Mataafa Uumata 18
18
Xaykitta nama sessa Aprihaami kapopa de'e
1Kuyyaata takkaayye Aprihaami Memreeyye qora kukutta kapa kuyyaateeyye, tukkanaadi tura' qaa'e, Yaahiwwe ka ishi akkaade. 2Ete tooyyadeeyye, nama sessa a eeyye qaqqa'ade akke ka ishootta teyyattaa'e jarjartan kapoopa aane ka ishootta ulfeessaa'e, miinta piitan kaye. #Ip 13:2 3Ka kide, “Poqallaayyo, oton i''ana qara teyyanniiyyi, asu ana kapan in tarpan. 4Pisha a loqqaan jaqattane a ishina' de'en ka kello are kaatta qoyroose kela' xata nessada. 5Xaykuma'e ana kapoopa deeteneey, ana damta shakkayteeta ishina' qeedo ka oto' damtaneeyye, qara pora opa annittane opa antaneey.” Ishootta ka kidene, “A koddito.”
6Aprihaami ka tukkana kelopa jarjartan aane ka Saara' kide, “Daamma a unta a paxaara taara sessa qeede ka fayya' tiqqiire ka laaqqota laaqqe.” 7Sekkammaayye, Aprihaami jarjartanne aane ka horeetoppa mudukduka innayya a damta' sala' qeede ka orxayta' daashe, orxaytase ka qeede ka qale ka damta' harmishe. 8Aprihaami ka oori So'asene olli duuka ka aanna qeede ka xaykittaseti' dehayshe. Ka ete dammaneeyye, qoyrase kela ishootta kapa' qa'ade ka wa ishootta' qajna qara ishootta pappadaawni.
Akka inna diirta Aprihaami daladane kippeeta ishi' daasamte
9Ishootta ka ishi' kidene, “Iskatteetaayti Saara aysha kitta?”
Isha ka kide, “Eeyye tukkana kela kitta.”
10Yaahiwwe ka ishi' kide, “Paraanna essen ke kapopa tiitaawa, Saara ka inna diirta ke' xaayta.” Sitiiyyi Saara tultaadiiyyi xarra tura'e qa'atte ka torraasso dakkaysanni. #Roomi 9:9 11Sitiiyyi Aprihaami ka Saara akata kekeren. Saara' xopta iskattumaadi kuli ka deena qaatisse. 12Saara ka isi karn xata dikatte ka kiite, “Anti in kereey, poqallaayyo nefo ka asseew kereneey, hela essen ollin mukitta ettaninna?” ka xosalte. #Peti 1ta 3:6
13Yaahiwwe ka Aprihaami' kide, “Ata Saara maana malla kiite'e, ‘Hela an asse kere kammaayyen xaaya ettansha?’ Ka xosalte. 14Hela wa Yaahiwwen kamma icaane? Akkan ke' lele mina'e, paraanna essen ke kapopa tiitaawa, Saara sitiiyyi inna xaayta.”
15Saara' qoota tammaqte malla, “An xosalle” kiite ka marmatte.
Isha ka ishetta' kide, “Inna! ixxosalte”
Aprihaami qoota Sodoomi malla Waaqa qepade
16Orrase ka anta' xa'e, Aprihaami ka ishootta keessini. Ikka pora oppa ittura' xata Sodoomi tooynaan kayen. 17Yaahiwwe ka kide, “Hela waan koda heena'en Aprihaami tura juuta? 18Sanynyeeta Aprihaami akata koopta ka lekaatta. Isha minanne, samayta piita piisa ka saka akkaada. 19Isha akka hellaadi isho sanynyeetaadi piisa Yaahiwwe ajajaman ka hanqeeta ka wa paxaara'ew kodane'e akka ishootta kollisho'en isha reexade. Oton hellaadi porose a Yaahiwwen kallaaniiyyi, xasase an ishi' kale piisan ishi' koda.” 20Yaahiwwe ka kideewwe, “Juppoota a orra Sodoomi ka a Kamoora akata koopte, an ka ullupitta kela xaano kuli dakaye. 21Ishootta oppopan aana ka ullupittaaysho akka dukaata kodde ka in koddinin tooyya ka upnaada.”
22Sekkammaayye, orrase ka Sodoomipa anta' xa'e. Aprihaami' xoori Yaahiwwe kapa'e eyye'ew hase. 23Aprihaami ka Waaqa kapoopa desa heeqqe ka kide, “Hela xawwi asu hanqeellaya kuli juppoolaya olliiw pirta? 24Hela amma oto hanqeellaya kunda keni katamoosen kara caan namoose kunda keni malla katamoosen a' suraysatto? 25Inna assen kodan, xawwi ke a piita piisa qara' farata upo, atta hanqeellaya a juppoota in qapnin juppoolaya olli pirta?”
26Yaahiwwe ka kide, “Ha kadin hanqeellaya kunda keni katamoosen a Sodoomi kara caaneeyye, ishootta mallan kida ka katamoosen patissa diisha.”
27Aprihaami ka kideewwe, “Poqallaayyo, ana nama weti in dikammin in ke olli haasawatta paayyeey, ana in miiroodan. 28Hela kadi hanqeellaya kunda keni in kaynin ka kunda afuri' keniw koddan, namoose keni qaje malla katamoosen alle' patissa?”
Poqalla ka kide, “Oton ihanqeellaya kunda afuri' keni nefo kara caaneeyye, an pashsho.”
29Aprihaami ka kideewwe, “Hela kadi hanqeellaya kunda afuriiw kara caan honnoow?”
Poqalla ka kide, “Oton hanqeellaya kunda afuri nefo kara caayye, ishootta mallan katamoosen an patinnin.”
30Aprihaami ka kideewwe, “Poqallaayyo, ana amma nefo ke kaassado ka in miiroodan. Oto hanqeellaya kunda sessa pattaaw kara caan honno?”
Isha ka oorshe ka kide, “Oto hanqeellaya kunda sessa kara caan, ishootta mallan kida ka katamoosen an patinnin.”
31Aprihaami ka kideewwe, “poqallaayyo, in takka ke olli haasawatta paayyeey, dapa ana qara'en dikan. Oto hanqeellaya kunda lakkiiw kara caan honno?”
Isha ka kide, “Oton hanqeellaya kunda lakki kara caaneeyye, ishootta mallan katamoosen an patinnin.”
32Aprihaami ka kideewwe, “Poqallaayyo in miiroodan, me ana takkanneew ke kaassado. Oto hanqeellya kudan pattaaw kara caan honno?”
Isha ka kide, “Kadi hanqeellaya kudani nefo kara caan, kudanosen mallan katamoosen an patinnin.” 33Yaahiwwe ete Aprihaami olli haasawatta dikkisheeyye, isha kapa tawe. Aprihaami ka tikaadipa alle' tiitaawe.
Currently Selected:
Mataafa Uumata 18: MaQu
Highlight
Share
Copy
Want to have your highlights saved across all your devices? Sign up or sign in
