Génesis 43
43
Benjamín bai Egipto adu iyudiwu
1Bai Canaán aduax yurawu wudiaiwudu. 2Egipto bai aduxu trigo weitawu ma keyuadu Jacobpa awẽ wakewu atu yuidi: “Awiana Egipto adu wukaxu trigo witakawe peiuxũ”, Jacobpa atu wadi.
3Naskaweke Judápa kebadi: “Epã diaiwu Egipto aduatu duku yuikuita: ‘Matu chipuke ma eweyabake maariwi utiruba’, duku waita. 4Mi dukuya nuku extu nichiyaitu peiuxũ nu trigo wikatiru. 5Askataba dukuya mi nichiyabaitu nu katiruba. Diaiwu Egipto adu ikatu duku yuikuita: ‘Matu extu eweyabax ma uĩtiruba’, duku waita”, apa Jacob wadi.
6Naskake Israelpa yuidi: “Aweskai ma aduri ikitame. Aweskakĩ: ‘Nu extu wetsaya’, ma ikitame”, Israelpa atu wadi.
7Awẽ wake ranane kebadiwu: “Duku udua nuku kaiwuu uduari ichapa duku ñukariwaita. ‘Matu epa dayuabame. Ma extu wetsayame’, duku waitu nu tapitaba duku yuiyaitu: ‘Matu extu ewetakawe’, duku waita”, wadiwu.
8Judápa awẽ apa Israel yuidi: “Nu dayupaiba dukuya Benjamín nichiwe. Ẽ kexeikai. Naskax nu datiruba mi ikaidu nuwu nuku kaiwuuri. 9Ẽ bia yuikui. Ẽ kexesharaikai. Ẽ ana dudu eweyabaitu Benjamín aweskarake na uduax ẽ ubiskuipakedaka. 10Nu sabarakayabaitaxakĩ ma nu kai rawea ikerada”, Judápa apa Jacob wadi.
11Naduri dikakĩ Israelpa yuidi: “Awara wetsakai nu atiruba. Nuku bai adua awara shara wuspiwakawe matu chabiupuki diaiwu Egipto adua wuxutaxikakĩ inakuitaxikakĩ. Bálsamo wukata mirra wuda wukata ini wetsa keskarawu wukata wibi kerexriwi nawu wuxutakawe. 12Pei rawe wuxutakawe na inata na batu inayabea. Tapixuba dadeyabea itiruki. 13Matu extu iyutakawe na dukuwene uĩnu. 14Epa Dios bitsisipa axuwaidu na dukuwene batu ubisbanu matu extu cárcel meradua tsekanu. Benjamínriwi. Naskax ẽ wakebais iki”, Jacob idi.
15Pei rawe wikata awarawu inaxikĩ Benjamín iyukata Egipto dukukata José adu iyudiwu Benjamín. 16Naskadu Benjamín ariwi atuwe kaitu Josépa uĩdi. Awẽ pexe adua awarawu kexebis yududi iskawadi: “Da dukuwedewu ewẽ pexe adu iyutakawe. Vaca retewe ẽ atu pibanu mananawari eweta pinuwu”, wadi.
17Josépa yuiya keskawadi. Dukuwedewu Josépa pexe adu atu iyudiwu. 18Josépa pexe adu atu iyuwaitu uĩkadi ratekuidiwu. Iskadiwu: “Na peiuxũ duku nasuitawu naawu uduax nu atũ uibati iki duku achikadi nuku yuinawuya”, idiwu.
19Pexe kaĩti adu dukudiwu. Naskata Josépa awẽ pexe adua awarawu kexebis chaiba wukaxu awe tsaidiwu. 20Naskata yuidiwu: “Diaiwũ wetsatiã peiuxũ trigo nu wiwaĩta. 21Na nu uxai aduxu nuku chabiupu wepekĩ nuku pei nu wichita. Naa pei nu bia nasuiyua. 22Awiana nu pei nu wea trigo wiixikĩ. Nu tapiaba tsuãra nuku chabiupu mera nuku pei dadexuita”, Josépa awẽ udiwetsawawe wadiwu.
23Na pexe adua awarawu kexebistu atu yuidi: “Rateyabakawe. Matu epa awẽ Diospa matu Diosri matu pei awiana matu chabiupu mera dadexuita. Na ma peiuxũ inaita naa ma ẽ wiita”, atu wadi. Yuikĩ adaitita atuki Simeón ewedi.
24Naskata Josépa awẽ pexe mera atu iyudi. Naskata atu ede wixudi atũ tae chukanuwu. Atũ asnowuri pibaxudi. 25Naskaxu José badadiwu pexe meraxu mananawari naweta piixikakĩ. Naskata José awarawu kaxpa inaxikakĩ itipiniwadiwu.
26Naskake José pexe adu dukuwaitu na weawu José inadiwu. Inakuikata baikiri wepexupakewuwãdiwu. 27Josépa atu ñukadi: “Ma sharame. Ma ea yuita matu epa adiwushta dayuabame”, atu wadi.
28Baikiri wepepakewuwakata kebadiwu: “Mewẽ uibati nuku epa shara iyua”, awẽ udiwetsawawe José wadiwu.
29Awẽ extu Benjamín apaweta awa na rawe aka idi Josépa uĩkĩ naskake atu ñukadi: “Daame matu extu ma ea yuita. Bia Epa Dios sharawapainu”, Josépa wadi.
30Josépa awẽ extu uĩ idibayana ana siaikĩ tedetiru idiba. Naskata awẽ kede mera kata siaidi. 31Ma siaita wechukubedi. Naskata kaĩta: “Atu piti inakawe”, Josépa awẽ uibatiwu wadi.
32José mesa wetsa aduxu pinu inadiwu. Egipciowawe mesa wetsa aduxuri pinuwu inadiwu. José awẽ udiwetsawu mesa wetsa aduxuri pinuwu inadiwu. Egipciowawe hebreowuweta pitiruwuba idi: “Nu atuweta piax nu chakatiru”, ikaxu egipciowawe shinadiwu. 33Josépa atu yuiya na iyua tsaubakĩ taewadiwu akachiuri wetsa tsaubadi wetsari tsaubadiwu. Naatu askawawudiwu. Chipukui chipuke tsaubadiwu. Wetsa keskarakata uĩnanadiwu. 34Josépa awẽ uchiwu atu pibadi awẽ mesaduxu. Awẽ chipuke Benjamín ewapakui inata udiwetsawu askawadiba. Atuweta ayai José idibakuidi.
Currently Selected:
Génesis 43: mtsB
Highlight
Share
Copy
Want to have your highlights saved across all your devices? Sign up or sign in
