 19Etho piq tha Gentile tang jak thináng kochak na etho ning aa piq tha tikngit kungna etho piq tha wat na etho bólq sho bot eq tikwat chak na; etharin piq saal tom o wey jey angna.”
Miqnu ashey raaq bat
(Mark 10:35–45)
20Eshi jio Zebedee himteynu they usa ani tha sol eq, Jesu relnáng kata etho piq jakho o bon ta etho piq rangma chamlang chuta.
21Jesu aa piq ma pitta, “Nang ma chamlang raa aa?”
Piq aa thawel batta, “Nang lungwang ang jio, i sa ni wang ashey ba aqhak ko na etho ashey ba aqhik ko na tatong ma nga ma rangtum kophu.”
22Jesu aa ning ma thawel batta, “Nim aa chamlang chu inn tha nim aa sam min. Nga bari kok riwang ling ma ta ang, nim aa ethi wang jin ling eq nin i?”
Ning aa batta, “Jin ling eq ni.”
23Jesu aa ning ma batta, “Nim aa iri kok wang uling hun eq nin, etharin i aqhik aqhak o tatong sha ijaksom ang moq. Iwa aa ira utang rangma kachat shing ta, ning aa hun ira kapna.”
24Iri raaq raa tat eq asi ujiphantey tang eq sapho ni thima khata. 25Jesu aa ning tha urel náng hal eq batta, “Nim aa usam eq inn, Gentile tang lungwang tang aa tarong jamoq som aa, etho ning solwa tang aa ning sha damnak aa. 26Etharin nim jaktung na ethimal ang moq. Nim jaktung na ajong angma tathintey sha nim sanga ma ang ching. 27Etho nim jaktung na jakho angma tathintey sha nim qha ma ang ching. 28Nim Miqna Sa mal ang ching. Piq aa adak miq wang nong kap ma kapha moq ang ta, etharin piq aa unong eq ma kata pha, etho daqhan miqtang sha thalun rangma, urollung sha kot ma katapha.”
Jesu aa miikduk wani taqhal aa
(Mark 10:46–52; Luke 18:35–43)
29Jesu nia ujiphantey tang Jericho wang thalat chey atho, ahan miq waan tang aa piq ji tha phan ta. 30Aduk wani lam kang na tong chey ta they, Jesu ka chey aa ta kap tat eq, ning ni jujong aa ringta, “Teyhungwa, David Miqwasa, ini ma tinshit phu.”
31Miq waan tang aa ning ni ma shushu eq tong shin ta batta, etharin ning ni jujong aa they ring ring angta, “Teyhungwa, David Miqwasa, ini ma tinshit phu.”
32Jesu tunlang eq, ning ni tha hal eq batta, “Nga nim ni ma chamlang somlo ang? Nim ni aa chamlang ta tathin shin?”
33Ning ni aa batta, “Teyhungwa, ini miik ri cham kal aa.”
34Jesu aa tinshit eq ning ni miik tha lota. Kalo hun ning ni aa jin khita, etho uji phanta.
Currently Selected:
Matthew 20: Mmmm
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
