HECHOS 22
22
1—Caipi tandanacushca Israel huauquicuna, taitacuna, ñuca huillashcata uyaichic. Ñuca ima shina cashcataca, cancunaman huillasha ninimi— nirca.
2Hebreo rimaipi rimacta uyashpacarin, ashtahuanmi upallarcacuna. Chashna upallacpimi, Pabloca:
3—Ñucaca Cilicia llactapi cac Tarso pueblopi huacharishca, Israel runami cani. Shina cashpapish, cai Jerusalén pueblopimi huiñarcani. Ñucaca Gamaliel runa alli yachachishcami cani. Chaimanta ima shinami ñucanchic ñaupa taitacunaman mandashcacunata cancuna cunan punzhacunapi pactachicunguichic, shinallatac ñucapish Taita Diospaclla causashpa pactachicmi cani. 4Ñucapish ñaupaca Jesusta c'aticcunata huañuchisha nishpami, huarmicunatapish, c'aricunatapish japishpa, carcelman apachic carcani. 5Ñuca chashna cashcataca, curacunata jatun mandac curapish, cunac yuyaccunapish tucuimi alli yachancuna. Damasco pueblopi causac criccunata japimushpa, cai Jerusalenpi llaquichichunca, paicunami chashna mandashpa quillcata curcacuna. Chaimantami chai puebloman rircani.
Ima shina cric tucushcata Pablo huillashcamanta
(Hch 9.1-19; 26.12-18)
6Ashtahuanpish Damascoman rishpa ña chayacucpimi, chaupi punzha shinataca cungailla jahua pachamanta relampa shina ñuca muyundicta achicyachirca. 7Chashna achicyachicpi, pambaman urmashpaca: ‘Saulo, Saulo, ¿ima nishpatac ñucata p'iñashpa llaquichicungui?’ nictami uyarcani. 8Chashna nicpi: ‘Amito, ¿pitac cangui?’ nicpica: ‘Ñucaca can llaquichicushca Nazaret pueblomanta Jesusmi cani’ nirca. 9Ñucahuan riccunapish chashna achic nicta ricushpaca, munaimi mancharircacuna. Ashtahuanpish ñucata ima nishcataca mana uyarcacunachu. 10Chaipimi ñucaca: ‘Apunchic Jesús, ¿imatatac ruhuashayari?’ nicpi Apunchic Jesusca: ‘Jatarishpa, Damascollamantac rilla. Chaipimi can ima ruhuana cashcataca huillanga’ nirca. 11Jahua pachamanta relampa shina ñucata achicyachicpica, imata mana ricui pudircanichu. Ñucahuan pacta riccuna maquimanta aisacllapimi, Damascomanca chayarcani.
12Chai pueblopica, Moisés mandashcacunata alli cazuc, tucui chaipi causac israelcunapacpish*f** alli nishca Ananías runami causacushca carca. 13Pai ñucata ricungapac shamushpaca, cuchuyashpami: ‘Huauqui Saulo, cambac ñahui cutin ricuchun’ nicpica, ñuca ñahui alli tucucpi paitaca ricurcanillami. 14Chaipimi paica ñucataca: ‘Ñucanchic ñaupa taitacunata Mandac Diosmari, pai munashcata yachachun, pai cachashca Jucha Illac Cristotapish ricuchun, pai rimashcatapish uyachunmi, cantaca ñaupaman acllarca. 15Canca pai ricurishcatapish, shinallatac paimanta imata uyashcatapish, maipipish tucui gentecunaman huillagrinami cangui. 16Cunanca ama imata ashtahuan shuyashpa, jatarishpa bautizari. Cambac juchacunamanta Taita Dios chuyayachichunca, Apunchic Jesusman mañai’ nirca.
Mana israelcunapacman Jesús cachashcata Pablo huillashcamanta
17Jerusalenman cutimushpaca, Diosman mañana huasipi mañacucpimi, Apunchic Jesús muscuipi shina ricurishpaca: 18‘Cai Jerusalenmanta utca llucshishpa rilla. Can ñucamanta huillashcataca mana cazugrincunachu’ nirca. 19Chashna nicpica, cashnami nircani: ‘Apunchic Jesús, ñucaca canta criccunata tandanacuna huasicunapi macachishpa, carcelman apachic cashcataca, tucui mashnami yachancuna. 20Canmanta huillac Estebanta yahuarsapata ruhuashpa huañuchicucpipish, huañuchiccunapac churanacunata cuidashpa: “Allitami ruhuacunguichic” nishpami shayacurcani’ nircanimi. 21Ñuca chashna nicpica, Apunchic Jesusca: ‘Rilla. Ñucami cantaca caru llactacunapi causac mana israelcunapacman*f** cachagrini’— nirca.
Pablota soldadocunata mandac charicushcamanta
22Pablo cai tucuita huillangacamanca, israelcunaca*f** allimi uyarcacuna. Ashtahuanpish “mana israelcunapacman*f** cachani” nishcata uyashpaca:
—¡Huañuchichiclla! ¡Cai runa causachunca, mana saquinachu canchic!— nishpami caparircacuna.
23Chashna caparishpaca, munai p'iñarishcamantami paicunapac churanacunata chaspinacushpa, allpahuan shitarcacuna. 24Chashna ruhuacpimi, huaranga soldadocunata mandacca:
—¡Cancuna causana huasiman Pablota yaicuchishpa, imamanta chashna paita p'iñashpa, caparishcata huillangacaman macaichic!— nishpami, soldadocunataca mandarca.
25Chaipi paita huatashpa macagricucpimi, pasac soldadocunata mandactaca Pabloca:
—Uyai. Ñucaca Roma*f** llactamanta cashca shinallatacmi cani. Mandashcapi nishca shinaca, manarac imata tapushpaca, ¿ñucata macanallachu canga?— nirca.
26Chashna nicpi, chai mandacca huaranga soldadocunata mandacpacman huillagrishpaca:
—Chai runaca Roma llactamanta shinallatacmi cashca. Cunanca, ¿imatac ruhuagringui?— nirca.
27Chashna huillacpi, chai mandac shamushpa Pablotaca:
—¿Canca Roma llactamantachu cangui?— nishpa tapucpi, Pabloca:
—Ari, paicuna shinallatacmi cani— nirca.
28Shina nicpimi chai mandacca:
—Ñucaca achca cullquihuanmi chai llactapi causaccuna shinaca tucurcani— nirca.
Chashna nicpi Pabloca:
—Ñuca taita mamamantami, chai llactapi causaccuna shinaca cani— nirca.
29Chashna nicpica, chai macashun nic soldadocunaca Pablota saquishpa anchurircallami. Roma llactamanta shina cashcata yachashpaca, chai mandacpish Pablota huatachishcamantaca mancharircami.
Mandaccunapura tandanacushcapacman Pablota apashcamanta
30Huaranga soldadocunata mandacca israelcuna*f** imamanta Pablota huañuchigricushcata yachanata munashpami, cayandic punzhaca Israel*f** curacunata mandac curacunatapish, tandanacuc mandaccunatapish tucui tandachirca. Chashna tandachishpami, Pablotaca cadenahuan huatashcamanta cacharichishpa, paicunapac ñaupaman aparca.
Currently Selected:
HECHOS 22: QXR96
Highlight
Share
Copy
Want to have your highlights saved across all your devices? Sign up or sign in
Quichua Cañar Nuevo Testamento © United Bible Societies in Ecuador, 1996.
