ROMANOS 1
1
Roma pueblopi causac criccunaman Pablo quillcashcamanta
1Jesucristopacta ruhuac Pablomi caita quillcani. Diosmanta alli huillaita huillachunmi, ñucataca Taita Diosca Jesusmanta huillac cachun c'ayashpa ch'icanyachirca.
2Cai alli huillaitaca ñaupamanmi, Taita Diosca cushami nishpa paimanta huillaccunaman quillcachishpa huillachishca. 3Cai alli huillaica Diospac Churi ñucanchicta Mandac Jesucristomantami huillacun. Runa tucungapacca ñaupa mandac Davidpac huahua huahuapuramantami huacharirca. 4Shina cacpipish pai huañushcacunapuramanta causaricpimi, Diospac Espirituca Diospac Churi imatapish ruhuaclla cashcata ricuchirca.
5Jesucristomantami paimanta huillashpa alli canataca chasquircani. Tucui llactacunapi paita crishpa cazuccuna tiyachunmi, paimanta huillachun ñucataca acllarca. 6-7Chai c'ayashcacunapurapica Roma pueblopi causac cancunapish Jesucristopac cachun c'ayashcacunami canguichic. Taita Diosca c'uyashpami, paipaclla cachun c'ayarca. Ñucanchic Taita Diospish, Apunchic Jesucristopish mai c'uyashpa sumac causaita cancunaman cushca cachun ninimi.
Roma pueblopi causaccunata Pablo ricugrisha nishcamanta
8Puntaca cancuna crishca tucui llactacunapi uyarishcamantami, Taita Diostaca Jesucristomanta pagui nicunilla. 9Ñuca cancunamanta punzhanta mañacushcataca Diosllatac yachanmi. Ñucaca tucui shunguhuan paipacta ruhuashpami, paipac Churimanta alli huillaita huillacuni. 10Taita Diospac munai cacpica, cancunata ricungapac rishapishchari nishpami Taita Diosman mañacuni. 11Cancuna ashtahuan crishpa c'atichun nishpami, Diosmanta imalla alli yuyaicunata cungapac cancunataca ricugrinata munacuni. 12Cancunapish, ñucapish chaillatatac cric cashcamanta caishuc chaishuc yuyachinacushpa alli c'atingapacmi, chashna shamusha nicuni.
13C'uyashca criccuna, tauca cutinmi cancunataca ricugrinata munarcani. Shina cashpapish imamantapish jarcarishpami, cancunataca mana ricugrircani. Chaitami yachachun munani. Ñucaca ima shinami shuctac llactacunapi granota tandachic shina criccunata tandachircani, chai shinallatacmi cancunapac llactapipish tandachinata munani. 14Ñucaca griegocunamanpish,*f** mana griegocunamanpish, yachaccunamanpish, mana yachaccunamanpish huillanami cani. 15Chaimantami Roma pueblopi causac cancunamanpish alli huillaita huillana yuyailla cani.
Alli huillaica quishpichic cashcamanta
16Alli huillaica puntaca israelcunata,*f** mana israelcunatapish*f** maijanpish crictaca quishpichingapac, imatapish ruhuaclla Taita Diosmanta shamushcami. Chaimantami alli huillaita huillanataca mana pingani. 17Chai alli huillaimi ima shina Taita Dioshuan alli tucunata ricuchin. Chai alli huillaimi crishcallamanta Taita Dioshuan alli tucuna cashcata nin. Shinallatac Dios quillcachishcapica: “Taita Dioshuan alli tucushcacunaca crishcallamantami causanga” ninmi.
Tucui mashna juchayuc cashcamanta
18Taita Diosca jahua pachamantami tucui millai mana allita ruhuaccunataca llaquichishpa, pai p'iñarishcata ricuchin. Chai gentecunaca mana allita ruhuashpa causashpami, cashcata nic huillanataca jarcancuna. 19Diosmanta yachanataca paillatac ricuchicpimi, paicunaca allita yachancuna. Chashna yachashca jahuami, mana allita ruhuancuna. 20Diostaca pipish mana ricushcachu. Shina cacpipish pai ruhuashcacunata ricushpa yuyarishpami, paitaca ricsi pudincuna. Cai pachata Taita Dios ruhuashcamanta pachami, paica Dios cashcata shinallatac imatapish ruhuac cashcata ricunalla. Chaimanta chai mana allita ruhuaccunaca: “Mana ricsishcanichu” ninata mana ni pudincuna. 21Chashna ricsishpapish Taita Diosta shinaca mana alli nircacunachu, shinallatac mana pagui nircacunachu. Chaipac randica manapish caipac yanga yuyaicunata yuyashpami, paicunapac yuyaica amsapi shina yanga tucushca. 22“Jatun yachaccunami canchic” nishpapish, paicunaca mana yachaccunami tucushca. 23Paicunaca huiñaita causacuc, sumaimana Diosta alli ninata saquishpami, tucurinalla runaman, volashpa puric animalman, aisarishpa puric animalman, shinallatac chuscu chaquiyuc animalman riccha ruhuashcalla dioscunata adorancunami.
24Chaimantami paicunapac shungupi tiyashca mapa munaicunata ruhuashpa c'atichun, Taita Diosca saquishca. Chashna saquicpimi, caishuc chaishuchuan pinganayaipac juchacunata ruhuancuna. 25Paicunaca cashcata nic huillashcata saquishpami, llulla huillashcata c'atishpa, Diosllata cungurishpa alli ninapac randica, pai ruhuashcacunallata cungurishpa adorancuna. Taita Diosllami huiñaita alli nishca cana can. Chashna cachun.
26Chai pinganayaipac juchacunata ruhuashcamantami, Taita Diosca paicuna munashca shina ruhuashpa c'atichun saquishca. Shina saquicpimi, huarmicunaca c'arihuan chayarinata saquishpa, paicunapura chayarinacuncuna. 27Shinallatac c'aricunapish huarmihuan chayarinata saquishpa, paicunapi nina japiric shina mana alli yuyaicuna tiyashcamantami, caishuc chaishuc munanacushpa, c'aricunapura pinganayaipac juchacunata ruhuanacuncuna. Chashna mana allita ruhuashcamantami, paicunapac quiquin aichapi llaquita apana cashcamanta llaquita apancuna.
28Paicunallatac Diosmanta yachanata mana munacpimi, manapish caipaccunata ruhuachun paicunapac yuyaipi millai munaicuna junda cachun Taita Diosca saquishca. 29Chashna paicuna millai munaicuna junda cashpami, millaita ruhuancuna. Shinami ashtahuan charinata munancuna, imapish mapacunallata ruhuancuna, shuccuna ama charichun nishpa munancuna, huañuchincuna, p'iñanacuncuna, llullancuna, huashalla rimanacuncuna, shinallatac tucui imapish millaita ruhuancuna. 30Shinallatac shuccunata mana alli nishpa rimancuna, Diostapish p'iñancuna, pitapish yangapi churashpa rimancuna, “allimi canchic” nishpa jatun tucuncuna, pi mana ruhuashca millaita ruhuancuna, taita mamata mana cazuncuna, 31imatapish mana entendishun nincuna, ari nishpapish mana pactachincuna, pitapish mana c'uyaita charincuna, pitapish mana llaquincuna shinallatac mana perdonancuna. 32“Maijanpish chaita ruhuaccunaca huañunami can” nishpa Dios quillcachishcata allita yachashpapish, chaicunallatatac ruhuashpami c'atincuna. Shinallatac shuccuna chaita ruhuacta ricushpacarin allimi nincunami.
Currently Selected:
ROMANOS 1: QXR96
Highlight
Share
Copy
Want to have your highlights saved across all your devices? Sign up or sign in
Quichua Cañar Nuevo Testamento © United Bible Societies in Ecuador, 1996.
