Matthew 21

Jerusalem náng nop aa

(Mark 11:1–11; Luke 19:28–40; John 12:12–19)

1Jesu nia ujiphantey tang Jerusalem relnáng thuta etho Olive haqkan na Bethphage samhaq náng thuta. Jesu aa ani ujiphantey tang ma ira bat eq takat ta. 2“Haq rel qhim náng ka shin, eshináng thu shin jo, mok aming ashey tatuk chey na etho piq jam thina usa tho kap eq shin nin. Eshi qhang eq i relnáng hum kat shin phin. 3Nim ni ma miq eq pit ajo Teyhungwa ma ira ràa aa ta batshin, etho piq aa nim ni sha kalo takat chak shin phan nin.”

4Ira rangsamal aa bat shing ta tha asing ang rangma angta:

5“Zion miqtang ma bat u,

Siin inn, nim lungwang wa nim relnáng kapha,

Piq anin ang eq mok aming kho shina tong eq kapha,

Piq mok amingsa kho shina tong eq ka pha.”

6Ani ujiphantey ka eq, Jesu aa ning ni ma chammal batta thimal hun somta. 7Ning ni aa mok nia usa tha thok humta etho miqtang aa miq mama khat tha mok aming kho shina damta, etho Jesu tha mok aming kho shina tatong ta. 8Miqtang daqhan eq miq mama khat tha lam shina damta, etho miq dak tang they bangking tha duk eq lam sho damta. 9Miqtang tha Jesu jakho ko kata etho piq ji jio rong kachey ta, jujong aa ring eq raaq ta,

“David Miqwasa, Hosana!”

“Teyhungwa miing o utang kapha, piq aa sunmaan kapna!”

“Mungtan na Hosana!”

10Piq Jerusalem náng nop atho, samhaq ajong thaji tang tha ring rak eq pitta, “Iri utang aa?”

11Miqtang aa batta, “Ira Galilee Nazareth wang rangsamal Jesu.”

Rangnuk him wang sangtang tey tang tha lat chak

(Mark 11:15–19; Luke 19:45–48; John 2:13–22)

12Jesu aa rangnuk him náng ka eq, ethina chamtan takot kang chey ta ning tha latchak ta, etho ngin sangtang tey karatheng etho wotopin sangtey tong ching tha dang bichak ta. 13Etho piq aa batta, “Ira Asang likwit na thawit ang aa, ‘I rangnuk him sha romtam him ta raaq na.’ Etharin nim aa ira ahut apang tang tapu ma kaley tin.”

14Aduk nia akung tang tha rangnuk him na urelnáng kata, etho piq aa ning tha taqhal ta. 15Jesu aa patja jaksom tang somlo aa tha khi ta etho “David Miqwasa, Hosana” ta nijang mey tang rangnuk him wang ring tha khi eq ajong tingwa tang nia thong tataltey tang rapney khata. 16Req ning aa Jesu ma batta, “Ning cham ta ring aa ni, nang aa tat mu i?”

Jesu aa batta, “Utat eq ang. Nim aa Asang likwit na irimal thawit tha phat min ang tin i?

‘Nijang mey etho pung chep kam tang nung wang

Teyhungwa, ba rangma khakla tasapsey kap tu.’”

17Jesu aa ning tha shingchak eq Bethany samhaq ajong náng kata etho rangpal tho eshina tong ta.

Jesu aa phokbang bang ma manthun kot aa

(Mark 11:12–14,20–24)

18Rangnap tho piq Jerusalem thináng wel chey atho, piq chamlal tita. 19Lamkang shina ashey phokbang bang tha khi eq piq eshi relnáng kata, etharin ujak tha shing chak eq eshina chamtho ahung angta. Ethi rangma piq aa batta, “Thang wang nang baluk otho tingo mu sey ang nu.” Etho phokbang bang tha kalo qhuk tita.

20Ujiphantey tang aa ira khi eq rapney patti ta etho ning aa batta, “Phokbang bang ri kalo chammal eq qhuk ti aa?”

21Jesu aa ning ma thawel batta, “Nga nim ma asing batphang, nim aa uhan eq nin etho naan min ang inn jo, nga bara phokbaang bang jamoq somlo táng irimal jaksom nim aa jin somlo eq nin. Iri chen ang moq, iri ajong kan rima thalat eq jungshi náng ka u ta nang aa bat ujo ukat angna. 22Nim aa kam eq chamlang chu nin, eshi tang thaji sha ukap eq nin.”

Jesu authority tung aa raaq pit aa

(Mark 11:27–33; Luke 20:1–8)

23Jesu rangnuk himnáng wang eq bat chey atho ajong tingwa tang etho miqlang tang urel náng ka eq pitta, “Nang aa iri jaksom tang ri chamlang authority wang somlo u? Etho iri jaksom ma utang eq nang ma authority kota taphu?”

24Jesu aa ning ma thawel batta, “Nga atho nang ma ashey raaq pit phang, esha thawel bat phu jo, nga chamlang authority wang iri jaksom somlo táng sha, nga tho nim ma bat eq phanáng. 25John junglam shi bari wang angta? Shkewa ching kowang tia miq ching kowang?”

Ning rong tapit pita, “Shkewa ching kowang ta hiqtang aa bat i jo, piq aa hiqtang ma pit phani, ‘Irimal ang ajo nim aa uraaq shi chamlang ma han min ang tin?’ 26Etho miq ching kowang ta bati jo, hiqtang miqtang ma cho i, chammatakoi ning aa John tha rangsamal ta tathin aa.”

27Req ning aa Jesu ma thawel batta, “Í aa sammi.” Jesu aa ning ma batta, “Irimal ang ajo nga chamlang authority wang somlo ang sha, nga tho nim ma batpha mong.”

Miqwasa ani raaqshiton

28 “Nim aa chamlang ta tathin inn? Miq ashey ma miqwasa ani angta, piq phokho wa relnáng ka eq batta, ‘I sa, thaney aa sutitong náng somlo kat u.’ 29Piq aa thawel batta, ‘Nga ka mong’. Etharin ji tho utin tha kaley eq ukat angta. 30Ethimal hun uwa eq noji wa relnáng ka eq batta. Piq aa thawel batta, ‘Ukat ang náng.’ Etharin kamoq angta. 31Ning ni thiwang uwa raaq bari wa shey tatta?”

Ning aa batta, “Phokho wa shey.”

Jesu aa ning ma batta, “Nga nim ma asing batphang, phunta qheytey tang etho sathuk miqnu tang nim náng eq jakho Shkewa Mungtan náng nopna. 32Chammatakoi John jung thalamtey wa khakla lam takhi eq nim relnáng kata pha, etho nim aa uraaq tha kam min ang tin. Etharin phunta qheytey tang etho sathuk miqnu tang aa uraaq tha kam ta, etho nim aa ira khi jio tho, tin kaley eq kam min ang tin.”

Sutitong siintey tang raaqshiton

(Mark 12:1–12; Luke 20:9–19)

33 “Ashey raaqshiton wey tat inn, ashey pik tangteywa angta, piq aa sutitong takhey ta. Piq aa sutitong thina, timla pal kota. Haqbung shina uchi tha nat ma khit shing ta, etho banban him hunta. Etho sutitong siintey thima sutitong tha koshing eq adak mung náng kata. 34Uthey tok rangham arelna sey thu atho, piq aa usanga tang tha suti phal somma, sutitong siintey tang jam thináng takatta. 35Etharin sutitong siintey tang they sanga tang tha lota; etho ashey sanga tha watta etho ashey sanga tha tik wat eq ta, etho ashey sanga tha long eq patta. 36Piq aa jakho phey náng eq ahan usanga tang tha wey takatta. Etharin ning jam tho jakho wang thimal hun wey somta. 37Uthun ma piq aa miqwasa tha ning jam thináng ira tathin eq takat ta, ‘I miqwasa raa ning aa rangka eq na.’ 38Etharin sutitong siintey tang aa sutitong tangteywa miqwasa tha khi atho, ning jaktung thina wanta, ‘Ira umiqwasa mey, kaphin, tikwat eq chak i etho sutitong sha hiqtang aa kap ni.’ 39Ethirangma ning aa piq tha tánglo ta etho sutitong shiwang alo náng som chuwan eq tatik chakta.”

40 “Ethirangma sutitong tangteywa sha ka pha jo sutitong siintey tang jam tho piq aa chamlang som na?”

41Ning aa thawel batta, “Piq aa ira jashit miqtang tha tathun chakna, etho piq ma khakla rangham o suti phal thawel kottey tang ma sutitong sha kochak na.”

42Jesu aa ning ma batta, “Nim aa Asang likwit na baluk otho ira phat wey min i,

‘Bari long raa chamtho ang moq ta him huntey tang aa bichak ta

Ethi long tha hun thaji pheynáng eq akhek long ma wey angta.

Ira Teyhungwa hun somlo ta,

Etho usiin eq ma rapney patja ching!’”

43 “Ethirangma nga nim ma batphang, Shkewa Mungtan sha nim jakwang thawel chu chakna, etho utang jaqhal tingo na, eshi phan ma kochak na. 44Utang iri long kho sho qhatna, piq upan angna, etho utang kho sho iri long raa qhatna, piq tha ulit eq chakna.”

45Jesu aa iri raaqshiton tang raa bat atho, ning tung aa raaq bat aa ta ajong tingwa tang etho Phorisi tang aa usam eq chakta. 46Ning aa piq tha ulot ma tathin ta, etharin miqtang thima ucho angta, chammatakoi ning aa piq tha rangsamal ta tathin ta.

Currently Selected:

Matthew 21: Mmmm

Highlight

Copy