HECHOS 24
24
Pablo pai ima shina cashcata mandac Felixman huillashcamanta
1Pichca punzha q'uipami, Pablota mandac Felixpac ñaupapi juchanchingapacca, Israel*f** curacunata jatun mandac Ananías curaca, maijan cunac yuyaccunandic, mandashcacunata yachac Tértulo runandic, Cesarea puebloman rircacuna. 2Pablota Felixpac ñaupaman apamucpica, chai Tértulo runaca Pablota juchanchingaraicumi, mandac Felixtaca:
—Canca alli yachac cashpami, ñucanchictaca alli mandacungui. Canmantami ñucanchicca alli sumacta causacunchic. 3Chashna sumacta causacushcamantami, tucui mashna alli nishca can mandac Felixtaca pagui nicunchiclla. 4Cunanca mana ashtahuan p'iñachisha ninichu. Chaimanta cai nishcallata uyashpa cui: 5Cai runaca puric ung:ui shinami, maipipish israelcunataca*f** pandata yachachishpa, macanacuipi churashpa puricushca. Paica Nazaret pueblomanta Jesús yachachishcata c'aticcunata pushacmi cashca. 6Diosman mañana huasitapish mana Diospac cashca shinatami ruhuashpa puricushca. Chaimantami paitaca ñucanchicta mandashcacunapi nishca shina tapushun nishpa japircanchic. 7Chashna japishpa charicucpimi, huaranga soldadocunata mandac Lisiasca p'iñarishpa, shamushpa quichurca. 8Chashna quichushpami, paita juchanchiccunataca can mandac Felixpac ñaupapi tapuchun nirca. Cunanca canllatac ñucanchic imamanta juchanchicushcataca tapuilla— nirca.
9Chaipi cac israelcunapish:
—Ari, chashnatacmi— nircacuna.
10Shina nicpi, chai mandacca Pablota maquihuan seña ruhuashpa ricuchicpica, Pabloca:
—Canca tauca huatacunata cai llactata alli mandac cashcata yachanimi. Chaimantami ñuca ima shina cashcataca cushicushpa huillasha nini. 11Jerusalenpi Taita Diosman mañangapac ñuca rishcaca, cunan chunga ishcai punzhacunallami tucun. Chaitaca caipi caccunamanpish tapuilla. 12Chai pueblopica Diosman mañana huasipipish, tandanacuna huasicunapipish, maipi cashpapish ñuca pihuan p'iñanacuchishpa rimanacuctaca, pi mana japishcachu. 13Shinallatac cunan ñucata juchanchicushcataca, ‘chaica chashnatacmi’ nishpaca, pi mana ningachu. 14Caillatami canman huillagrini: ‘Mana allita c'aticcunapurami’ nicucpipish, ñucaca Jesusta c'atishpa, ñaupa taitacuna shinallatac Taita Diosman mañacmi cani. Moisés mandashcacunapi imalla quillcachishcatapish, shinallatac ñaupa huillaccunaman Dios quillcachishcatapish, tucuitami crini. 15Huañushcacunataca allicunata mana allicunatapish, Taita Diosca causachina cashcatami cushicushpa shuyacuni. Ñucata juchanchiccunapish chashnallatacmi shuyacuncuna. 16Chaimantami ñucaca Taita Diospac ñaupapipish, gentecunapac ñaupapipish mana juchanchishca alli causanallata munani.
17Tauca huatacunata shuc llactacunapi puricushca q'uipami, Diosman cushca cullquita ñuca llactapi causac huacchacunaman cungapac, shinallatac Diosman cuna cashcata cungapac Jerusalenmanca rircani. 18Ña chaita cushpa, Taita Diospac ñaupapi alli ricuringapac armarishca q'uipaca, Asia llactamanta maijan israelcunaca Diosman mañana huasi ucupi ricurircallami. Ñuca mana taucacunahuan cacpimi, ima p'iñanacuipish mana tiyarca. 19Chaicunami ñucata imata juchanchishun nishpaca, cambacman shamunman carcacuna. 20Ashtahuanpish paicuna mana shamushcamantaca, caipi caccunallatac ñuca ima mana allita ruhuashcataca canman huillachun. Paicunami caishuc mandaccunahuan tandanacushpa, ñucataca juchanchircacuna. 21Paicunapac ñaupapi: ‘Huañushcacuna causarinata crishcallamantami, cunan cancunaca tapucunguichic’ nishpami, sinchihuan nircani. Chashna nishcallamantami, cunan paicunaca juchanchicuncuna— nirca.
22Chashna nicta mandac Felix uyashpaca, Jesusta criccuna ima shina c'aticushcata yachashpami:
—Huaranga soldadocunata mandac Lisias shamucpimi, cancuna imata nisha nishcataca alli yachashpa, imatapish nisha— nishpami saquircalla.
23Chaimantami Felixca pasac soldadocunata mandactaca:
—Pablotaca ricurangui. Maijan paita ricungapac shamuccunatapish, imata cusha niccunatapish ama jarcanguichu— nishpami mandarca.
24Asha punzhacuna q'uipami, Felixca israelcunapuramanta cac paipac huarmi Drusilandic shamushpa, Pablota c'ayachirca. Chashna c'ayachishpaca, Jesucristota ima shina crinamantami tapurca. 25Pabloca Dios munashca shina causanamanta, mana alli munaita jarcarinamanta, imalla ruhuashcata Taita Dios taripana cashcamantapish huillacpimi, Felixca mancharishpa Pablotaca:
—Cunanca rilla. Cutin uyasha nishpaca, c'ayachishallami— nirca.
26“Cacharichun nishpaca, cullquita cungami” yuyashpami, mandac Felixca tauca cutin Pablohuan parlanacungapac c'ayachic carca. 27Ña ishcai huata tucucpica, Felixca pai mandacushcamanta llucshircami. Chashna llucshicpimi, Porcio Festo runaca mandac tucurca. Felixca israelcunahuan alli ricurisha nishpami, Pablotaca prezullatac saquirca.
Currently Selected:
HECHOS 24: QXR96
Highlight
Share
Copy
Want to have your highlights saved across all your devices? Sign up or sign in
Quichua Cañar Nuevo Testamento © United Bible Societies in Ecuador, 1996.
