HECHOS 4
4
Mandaccunapacman Pedrotapish, Juantapish apashcamanta
1Pedropish, Juanpish gentecunaman huillacucpiracmi, Israel*f** curacunapish, Diosman mañana huasita cuidaccunata mandacpish, shinallatac saduceocunapish*f** cungailla paicunapacman chayarcacuna. 2Pedropish Juanpish: “Jesús huañushcacunapuramanta causarishpa, tucui huañushcacuna causarina cashcatami ricuchin” nishpa, gentecunaman yachachicushcamantami p'iñarircacuna. 3Chaimantami paicunata japishpa, ña chishi cashcamanta cayandic tutamantacaman carcelpi churarcacuna. 4Chashna ruhuacpipish, paicuna huillashcata uyashpa criccunaca c'aricunallami pichca huaranga shina carca.
5Cayandic punzhaca israelcunata*f** mandaccunapish, cunac yuyaccunapish, mandashcacunata yachachiccunapish Jerusalenpimi tandanacurcacuna. 6Curacunata jatun mandac cura Anasca Caifasndic, Juandic, Alejandrondic, curacunata jatun mandac curapac tucui familiacunandicmi chaipi carcacuna. 7Pedrotapish, Juantapish paicuna tandanacushca ñaupaman c'ayachishca chayamucpica:
—Cancunaca, ¿pi mandacpitac, pihuan cashpatac chai mana puric runata chashna alliyachircanguichic?— nishpami tapurcacuna.
8Chashna tapucpi, Pedroca Diospac Espirituhuan cashpami:
—Israelcunata mandaccunalla, cunac yuyaccunalla, 9cunan cancunaca shuc ungushca runata alliyachishpa allita ruhuashcamantami ‘¿ima shinatac alliyachircanguichic?’ nishpa tapunguichic. 10Cancunapish, tucui israelcunapish alli yachachunca, cashnami nini: Nazaret pueblomanta Jesucristotaca, cancunami chacatashpa huañuchircanguichic. Cancuna huañuchicpipish, Taita Diosmi paitaca huañushcacunapuramanta causachirca. Chai Jesusllatac alliyachicpimi, cai runaca cancunapac ñaupapi alli tucushca shayacun. 11Jesusta chashna huañuchishpaca, cancunami huasita ruhuaccuna rumita mana nishpa shitac shina ruhuarcanguichic. Chai rumillatacmari, huasita ruhuangapac callaripi churana, tucuimanta yalli alli rumica tucushca. 12Cai pachapi causaccunata quishpichichunca, Jesusllatami Taita Diosca cacharca. Chaimanta ñucanchicta quishpichingapacca, pi shuctac Quishpichicca mana tiyanchu— nirca.
13Pedropish Juanpish mana manchashpa, allita rimacta uyashpami, chai mandaccunaca:
—¿Ima shinatac cai maipi yachacungapacllapish mana rishca, yanga runacunaca chashna rimancunayari?— nishpa, mana amirircacuna.
Chaimantami paicunaca Jesushuan puriccuna cashcata yachac chayarcacuna. 14Chai alliyashca runapish Pedrohuan, Juanhuan shayacucta ricushpami, paicunataca imata mana juchanchipac cacpi, upalla saquircacunalla. 15Chaimanta paicunata canzhaman cachashpaca, mandaccunapurallami parlanacurcacuna. 16Paicuna parlanacushpaca:
—Cai runacunataca, ¿imatatac ruhuanchic? Paicuna pi mana ruhuaipacta ruhuashcataca, Jerusalenpi causaccunapish tucuimi alli yachancuna. Chaimanta ñucanchic ‘mana chashna ruhuarcachu’ nishpaca, mana ni pudinchicchu. 17Chashna cacpipish, paicuna chashna alliyachishca maipipish ama yacharichunca, paicunataca: ‘Cunanmanta pacha pacta piman ashtahuan chai Jesusmanta huillanguichicman’ nishpa manchachishun— ninacurcacuna.
18Chashna ninacushca q'uipami, paicunata c'ayashpaca:
—Chai Jesusmantaca, ama ashtahuan piman huillashpa yachachinguichicchu— nircacuna.
19Shina nicpipish Juanpish, Pedropish cutimushpaca:
—Cancunallatac alli yuyarichic. Taita Diosmanca, paita cazunapac randica, ¿cancunata cazunachu ashtahuan alli canga? 20¡Ñucanchicca ñucanchic imalla ricushcata, uyashcata huillanataca manatac saquishunchu!— nircacuna.
21Chashna nicpica, ashtahuan manchachishun nishpami mandaccunaca:
—¡Paimantaca pacta piman huillanguichicman!— nircacuna.
Pedropish Juanpish chai runata alliyachishcamantami, tucui gentecuna Taita Diosta “allimari cangui” nircacuna. Chaimantami mandaccunaca mana macashpa cacharircacunalla. 22Pi mana alliyachipacta alliyachishca runaca, chuscu chunga huata yallitami charirca.
Mana manchashpa huillachun, criccuna Taita Diosman mañashcamanta
23Mandaccuna paicunata ña cacharicpica, Pedroca Juandic caishuc criccunapacman shamushpaca, curacunata mandac curacunapish, cunac yuyaccunapish ima nishcataca paicunaman tucuimi parlarcacuna. 24Chashna parlacpica, tucuimi shuc yuyailla Taita Diosman cashna nishpa mañarcacuna: “Ñucanchicta Mandac Dioslla, canmi jahua pachatapish, cai pachatapish, mama cuchatapish, chaicunapi tucui ima tiyactapish ruhuarcangui. 25Canta cazuc Davidman yuyaita cucpimi, cashna nishca:
‘Mana israelcunaca,*f**
¿ima nishpatac chashna p'iñarincuna?
¿Ima nishpatac manapish caipaccunata
ruhuashun nincuna?
26Cai pachapi jatun mandaccunapish,
shinallatac llactata mandaccunapish
Mandac Diosta p'iñashpa,
pai cachashca Quishpichic
Cristotapish p'iñashpami,
macashun nishpa tandanacuncuna’ nishcami.
27Chashna nishca shinallatacmi, cai pueblopica mandac Herodesca Poncio Pilatohuan, israelcunandic*f** mana israelcunandic tandanacurcacuna. Chashna tandanacushpaca, can quishpichichun cachashca, manapish juchayuc Jesusta p'iñashpami, shuc yuyailla tucurcacuna. 28Chashna ruhuashpaca, can ñaupaman alli yachashpa, chashna tucuchun nishcatami paicunaca pactachircacuna. 29Cunanca Mandac Dioslla, paicuna manchachina yuyaihuan jarcashcata ricuiyari. Ñucanchic can mandashcata ruhuaccunataca, imatapish mana manchashpa, canmanta huillaccunata ruhuaiyari. 30Shinallatac can quishpichichun cachashca Jesushuanca, ungushcacunata alliyachiccuna cachun, pi mana ruhuaipaccunata ruhuaccuna cachunpish, ñucanchictaca ruhuaiyari. Canca imatapish ruhuacllami cangui” nishpami mañarcacuna.
31Chashna mañashca q'uipaca, paicuna tandanacushca tiyacuc huasica chucchurcami. Diospac Espíritu tucui chaipi caccunapac shungupi junda cacpimi, paicunaca mana manchashpa, Diosmanta huillarcacuna.
Tucui ima charishcacunapish tucuipac cashcamanta
32Criccunaca achca cashpapish, tucuimi shuc shungulla, shuc yuyailla carcacuna. Pi “caica ñucapacmi, chaica cambacmi” mana ninacucchu carca. Chaimantami ima charishcacunapish tucuipac carca. 33Jesús acllashca huillaccunaca: “Apunchic Jesusca causarircami” nishpa, shungupi yaicuctami huillarcacuna. Taita Diosca criccunata mai c'uyashcamantami, imapish allicunataca tucuiman yallita curca. 34Chashna cacpimi, paicunapurapica maijanpish ima illaclla mana causarcacuna. Maijanpish chariccunaca allpacunatapish, huasicunatapish c'atushpa, 35cullquitaca Jesús acllashca huillaccunamanmi cuccuna carca. Chashna cushcataca paicunaca mana chariccunamanmi imalla illashcata randichun cuccuna carca. 36Chipre llactamanta curacunata ayudac levita José runapish, criccunahuanmi carca. Paitaca Jesús acllashca huillaccunaca Bernabetami shutichircacuna. Bernabé shutica: “Cushichic runa” nisha ninmi. 37Chai runaca pai charishca allpata c'atushpami, chai cullquitaca Jesús acllashca huillaccunaman curca.
Currently Selected:
HECHOS 4: QXR96
Highlight
Share
Copy
Want to have your highlights saved across all your devices? Sign up or sign in
Quichua Cañar Nuevo Testamento © United Bible Societies in Ecuador, 1996.
