Kodampaya 7

Haasa Istifaanosi' haasawade

1Qeesittase kutta ka Istifaanosi kaassade ka kide, “Hela kuli wessen kidame dukaata?” 2Istifaanosi ka oorshe ka kide, “Hellaanno ka appadaannooyye! Intoonno ana dakayaay. Aakkinno Aprihaami a piita Kaaraani kara kallaatta in annin turanne, a piita Mosoppotaamiya kara cooyyeew Waaqase a ulfeena isha tura akkaade. #uuma 12:1 3Ka ishi' kide, ‘Piitaayshin isho daltaytaayshin kapa alle' xa'e ka piita an anti ke akkinno opa aane.’ 4Ikka sitiiyyi piita Kelaatata oppa alle' xa'e ka piita Kaaraaniti' kuti'e. Ete aappaaysho to'e kammaayyeew, Waaqa piita Kaaraani kara isha sookshe ka piisse a awwe a ishina oppa' kaltan oppopa ishan de'e. 5A koddito ma, piita a yetatta loqta mina' kitto nefo lehanda isha in daanne. Ma xoori, akkima piisse are kitto isha isho sanynyeetaadi a isha kamma deeto lehanda' kodo ka ishootta' daasho'e ishootta kippeeta' daashe. Umma a kippeese ishi daannooyye Aprihaami inna in qapo. #uuma 11:31; 12:4; uuma 12:7; 13:15; 15:18; 17:8 6Ka sanynyeetaadi akka piita laayyoti' kalayta koddito ka kallaatto; orrose ka para dippa afur karpishshadda ishootta kodado ka ishootta miiddo ishi' lele. #uuma 15:13-14 7Ka kamma' desa ishi' kideewwe, ‘Anti orrose sanynyeese xaayti karpishshadda' kodado qara'en farata. Ikka kelaayye nataan sookan ka porase are co oppa ana' sakatadan.’ #sooka 3:12 8Ka kodayteeta a dawra qara muratta ishi' daashe. Semmalla Aprihaami ete Hisaaqi xaayeeyye, letta settattatinni dawra qara ishi' mure. Hisaaqi ka innaadi Yayqoopi asseew dawra qara mure. Yayqoopi nefo ka hella sene' xaadi kudanka lakki isasene kaffa Isira'eeli qara aappada koddeeti asseew dawraasso qara mureew. #uuma 17:10-14; 21:2-4; 25:26; 29:31—35:18

9Hellaasene a Yayqoopi ka innaasso Yoosefi qara'e, needduma' xa'en ka piita Kipsi opa karpishsha isha katen. Waaqa xoori isha olli ca. 10Ka rakkoota piisa kela isha sookshe ka nuqusase a piita Kipsi Feri'ooni tura' daassataadi isho ookuma ishi' daashe. Nuqusase a piitase a Kipsi ka tikaadi piisa qara' mukissampayta isha kode. #uuma 41:39-41 11Sitiiyyi loota rakkoota kutta orra qara' qeette ka piita Kipsi isho a Kene'aani pisa oppa' deete; umma aappadasene xanno wa damane in qapan. #uuma 42:1-2 12Yayqoopi ete akka piita Kipsitiiyyi unta kitto dakayeeyye, paayyota'e, eeyyepa aappadaanno erke. 13Ete a lammattati piisse a Kipsi opa tiitaawen ka aaneneeyye, Yoosefi hellaassoti'i issi upnayshe. Toolaaysho ka Feri'ooni tura' upnaysame. #uuma 45:1, 16 14Se kammaayye, Yoosefi ka aappaaysho Yayqoopi isho toolase' xaaysho piisa akka isha kapopa de'o' kode; ishootta' nefo piisanti nama kunda tappa' keni kayni. #uuma 45:9-10; uuma 46:27 15Semmalla Yayqoopi piita Kipsi opa aane. Isha ka aappadaanno nefo ka eyye'ew le'en. #uuma 46:1-7; 49:33 16Lafaasso katama Sekemi opa haadamen ka hawla a Aprihaami katama Sekemi hella Amoori qara kaajaadin pidde kara' hawlamen. #uuma 23:3-16; 33:19; 50:7-13; Iyya 24:32

17“Ete etasene a oppa kippeetase a Waaqa Aprihaami' xaxaan daashe, dikkatta kela' foolsannittooyye, lekuma a samaytase' xanno a piita Kipsi kara cooti, koopaanne aanen. 18Piraampira qaraayye nuqusa pila a Yoosefi in upnin ka piita Kipsi' qara' nuqusume. #sooka 1:7-8 19Nuqusoose ka samaytinno qara' falqan xa'e ka aappadaanno miidda paayye ka akka nyooqqawwaasso le'ane'e, akka alle dakkane'e aappadaanno kitteesse#sooka 1:10-11; 22 . 20Sitiiyyi Muuse ka dalade. Isha' nefo fuula Waaqa' turaayye xarjaalliyya inna ka leya sessa tika aappaayshoti kara' qohame. #sooka 2:2 21Ete lakopa alle katameeyye, enenta Feri'ooni ka isha teyyatte ka a innaadi mina isha qohatte. #sooka 2:3-10 22Muuse ka ookuma Kipseeta piisa kollade ka haasaadi isho kodaadin japaade.

23“Muuse, ete paraadi kunda afuri kayeeyye, hellaasene, xaaysho a Isira'eeli kapopa anta ka ishootta tooyya dikade. #sooka 2:11-15 24Ka a nama Kipsi hellaasso oppa takka qara kallo ka isha miino akke ka innaasso qaarqaare ka isase miidammo' haalota pooyya'e, Kipsittas' dayshe ka ishshe. 25Muuse, ‘Akka Waaqa isha qudan orraaysho nataan sooksho, a orraaysho upnaado isha' pahanaatte; ishootta' xoori sede in upnaanne. 26Ka parraytaadiiyyi a Isira'eeleta lakki oli pirritto akke ka olkela qapa fade ka ishootta' kide, ‘Ishina orraayti a hellaa toola'ey, maana malla oli pirrittan?’ 27Namase namaaysho'ew qiino ka Muuse tuquure ka ishi' kide, ‘Ayno ino qara' piddampayta ka taanynya ke kode? 28Hela akka xala Kipsittase ikasse mina'e ana ikassa heentaawwe?’ 29Muuse ka ete sede dakayeeyye piita Kipsi oppa alle piita Miidiyaami opa qahe ka eyye' kalaytuman kallaade. Ka eyye hellaa a diira lakki xaayade. #sooka 18:3-4

30“Muuse a piisse kara para kunda afur pire kammaayye, koommayta irroota Siina oppa apittase hujjittoppa opaayno oppa dela erkampattoota Waaqa isha akkaatte. #sooka 3:1-10 31Muuse ete sede akkeeyye, oppa'e qawwaawe. Ete kapopa desa heeqqe ka tooynooyye, nessa Poqalla a asse kiino dakaye. 32‘Anti an Waaqa aappadaassina, an Waaqa Aprihaami ka Waaqa Hisaaqi ka Waaqa Yayqoopi.’ Muuse ka tammaqtan xare! Umma opa tooyyatta in maxanyumme. 33Poqalla ka ishi' kide, ‘Poroose a oppa' qa'atte, piita a qulqullaawteey, xopaatti sooksado. 34Anti miiddose kokkonnaatte a samayse xayyo Kipsi kara cooti dukaatannen akke ka quujattaaysho dakaye ka ishoottan paheeta' lekkade; amma nefo xooye, piita Kipsi opan ke erkaay.’

35“Muusese a samayta Isira'eeli tuqquure ka ishi kide, ‘Ayno ino qara piddampayta ka taanynya ke kode?’ toy isha. A koddito ma Waaqa erkampattootase ujjittoppa ishi akkaatte qudanne Muusese piddampayta isho nataan sookissampayta' kodde ka ishootta oppopa isha erke#sooka 3:1-10 . 36A piita Kipsi isho pakateeta a tiima qara daxxowwa isho wa orra qawwanna kodeetan, samayse sookshe ka para kunda afur ishoottan aane, toy Muusese isha#sooka 7:3; 14:21; dikoota 14:33. 37A Isira'eeleta' haasawade ka kide, ‘Waaqa Poqallaassin akka ana xaashe mina'e, hellaassina a diira oppaayye xuumampayta ishina' xaasha.’ toy Muusese isha. #ooreta 8:15; 18 38A samaytase koommaytoppopa ollopa oore olli caade ka erkampattootase irroota Siina qara xata isha' haasawatte isho aappadaanno olliiyyi caade tooy Muusese ishaaw. A qaalese a Waaqa a caatta ino' tarpishe toy Muusese ishaaw. #sooka 19:1—20:17; ooreta 5:1-33

39Aappadaanno xoori isha qara'e xa'en diishe isha' in ajajamme. Ka iskaran xata piita Kipsi opa tiitaawen. 40Ka Arooni' kidene, ‘Muusese piita Kipsi kara ino sookshe, wa isha qara' kaye ino an upnooy, Waaqadda ino tura' qatta ka inon aana ino' kode.’ #sooka 32:1 41Sitiiyyi ikka killoota a innayya okkatta pahato kodaden ka kalisoota kuli ishi' kalshen ka wa sene a harkaassotin kodeneetin xasooden. #sooka 32:2-6 42Waaqa xoori alle ishootta kapa ma'e ka akka hiikka moonta waaqaysadane'e, ishootta tupa desa alle' tuukke. Sede nefo akka mataaffa xuumampaya' qara' taafamte ka kiinitto,

‘Ishina samayta Isira'eelitiiyyi,

paroose kunda afur piisa kara'e

horeese qalamte isho kalisoota hela koommaytoppa ana'e kalissene?

43Ishina tukkana molooki

isho pahana a hikkitta a Waaqase xaayshina

a refaani kidammooti qapaten ka ishin anten;

ishootta' nefo kilannasene xaayshin a harkaassinan kodattene ka ishootta' sakatannittane.

Semmalla anti nefo akka Paapilooniiyyi tarpitan ka daanamtane'en koda. #Amo 5:25-27

44“Aappadaanno koommaytoppaayye, tukkanase amaakkuma'e qapan. Tukkanose nefo akkima Waaqa ishi' lele ka ishi akkishe qara a kode Muuse. #sooka 25:9; 40 45Aappadaanno ete piita orrase Waaqa amanni in kinnini a Waaqa alle ishootta tura daane lehadeneeyye, tukkanose a teyyadene Iyyaasu ollinni eyye karopa kalshen. Tukkanose ka haka sapana Taawwiti'i eyye caade. #Iyya 3:14-17 46Taawwiti ka fuula Waaqa' tura teyyatama teye ka akka Waaqa Yayqoopi tika kallaata' qupo'e qinseetan Waaqa kaassade. #Saamu a 2ta 7:1-16; otoo a 1ta 17:1-14 47Ma xoori a Waaqa' tika qupe Selomooni#nuqu a 1ta 6:1-38; otoo a 2ta 3:1-17 .

48“A koddito ma Waaqase piisa qara qapo tika a harka namatin qupamte kara kallaanni in co; sede nefo akka xuumampaytase' taafe ka kide, 49‘Poqalla ikiini,

Moonta suufaanetiyyo,

piita nefo kan pora an oppa loqtan yetannooy,

ka kuli tika atta pahato ana' quptan,

ka aysha tika an kara' kallaado ana' quptan. #Issa 66:1-2

50Waaqa ikiini <Sene piisa waan anti harkiyyon kode'enne?’

51Ishina kamtollayaayye, ishina a karittaayshin dundune, nappaassin ka dakkaawene, ishina akka aappadaassina mina'ew awta piisa Hapura Qulqulloota' toorrittan!#Issa 63:10 52Kamtoollayaay, aappadaassin ayno kamma pora in daannin? Ha aappadaassin xuumampayasene turan qattishe ka akkima hanqeellaytase de'o' lele'e leyshen. Ishina ka amma hanqeellittase toota' daassen ka ikassen. 53Ishina erkampattowwa Waaqa qudanne seera teyyatten ma xoori, ishina attooytine!”

Istifaanosi akkima dakaan dakkame ka to'e

54Firtishoonkotase ete sede dakayteeyye, imiirootte ka Istifaanoosi qara'e, miiran ilka ollin qomte. 55Isha' xoori Hapura Qulqullootatinni immakaade ka moontandela tooyyade ka ulfeena Waaqa isho Yesuusi a harka Waaqati akkitta qa'ade akke. 56Ka kide, “Tin moonta panamte inna nama ka harka Waaqati akkitta' qa'anna'en akkini.”

57Sitiiyyi ishootta ka nessa kuttan ullupen ka nappaasso qara qapaden ka takka' isha qaropa hiren. 58Ka katama kara alle isha sookshen ka dakaan isha dakken. Maakkiyyasene ka mehaddaasso a kallsannaane qeeden ka akka xayyoolayse takka Sawuli kidammo ishootta' tooyto'e loqqaadi kela' xaayaden. 59Ete dakaddaan isha dakkinaaneeyye, Istifaanosi iqinsade ka kide, “Poqallaa Yesuusi, napseetiyyo teyyado.” 60Ka kilpiippade ka nessa kuttan ullupe ka kide, “Poqallaay, juppoose ishootta qara an dikan!” Ka oori to'e.

Currently Selected:

Kodampaya 7: MaQu

Highlight

Copy