Lucas 6

Sábadowaidu na Jesúsuxũ tapipaudiwawe trigo awẽ exe widiwu

Mateo 12.1-8; Marcos 2.23-28

1Sábadowaidu Jesús na auxũ tapipaudiwuwe trigo wadayabeawu adu wudiwu. Na auxũ tapipaudiwawe trigowawe atũ wuku tesakata nawu wishki wishkiyakadi idiwu. Awẽ exewu piwui wukadi idiwu. 2Naskaiwawe fariseowawe atu yuidiwu: “¿Aweskawakĩ ma iskawaime? Diospa yurawu kekẽxu Moisés kedebadi sábadowaidu nu yudutiruba”, atu wadiwu.

3Jesúspa atu kebadi: “Ea yuikapu David#6.3 1.27 adewe. na awe rawebiswuweta awa pidiwume wudikakĩ. ¿Naa udua ma adebisbame? 4Na pan Dios inatiruwu awena inu naa pan sacerdotewu wistichi pitiru. Naskaweke Davidpa na pan pidi sacerdote ipaudiyabawixu. Oración pexe mera ikixu pidi. Na awe rawebiswuri pibadi. 5Dukuwene Wake udua yuikĩ ẽ udua ẽ batu yuinu. Dukuwene Wakẽ#6.5 5.24 adewe. yuitiru sábado nu awa watirumaiki”, atu wadi Jesúspa.

Sábadowaidu Jesúspa dukuwede betauxika ipaudi kayawadi

Mateo 12.9-14; Marcos 3.1-6

6Sábado wetsa Jesús sinagoga pexe mera ikita yurawu tapibadi. Dukuwene awẽ meke bibiyauri betauxika ipaudi nadu idi. 7Nadu fariseowuwe na dukuwedewawe na Diospa Moisés kedebadi yurawu atu tapibapaudiwu idiwu. Jesús aas uĩdiwu. Shinadiwu: “Sábadowaidu Jesúspa da dukuwede kayawaimaikixu nu uĩnu. Ma kayawadu nu ñuanu”, idiwu. 8Na shinayaiwu Jesúspa atu tapinaadi. Naa betauxika ipaudi yuidi: “Yurawu nexpakaya diwe”, wadi. Na dukuwede yurawu nexpakaya diinakawãdi. 9Yurawu Jesúspa yuidi: “Ẽ batu yuinu. Nu tapia na Moiséspa kededi sábado udua. Nu tapia sábadowaidu nu yurawu sharawatiru. Sábadowaidu nu atu chakawatiruba. Nu tapia sábadowaidu nu yurawu axutiru dayabanuwu. Sábadowaidu nu atu dabatiruba. ¿Na udua ma awa shinaime?” Jesúspa atu wadi. 10Naatiiwi atu uĩyaketa Jesúspa na dukuwede betauxika ipaudi yuidi: “Mewẽ biwi meshawawe”, wadi. Awẽ biwi meshawatadi. Awẽ biwi kayadi. 11Naskaweke fariseowuwe na dukuwedewawe na Moiséspa kededi tapibapaudiwu Jesúski sidakuidiwu. Awirasi yuinadiwu: “¿Nu Jesús aweskawatirume?” idiwu.

Jesúspa doce dukuwedewu kañawadi atu nichiwawaĩxikĩ na atu kekẽa axunuwu

Mateo 10.1-4; Marcos 3.13-19

12Peda wetsa Jesús bachi adu mapedi Dios kiwĩxikĩ. Naduxu yabetiixu kiwĩshidi. 13Ma pedadu na auxũ tapipaudiwu atu yuidi: “Dudu wekawe”, atu wadi. Ma aki weawudu doce kañawadi. Atu yuidi: “Ẽ batu nichiwawaĩdi na ẽ batu kekẽai maawawe ea axutanu”, atu wadi. 14Nawu Jesúspa atu kañawadi: Simón na Jesúspa ade wetsa Pedro adexuyabea idi, Simónpa awẽ chipuke Andrés, Santiago, Juan, Felipe, Bartolomé, 15Mateo, Tomás, Alfeopa awẽ wake Santiago, Simón wetsa na “Celote”, yurawawe wapaudiwu, 16Santiago wetsã awẽ wake Judas, Judas Iscariote naatu Jesús duikaspapaudiwu atu achibaxiwai Jesúswe rawebiswixu. Nawu Jesúspa atu kañawadi.

Jesúspa yura ichapa tapibata yura ichapawu kayawadi

Mateo 4.23-25

17Jesús bachi aduax na atu kañawaawuwe wediwu. Jesús mispadu netedi. Nadu auxũ tapipaudiwu wetsawu ichapa idiwu. Yura ichapariwi nadu idiwu. Atiriwi Judea bai aduawu idiwu. Atiriwi pexe ichapa Jerusalén aduawu idiwu. Atiriwi na pexe ichapa Sidón chaiba ipaudiwuwe atiriwi na pexe ichapa Tiro chaiba ipaudiwuri#6.17 Atũ bai enewa keseme chaiba ipaudi. nadu mispadu idiwu. 18Jesúspa yuiyaitu dikapai wediwu. Atu kayawanuri wediwu. Waka keskarawawe yurawu wekaxtiwaiwawe Jesúspa atũ kaya meradua putadi kayanuwu. 19Naskake naatiiwiwai Jesúspa awẽ saweti meepaidiwu naatumai naatiiwi atu kayawatiru uĩkakĩ.

Jesúspa yurawu yuidi watu yurawu idibatiruwumaiki

Mateo 5.1-12

20Jesúspa auxũ tapipaudiwu uĩkĩ atu yuidi: “Ma awayayabawiax ma idibatiru Diosmai matu diaiwu.

21Ma datiã wudiwi ma idibatiru maawu ma maña iixiwi. Datiã ma siaiwiyai ma idibatiru mamai witsaxiwi.

22Dukuwene Wake udua yuikĩ ẽ udua ẽ batu yuinu. Ma Dukuwene Wake#6.22 5.24 adewe. ikũira waitu yurawawe batu duikaspawiyaiwudu ma idibatiru. Batu putawiyaiwudu ma idibatiru. Batu ruãwiyaiwudu ma idibatiru. ‘Ma chakawu’, batu wawiyaiwudu ma idibatiru. 23Batu naskawawiyaiwudu idibakadi ichutiriniwuwakawe. Ea dikakapu. Batu ichãyaiwudu idibakawe mamai dai meraxu awara sharakui winupukui. Na batu chakawabiswu keskawakĩ atũ xidiwawe profetawuri naskawapaudiwu”, Jesúspa atu wadi.

24Jesúspa atu yuidi: “Da awa yupayaibawawe ẽ batu yuinu. Ma ubiskuinupukui. Naatiiwi ma wibis uduax ma idibai. Nawu uduax idibai ma idibai widatiruba.

25Da pikĩ sharawatiruwawe ẽ batu yuinu. Ma ubiskuinupukui. Ma wudinupukui. Da witsayaiwawe ẽ batu yuinu. Ma ubiskuinupukui. Shinabetsai ma siainupukui.

26Naatiiwixu batu ‘Sharakui’, waiwudu ma idibatiruba. Ma ubiskuinupukui. Na dukuwedewawe ‘Ẽ profeta’, raipaudiwu ayabawikadax naawuriwi yurawawe atũ xidiwawe ‘Sharakuiwu’, atu wapaudiwu”, Jesúspa atu wadi.

Jesúspa yurawu yuidi: “Na batu duikaspabiswu duikawe”, atu wadi

Mateo 5.38-48; 7.12

27Jesúspa na awa yupaiba ipaudiwu wetsawuya ma atu yuita na dikakadi idiwu atu yuidi: “Aka na ea dikayaiwawe duduri ẽ batu kekẽi. Na batu duikaspabiswu duikawe. Na batuki shinachakabiswu atu sharawakawe. 28Na batu ‘Diospa batu chakawapainu’, batu wabiswu atu ‘Batu Diospa sharawanu’, atu wakawe. Na batu chakawabiswu atu Dios kiwĩxukawe. 29Watura wetsã bia tapasiyaitu taki wetsari abawe. Mewẽ chompa bia wiãta mewẽ saweti wiãpaiyaitu wishkutaba inawe. 30Wetsã bia ñukayaitu inawe. Wetsã bia awara wiãke ‘Ea nasuwe’, wayabawe. 31Wetsawawe batu sharawatiru keskawakĩ atu sharawakawe. 32¿Na batu duitiruwu wisti ma duitirume? Naskara awaba. Yurawu chakabiswaweri na atu duiyaiwu wisti atu duitiruwu. Maariwi naskayaitu batuki Dios idibatiruba. 33¿Na batu sharawatiruwu wisti ma sharawatirume? Naskara awaba. Yurawu chakabiswaweri na atu sharawatiruwu wisti atu sharawatiruwu. 34¿Ma inayukĩ na batu nasutiruwu wisti ma atu inayutirume? Naskai akai awaba. Yurawu chakabiswaweriwi inayutiruwu na inayuatiiri atu nasuxinuwu. 35Na batu duikaspabiswu atu duikawe. Atu sharawakawe. ‘Ea nasuxinu’, itaba atu inayukawe. Naskake Diospa awara sharakuiwu batu inaxiwi. Na batu duikaspabiswu atu duikĩ Na Tsuã Winutiruba Bitsisipatu atiru maawawe aki iixiwi. Diospa yura chakawu atu sharawatiru. Na yurawu awara inaweke ‘Ẽ biki idibai’, wabiswubari atu sharawatiru. 36Yurawu ubisbakawe matu Epa Diospa atu ubisbai keskawakĩ”, Jesúspa atu wadi.

Jesúspa yurawu yuidi: “Sidayana yurawu ñuayabakawe”, atu wadi

Mateo 7.1-5

37Jesúspa atu yuidi: “Sidayana tsua ñuayabakawe batu Diospa sidayana ñuayabanu. Tsua duduri yuiyabakawe: ‘Ma yura chakabis. Naskake batu Diospa ubiskuibatiru’, atu wayabakawe Diospa batu naskawayabanu. Na wetsawu batuki chakabiswu aduri ana shinayabakawe na ma chakabiswu aduri Diospa ana shinayabanu. 38Wetsawu na yupayaiwu atu inakawe. Ma naskake na ma yupayai Diospa batu inawaidaka. Vendedorpa awara besewataba yurawu inatiru keskawakĩ Diospa batu inaxiwi. Vendedorpa awara besewataba yurawu inatirutu tanakuiwaxu tis tisata saa saata ana wuspiwatiru. Wuspikuiyax dirikaitu naatu yurawawe atũ sawetiki badexutiru. Yurawu awara inaxikĩ na ma tanawatiru keskawakĩ Diospariwi tanawawaidaka batu awara inaxikĩ”, Jesúspa atu wadi.

39Jesúspa tsai wetsawaxu atu yuidi: “Wexũ wexu wetsakai iyutiruba. Iyuwaidu naa rawe texpe mera paketiruwu. 40Tapibabisuxũ tapibistu aweskawaxukai awẽ tapibabis winutiruba. Ma awẽ kede keyuax awẽ tapibabis keskara itiru.

41¿Aweskakĩ mewẽ kaiwu uduax mi shinachakatirume awẽ weru adu iwi putu pishtake? ¿Aweskai mi shinachakatirubame iwi xate ewapa mewẽ weru aduke? 42¿Aweskakĩ mewẽ weru adu iwi xate ewapa wexuiwiaxu uĩtaba mi mewẽ kaiwu ‘Iwi putu pishta wexuika ẽ bia tsekaxunu’, mi watirume? Yura shara keskara mi tsaitiruwiax mi sharaba. Mewẽ weru adua iwi xate ewapa tsekayuwe. Naskaxu uĩsharakĩ mi iwi putu pishta wexuika mewẽ yura mi tsekaxutiru”, Jesúspa atu wadi.

Naa shinayaiwu yurawu tsaitiruwu

Mateo 7.17-20; 12.34-35

43Jesúspa yurawu atu yuidi: “Iwi sharapa awẽ wibi chaka itiruba. Iwi chakapa awẽ wibi shara itiruba. 44Wibiuxũ nu tapitiru awa iwimaiki. Iwi buxaya udua nu higo witiruba. Dishi buxaya udua nu uva witiruba. 45Yura shara isharatiru shinasharamaiwai. Yura chaka chakata itiru chaka shinamaiwai. Na shinayaiwu yurawu tsaitiruwu”, Jesúspa wadi.

Jesúspa yurawu yuidi awe keskarawumaiki na Jesús dikayaiwuya na Jesús dikayaiwubariwi

Mateo 7.24-27

46Jesúspa yurawu yuidi: “Maawawe ‘Diaiwu’, ma ea watiru. Naskaweke na ẽ batu kekẽa ma atiruba. 47Ẽ batu yuinu awe keskarawumaiki nawu iadu wekaxu na ẽ atu yuiyai dikatiruwu na ẽ atu kekẽai keskara atiruwu. 48Nawu dukuwene chai pukipakedi keskarawu. Ruwewãki horcón nichidi. Ma pexe adaitiadu pexe adu ede waipawã semewakĩ na pexe aweskawatiruba idi bitsisipamaiki. 49Ẽ batu yuinu awe keskarawumaiki na ẽ atu yuiyai keskatiruwuba ẽ yuiyaitu dikawikaxu. Nawu dukuwene bai pachi adu pexe wadi keskarawu. Awẽ pexe adu ede waipawã semewakĩ wuskewaĩ putadi. Chukĩ iki wetsedi”, Jesúspa atu wadi.

Currently Selected:

Lucas 6: mtsB

Highlight

Copy