HECHOS 16
16
Pablohuan Silashuan Timoteota pushashcamanta
1Chai q'uipami Pabloca Silasndic Derbe pueblota rishpa, Listra puebloman chayashpaca, cric Timoteo tuparcacuna. Paipac mamaca israelcunapura*f** Jesusta cric huarmimi carca. Taitaca griego*f** runami carca. 2Listra pueblopi, Iconio pueblopi causac criccunapacca, Timoteo alli nishcami carca. 3Pabloca Timoteota pushasha nishpami, paipac taita griego cashcata tucui chaipi causac israelcuna yachashcamanta, paicunahuan ama p'iñanacungapac Timoteotaca circuncisionta*f** ruhuachirca. 4Chashna ruhuachishca q'uipa rishpaca, Jesús acllashca huillaccunapish, criccunata pushaccunapish Jerusalenpi yuyarinacushca imalla ruhuana cashcata cazuchunmi, tucui pueblocunapi huillashpa purircacuna. 5Chashna huillacpica, criccunapac tandanacuica maipipish ashtahuanmi sinchiyashpa, punzhanta mirarircacuna.
Macedonia runata muscuipi shina Pablo ricushcamanta
6Pabloca Silasndic Frigia llactata, Galacia llactata rishpa, Asia llactapi alli huillaita huillasha nicucpimi, Diospac Espirituca mana huillachun saquirca. 7Misia llactaman chayashpaca, Bitinia llactamanmi yaicunata yuyarcacuna. Chaiman yaicunata yuyacucpipish, Diospac Espirituca chai llactamanpish mana yaicuchun saquircachu. 8Chaimantami Misia llactata rishpa, Troas puebloman chayarcacuna. 9Chai tutami Macedonia llacta shuc runa muscuipi shina ricurishpa: “Cai Macedonia llactapi ñucanchicta yachachic shamuiyari” nishpa shayacucta, Pabloca ricurca. 10Pablo chashna muscuipi shina ricushcata huillacpica: “Taita Diosmi ñucanchictaca chai llactapi alli huillaita huillachun c'ayashca” nishpami, Macedonia llactaman rina yuyailla carcanchic.
Pablohuan Silashuan Filipos pueblopi huillashcamanta
11Troas pueblomanta shuc barcopi tiyarishpa yacuta rishpaca, yacu chaupipi cac Samotracia llactamanmi chayarcanchic. Cutin cayandic punzhaca Necápolis pueblomanmi chayarcanchic. 12Chaimantaca Macedonia llactapi cac, jatun Filipos pueblomanmi rircanchic. Chai pueblopica, Roma*f** llactamanta shamushcacunami causacushca carcacuna. Chai pueblopimi asha punzhacunata carcanchic. 13Chaipi cashpami samana punzha*f** chayamucpica, chai pueblomanta llucshishpa, jatun yacu pataman rircanchic. Chai yacu patapimi, Taita Diosman mañangapac israelcunaca*f** tandanacuc cashca carca. Ñucanchicpish chaipi tiyarishpami, chaiman tandanacumuc huarmicunaman yachachircanchic. 14Chai huarmicunapurapica, Tiatira pueblomanta Lidia huarmimi ñucanchic yachachishcataca uyacurca. Chai huarmica morado sumac liensota c'atucmi carca, shinallatac Taita Diosta yuyaricmi carca. Chai huarmimanmi Apunchic Jesusca Pablo tucui imalla nishcata uyashpa cazuchun, alli yuyaita curca. 15Chaimantami paipac tucui familiandic bautizarishpa:
—Apunchic Jesusta ñuca ña cric cashcata yachanguichicmi. Cunanca jacuchic, ñuca huasipi samaringuichic— nirca.
Chashna nishpami, ñucanchictaca saquichirca.
Pablotapish, Silastapish prezu japishcamanta
16Shuc punzha Taita Diosman mañangapac ñucanchic ricushpaca, ima tucunata yachac supai japishca huarmi huambrahuanmi tuparcanchic. Chai huambraca chashna yachac cashpa imatapish huillacpimi, paipac amocunaca achca cullquita japiccuna carca. 17Chai huambrami Pablotapish, ñucanchictapish:
—¡Cai runacunaca jahua pachapi causac Taita Diospacta ruhuaccuna cashpami, ima shina juchamanta quishpirina cashcata huillancuna!— nishpa, caparishpa c'aticuclla carca.
18Ña tauca punzhacunata chashna nishpa ñucanchicta c'aticucllapimi, ña mana uyanachishpa Pabloca tigrarishpa, chai huambrapi cac supaitaca:
—¡Jesucristopac shutipimi, cai huambramanta llucshi nini!— nirca.
Chashna nicpi, supaica chai huambramantaca llucshircallami.
19Chai huambramanta cullquita japina tucuricpimi, Pablota chai amocunaca Silasndic japishpa, jatun plazapi cac mandaccunapacman aparcacuna. 20Chai mandaccunapacman apashpaca:
—Cai Israel*f** runacunami ñucanchic pueblopi p'iñanacuipi churashpa purincuna. 21Ñucanchicman mandashca shinaca mana yachachincunachu. Roma llactamanta caccunaca chai yachachishcataca mana uyashun ninchicchu. C'atinatapish mana c'atishun ninchicchu— nircacuna.
22Chashna nicta uyashpami, tucui chaipi caccunaca Pablotapish, Silastapish p'iñashpa, mana ricunachishpa jatarircacuna. Mandaccunapish:
—Cai runacunataca churanata llucchishpa, caspicunahuan macaichic— nishpami, soldadocunata mandarcacuna.
23Ña munai macachishpaca, paicunata carcelpi churachishpami, carcelta cuidactaca:
—Alli alli chaparangui— nishpa mandarcacuna.
24Chashna mandashcata uyashpami, carcelta cuidacca cárcel ucu cuchuman paicunata apashpa, jutcushca tablacuna chaupipi chaquicunata canichishpa cadenahuan huatarca.
25Chashna huatashca cashpapish, Pabloca Silasndic chaupi tuta shinataca Taita Diosman mañashpa cantacucpimi, chaipi cac caishuc prezucunapish chaita uyarcacuna. 26Chashna mañashpa cantacucpimi, allpa chucchui cungailla munai chucchuchicpi, tucui cárcel pungucuna pascarirca. Huatashca cadenacunapish tucui prezucunamanta cacharirirca. 27Carcelta cuidac riccharishpaca, tucui cárcel pungucuna pascarishcata ricushpami: “¡Ñami tucui prezucuna llucshishca canga!” nishpa, paipac espadallahuantac huañuchirigrirca. 28Chashna ruhuagricucpimi Pabloca:
—¡Ama chashna ruhuaichu! ¡Tucui mashnami caillapitac canchic!— nishpa caparirca.
29Pablo chashna nicta uyashpa, carcelta cuidacca luzta mañashpami, ucuman yaicushpa Pablopac, Silaspac ñaupapi manchaihuan chucchushpa cungurirca. 30Chai ucumanta paicunata llucchishpaca:
—Amitocuna, ñuca quishpiringapacca, ¿imatatac ruhuana cani?— nishpa tapurca.
31Chashna tapucpimi paicunaca:
—Apunchic Jesucristota cri. Paita crishpami canpish, cambac tucui familiacunapish quishpiringuichic— nircacuna.
32Chai q'uipaca paimanpish, paipac huasi ucu tucui familiacunamanpish Apunchic Jesusmanta alli huillaitaca huillarcacunami. 33Chai tutallatacmi carcelta cuidacca tuta cacpipish, paicunapac chugricunata ña jahuachishca q'uipaca, paipac tucui familiacunandic bautizarircacuna. 34Ña bautizarishpaca, paipac huasiman pushashpa rishpami, micunata cararca. Paica paipac tucui familiacunandic Taita Diosta crishcamantami, munai cushicurcacuna.
35Cayandic tutamantami chai pueblota mandaccunaca: “Chai runacunataca cacharishpa cachailla” nishpa huillagrichun, soldadocunataca carcelta cuidacpacman cacharcacuna. 36Chaita huillacpimi, carcelta cuidacca:
—Mandaccunami cancunataca cacharichun mandashca. Chaimanta cunanca llucshishpa, cushilla richiclla— nishpa, Pabloman huillarca.
37Shina nicpipish, Pabloca soldadocunataca:
—Ñucanchicca Roma llactamanta cashca shinallatacmi canchic. Shina cacpipish ñucanchictaca manarac imata tapushpami, tucui gentecunapac ñaupapi macachishpa, carcelpi churachircacuna. Chashna ruhuashca jahuachu, cunanca pacalla cacharichun nishcacuna. Paicuna cacharingapac shamungacamanmi, ñucanchicca mana rishpa, caillapitac cashun— nirca.
38Chashna nicpi soldadocunaca mandaccunapacman cutishpa huillacpica, Roma llactamanta cashca shinata yachashpami mancharircacuna. 39Chai mandaccunaca Pablopacman, Silaspacman shamushpa paicunata cacharishpaca:
—Ñucanchicca cancuna Roma llactamanta shina cashcata mana yachashcamantami, cashnaca ruhuashcanchic. Cunanca cai pueblomanta llucshishpa richiclla— nircacuna.
40Ña carcelmanta llucshishpaca, Lidia huarmipac huasimanmi rircacuna. Chai huasipi tandanacushca criccunata “alli c'atinguichic” nishpaca, chai pueblomanta rircacunallami.
Currently Selected:
HECHOS 16: QXR96
Highlight
Share
Copy
Want to have your highlights saved across all your devices? Sign up or sign in
Quichua Cañar Nuevo Testamento © United Bible Societies in Ecuador, 1996.
