Kodampaya 6

Akka taaqonewwa tappa reexamen

1Eta shakkaya kammaayye, ete orra amanno koopaan annooyye, Yihutaata a afaa Kirikki' hasaawannitto; Yihutaata a piita Yihuta oppa' dalatte qara'e qoojqooja paayyite. Wa malla qoojqoojte nefo, qoota ishootta qaarqaarsa a kuyyaata mina qootammo oppaayye, iskattaaysho a diiraasso qara le'ene a taakkane kapa' tooyni in kinnin malla. 2Erkamampayasene kudanka lakki ka se minan orra amanno piisa olopa halen ka ishootta' kidene, “Damta qoota malla kideeta ka kodase' xanno a qaaleta Waaqa kollissa diissata ino parpaaccisni in kitto. 3Semmalla hellaanno, orra a qalpeetaaysho a fayya minan kalataysame ka Hapura Qulqulloota isho ookuman immakaade nama tappa issippa reexa; ishoottan kodoose qara' shuummaay; 4Ka ino qinseeta isho qaaleta a Waaqa kollissaan japaannaay.”

5Wessen a kidene ka orra piisa xasayshen, sene are kammopa xata ca ka reexxamen; ishootta' nefo Istifaanoosise amanteeta isho Hapura Qulqullootatin immakaade ka Filippoosi ka Birokoroosi ka Niqaarooni ka Timoona ka Permena isho Ansookkittase Niqolawoosi isase amanteeta Yihutaata teyyade ka reexxamen. 6Ikka erkamampaya tura ishootta qaatishen. Erkamampaya ka ishootta' qinsaden ka harkaasso ishootta qara' qapaden.

7Qaaleta Waaqa qoota asse paldaattaan ante malla, lekuma a orra amanno ka Yursaalami kara akata koopaan aanen. Qeesewwa kuli oppaayye a akata leka ka amanen.

Taaqonittase Istifaanosi akka qapame

8Istifaanosi daassata Waaqa isho hupnanne immakaade ka samaytoppa wa orra qawwanna isho daxxowwa a kukutta' kooni. 9Sitiiyyi tika a qinseeta orra Yihuta a tika qinseeta, “A orra nataan sooknooti” kidammo kara ka Qereenaayye ka orra Iskintiriya oppa ka Kilqiya isho Issiya kara, orra takka takka ka Istifaanosi qara' xa'e ka isha shiisha paayye. #6:9 “orra natan sooke” kideeta orra a Yihuta a karpishshuma aorra piita pila kela sooke lelli. “Orra nataan sooke” Kideeta, orra a Yihuta a karpishshuma a orra piita pila kela sooke lelli. 10Ma xoori ookuma isho hapura Istifaanosi ishin haasawanno mina' oorissa in ettaninne.

11Sitiiyyi ikka orra a kido “Ha namoose Muuse isho Waaqa qara'e afaa otitta' haasawanni anka dakayne.” Dekandekatti isha qara' xaashen. 12Ka asseew samayta ka qimoota isho kollissampaya a seera isha qara' xaashen ka aanen ka Istifaanosi qapen ka firtishoonkota turopa dehayshen. 13Ka orra isha qara darta maakkumo takka takkan de'en; maakkiyyasene a darta ka kidene “Ha namoose tikoose a qulqulloota isho seera qara'e afaa otitta' haasawatta kamma oori in co. 14Ka kiiniwwi, ‘Yesuusise a Naasireti tikoose a qulqulloota'e alle' qitqishsha ka taanteta a Muuse ino' daashe alle' purshe anka dakayne.” 15Sitiiyyi orra a firtishoonkotoppa co piisa, ete Istifaanosi quda ilda koden ka tooynaaneeyye, fuulaadi fuula erkampattoota Waaqa'e ishootta' pahanaade.

Currently Selected:

Kodampaya 6: MaQu

Highlight

Copy