Juan 9
9
Dukuwede wexu kaĩdi Jesúspa kayawadi
1Jesús kakĩ dukuwede wexu kaĩdi uĩdi. 2A udua tapibiswawe ñukadiwu: “Maestrõ da dukuwede aweskai wexu kaĩdime apaweta awa chaka uduax iyabai awẽ chaka uduaxraka”, wadiwu. 3Jesúspa atu kebadi: “Awẽ chaka uduax kaĩdiba apaweta awa awẽ chaka uduaxri kaĩdiba. Naskara kaĩdi Epa Dios awẽ bitsisipa kayawaitu ma uĩnu. 4Pedayuadu na ea nichidi nu yuduxutiru. Ma yabeaidu nu yudutiruba. 5Da bai adu ẽ iyuax na ẽ peda keskara na baitiu ikawu ẽ atu chaxai”. 6Naskata baiki kebu bechuta bai bechanawaxu dukuwede awẽ weruki wetekere adi. 7Naskata yuidi: “Iã kawasharadua kata chukitawe pozo awẽ ade Siloé”, Jesúspa wadi. Tsai wetsa “Siloé”, yuipai “Nichia”. Naskata dukuwede wexu kata chukita ma uĩtiru idi. 8Na wexu uĩwawaĩdawawe awẽ chaiba ikawawe yuidiwu: “Da tsauwax pei yukakabekakaĩda”, wadiwu. 9Wetsawawe: “Naa”, wadiwu. Atiriwawe: “Aaba. Naa keskara”, wadiwu. Ikakaĩdatu: “Naa ẽ”, atu wadi. 10Naskata ñukadiwu: “Aweskawaxu mi uĩme”, wadiwu. 11Naskaiwawe atu kebadi: “Na dukuwene awẽ ade Jesús bai bechawaxu ea wetekere aka ewẽ weruki. Naskata ea yuiya: ‘Karaya awẽ ade Siloé aduax wechukubetawe’, ea waa. Naskata ẽ wechukubea ma ẽ uĩtiru ika”, atu wadi. 12Naskake ñukadiwu “Wanime a dukuwede”, waiwawe: “Ẽ tapiaba”, wexu ikakaĩdatu atu wadi.
Na wexu kaĩdi uĩyaitu fariseowawe ñukadiwu
13Dukuwede wexu ibis fariseowu adu iyudiwu. 14Jesúspa peda tedetitiã sábadowaidu dukuwede wexu kayawake. 15Naskata fariseowawe na wexu ibis ñukadiwu uĩyaitu naatu atu kebadi: “Jesúspa bai bechawaxu ea wetekere akadu ẽ chukia. Naskake ma ẽ uĩ”. 16Atiri fariseowawe yuidiwu: “Da iskara aka Epa Diosnaba peda tedetitiã sábadowaidu ikũira waiba”. Naskaweke wetsawawe: “¿Aweskawaxume tsuã atiruba keskara atirume chakawixu?” ikadax awirasi ikũira watanadiwuba. 17Awiana na wexu ibis ñukadiwu: “¿Mewẽ weru bia kayawaxua mi tsuara mi waime?” Na wexu ibistu atu kebadi: “Naatu Epa Dios tsai yuibis”, atu wadi.
18Naskaweke judíowawe naa wexu ibis ikũira wabiswuba uĩwiyaitu. Apa kedata awa kedadiwu. 19Naskakata ñukadiwu: “¿Da matu wakeme wexu kaĩdi? ¿Aweskawaxu ma uĩme?” 20Apaweta awã kebadiwu: “Da nuku wake wexu kaĩdi. 21Nu tapiaba tsuãra kayawaa ma uĩ. Ñukakawe. Ma dukuwedeaki awikui batu yuinu”. 22“ ‘Epa Diospa Jesús kañawadi’, tsuara ikaitu nuku ichanati pexe adu ikitiruba”, judíowu ikaiwawe dikakadi apawe awa besediwu. 23Naskake: “Ma dukuwedeaki ñukakawe”, apaweta awã fariseowu wadiwu.
24Judíowawe wexu ibis awiana ñukadiwu: “Duku yuikuiwe: ‘Epa Diospa ea kayawaa’. Ma nu tapia naa dukuwede chaka”, wadiwu. 25Naskaiwawe atu kebadi: “Ẽ tapiaba chakaraiki. Datiã ma ẽ uĩtiru. Ẽ wexu ibis”, atu wadi. 26Judíowawe ana ñukadi: “¿Aweskawaxu bia kayawaame?” wadiwu. 27Dukuwene ana kebadi: “Ma ẽ batu yuiwiyaitu ea ma ikũira waaba. ¿Aweskakĩ ana ẽ batu yuitirume? ¿Maariwi a udua tapibiswu ma ipaime?” atu wadi. 28Judíowawe ichãkata yuidiwu: “Mi naa dukuwede ikũira wawe. Nuuwawe Moisés nu ikũira wai”, idiwu. 29“Ma nu tapia Epa Diospa Moisés tsai adi. Naa dukuwede nu tapiaba wakiax uame”, Judíowawe wadiwu. 30Dukuwene atu yuidi: “Ma tapiaba wakiraduax ua. Askataba uxũ ewẽ weru ea kayawaxua. 31Ma nu tapia yura chakawu Epa Diospa dikapaitiruba. Askataba na aki idibaiwu naatu duiyai akaiwu atu dikatiru. 32Wani pishta ẽ dikabisba wexu kaya na kaĩditiã nu uĩbisba uĩyaitu. 33Epa Diospa nichiyabadike ẽ kayakeradaba”, dukuwede idi. 34Naa dikakakĩ judíowawe kebadiwu: “Mi chakakui kaĩdi. ¿Aweskai mi duku tapibapaime chakawixu? Nuku ichanati pexe adu ana mi ikitiruba”, wadiwu. Naduxu putadiwu.
35Jesúspa dikadi naa dukuwede wexu ibis ichanati pexe aduxu nichiawu. Naskaxu wedata wichixu ñukadi: “¿Dukuwene awẽ Wake mi ikũira waame?” Jesúspa wadi. 36“Diaiwũ, ¿naa dukuwede tsuame naa ẽ ikũira wanu?” dukuwene wadi. 37Jesúspa kebadi: “Naa mi awe tsaiki naa ẽ”, Jesúspa wadi. 38Jesúspa uĩyaidu titipakekawã: “Diaiwũ ẽ bia ikũira wai”, wadi. 39Naskata Jesúspa atu yuidi: “Ewẽ Epa Dios ikaduax ẽ bai adu udi ikũkui. Ẽ atu uĩyuiyudi. Na wexu uĩnuwu ẽ udi na uĩyaiwawe awiana wexunuwu”, Jesúspa atu wadi. 40Naa dikakakĩ fariseowawe Jesús ñukadiwu: “¿Nuriwi nu wexume?” idiwu. 41Naskaiwawe Jesúspa atu kebadi: “ ‘Nu wexuba nu chakabisba’, ma ika. Naskaweke ‘Ma nu uĩtiru’, raika matu chaka naskaspakedaka”, Jesúspa atu wadi.
Currently Selected:
Juan 9: mtsB
Highlight
Share
Copy
Want to have your highlights saved across all your devices? Sign up or sign in
