Génesis 45
45
Josépa udiwetsawu unabadi
1Josépa ana tedetiruba beekĩ awẽ uibatiwu atu yuidi: “Naduax tsekeyunuwu”. Awẽ udiwetsawu tapibaidu awẽ yudubiswu adu tsua idiba.
2Naskata José siaikaitu Egipto ikawawe dikadiwu. Diaiwu faraónpari dikadi. 3Josépa awẽ udiwetsawu atu yuidi: “Ẽ José. Ewẽ epa dayuabame”, atu waitu ratekuiyana kebadiwuba. 4Naskata Josépa atu ubisbayana: “Dirishara wekawe”, atu wata. Ma aki weawudu atu yuidi: “Ẽ José matu udiwetsa peiuxũ Egipto ikawu ma ea atu inadi. 5Naskake bawirasi ‘Mi idi’, ma watanaki peiuxũ ea ma atu inadi. Dios ea rewu nichidi yura ichapa uduax ẽ rawanainu. 6Ma wari rawe dudua yurawu wudiawu. Cinco wari iyuaba ma trigo wadawiawu tsua awa wixiwiba. 7Ma uyuabadu Epa Dios ea rewu nichidi batu uduax ẽ rawanainu. Ma wudiyabanu matu kaiwuunuax ichapanawã kaĩpakedakawu dayabanuwu. 8Ea ma nichidiba. Epa Dios ea dudu nichidi. Naatu ea axuwaidu ẽ faraónpa awẽ tapibabis. Naatu ea yuiyadu Egipto bai adu ẽ atũ yudua. 9Wukata duduri ewẽ epa yuitakawe: ‘Mewẽ wake José iskaratiã Epa Dios Egipto adu diaiwuwaa ewẽ epa ea waxutakawe kushi ea uĩyunu sabarakayabanu. 10Naskax na bai Gosen adu ma itiru mewẽ wakewuri mewẽ wawawuri mewẽ yuinawuri mewẽ awarawuya ma utiru. Naskaxu ẽ ika chaiba ma itiru. 11Ẽ duduxu batu piti inaxiwi bia inata mewẽ kaiwuuri na mewẽ ikawuriwi awa ma yupayabanu. Cinco wari yurawu wudixikadi’ ”, Josépa awẽ udiwetsawu atu wadi. 12Josépa awiana atu yuidi: “Ewẽ extu Benjamínweta maawawe uĩyaidu ẽ yui. 13Ẽ udua ewẽ epa yuitakawe Egipto adua ẽ diaiwu. Naskatari na ma uĩyawu yuitakawe. Ewẽ epa kushi unu”, Josépa atu wadi.
14Josépa Benjamín pishkuxu siaikidi. Benjamínri siaidi. 15Naskata José awẽ uchiwu atũ tabuki tsu adi. Atu pishkuxu siaikidi. Udiwetsawawe ana besekataba tsai adiwu.
16Josépa awẽ uchiwu Egipto adu dukuawu dikai faraón awẽ yudubiswuwe idibadiwu. 17Faraónpa José yuidi: “Atũ yuina mamakaya awarawu wakata bai Canaán adu wutanuwu. Dadekata awẽ udiwetsawu Canaán adu dasunuwu. 18Naskatari matu epa ea ewexukawe awẽ kaiwuuriwi. Da bai Egipto adua bai sharakui ẽ atu inanu. Naskatari na bai Egipto yudu udia piixinuwu. 19Egipto adua caballo carroya wukata atũ wakewu iwikata atũ awĩ iwitanuwu. Naskatari matu epa ewenuwu atu yuiwe. 20Atũ awarawu wawerãdaiwu shinachakayabanuwu da bai Egipto adua awara shara atuna iixiwi”, Faraónpa José wadi.
21Naa faraónpa atu yuiya keskawadiwu Israel wakewawe. Josépa atu caballo carroyawu inata atu piti inadi wukakĩ piwaĩtanuwu. 22Saweti weda atu inadi sawenuwu wisti rasi. Naskatari Benjamín trescientos pei sapa cinco saweti inadi. 23Diez asno awẽ padu mamakaya trigo piti wetsawuriwi pan ukĩ piwunuwu atu inadi. Diez asno wede mamakaya Egipto adua piti sharawu apa wubadi.
24Josépa nichiyana atu yuidi: “Wukadi ma chakanawatanawukiki”. 25Egipto aduax Canaán adu wudiwu. Atũ apã awẽ ade Jacob ikadu dukudiwu. 26Ma dukukata yuidiwu: “José daaba. Egipto bai adua atũ diaiwu”, Jacob waiwawe awe itaba atu ikũira wadiba. 27Josépa atu yuita apa yuidiwu. Naskata Josépa caballo carroya keskara wubaita uĩ Jacob idibakuidi.
28Naskata Jacob iskadi: “Ea yuiyawu ewẽ wake José dayuaba. Dayuxuba ewẽ wake ẽ uĩkai”, Jacob idi.
Currently Selected:
Génesis 45: mtsB
Highlight
Share
Copy
Want to have your highlights saved across all your devices? Sign up or sign in
