Mataafa Uumata 19
19
Juppoota Sodoomi
1Kalaakalaayye, erkampattowwasene lakki ete shishshipteeyye Sodoomi kayen. Sitiiyyi Looti moora a xarra katama' tura co oppa'e qaa'e. Ka erkampattowwasene akke ka ishootta teyyatta' minopa aane ka ulfeessa'e tura' miinta piitan kaye. 2Ka ishootta' kide, “Poqalladaayyo, xooya ka tikiyyopa anna. Loqqa kuli' jaqattan ka tikiyyo muktan ka parri paraappan xaatan ka pora opa annitan opa antaneey.” Ishootta ka kidene, “Inna'i, ino are mooraappa'ewwen mukna.”
3Ma xoori qoota Looti harmo ishootta naappade malla, isha olli tikaadipa kalen. Toola Looti ka laaqqota laaqqe ka eetota ishootta' dehayshe, ikka damen.
4A ishootta in muknin mali, orra katama Sodoomi piisa diirta a shakka ka a kuttanne takka' de'en ka tikase a Looti kapa muren. 5Ka Looti halen ka kidene, “Namase lakki tikaaytipa kale aysha ca? Oytaapa ino' sookshe, ishootta ollin muknaay.”
6Looti ka xarra iskamma' dufe ka orrase kapoopa oytaappopa sooke. 7Ka ishootta naapade ka kide, “Nammaay, wa asse paha in paxaaraneey, wa neeqa in kodan. 8Sekapaayye, tin tuparra lakkin qapaay, ana ishootta ishina' sooksho ka akka ishina aakto koda. Ma xoori, orrose xaykuma'e tikiyyo opa de'eneey, orra la'ayo in qappadan.”
9Orrase xoori i'ishi' kide, “Ino tura ma'e! Ata kalaytose ini maana kiini? Atti a ayno ka ino dehaammi? Areppa aane a taakiti a xaaysho qaran qapto'en wa neeqa ke qara' koonaay.” Ka Looti tuqquuren ka xarra qeqqepissa tukmanni. 10Xoori xaykittase lakki alleeta kelopa iskapoopa Looti titen ka xarra ittura' dufen. 11Ka sekkammaayye, orrase xarra tura co a shakka ka a kutta piisa akka xarrase in akkinini'i, qara ilda pashshen. #nuqu a 2ta 6:18
Akka Looti Sodoomi kara alle' sooke
12Xaykittase lakki iLooti' kide, “Nama a firaayti kodde katamoosen kara ica? Oton hella diira ka a tuparra ka a tuparraatti hemitta' qapanna taaki oton fira pila nefo katamoosen oppa qaptaayye, hale ka ollin katamoosen kara qaha; 13Ino katamoosen in patinnaay. Juppoota katamooseneti akata koopte, Yaahiwwe ka ullupitta kara xaano dakaye ka akkan patinno ino erkeey.”
14Looti ka sooke ka hellaasene tuparraadi hemitta' qapade kapoopa aane ka ishootta' kide, “Yaahiwwe katamoosene pashshaay, xa'a ka kara alle' qaha.” Ishootta xoori ponoota ishootta' pahanaatte, ikka puyaden.
15Erkampattowwasene parri paraappanne xa'en ka Looti' kiini, “Akka katamoosen olli a' pannini'i, iskatteetaayti isho tuparraatti lakki ollini jarjartan katamoosen kara alle' sooka.” Ka ishootta jarjarshen. 16Looti' xoori qoota iskamma dikanno malla, jarjara imalaale. Yaahiwwe ka ishootta suraysade, erkampattowwasene ka Looti ka iskatteetaadi isho tuparrasene' xaadi lakki tupa harka qaqqapen ka katama kara lakopa alle ishootta sookshen. 17Ete lakopa ishootta sooksheneeyye, erkampattowwasene oppa takka ka kiite, “Areppa alle' qaha ka issin paha, umma issi kamandesa in tooyyadan. Akka ishina a' pirammini'i, are naabose kara nefo in qa'adan, ma irroota qaropa qaha; a taakati ippiramtaneey.”
18Ma Looti' xoori i'ishootta' kide, “Poqalladaayyo, eeyyepa qaha an ettanshooy, assen kidan. 19Ana orxaytaayti ulfeenan ke kapa akkade, akka anan pahato'e akata ana suraysatte. Qootan irroota qaropa qaha an ettaninnin malla, rakkoose poroppa'ew ana qara' kayta, an ka takka punu to'a. 20Sekkapaayye, katamoosen shakka disi ca idehiiy, ana eeyyepa qaho? Ishootta shakkayaay, ana oppopa qaho ka eeyye issin paho.” 21Erkampattootase ka ishi' kiite, “Katamoosen a ana qara qinsatte ke mallan kida ka an patinnin. 22Haka eeyye kaynitto'e, we takkan nefo koda an ettanshooy, jarjare ka eeyyepa qahe. Semmalla maxxa katamoosene ka So'ari #19:22 so'aari afaa Iprutinni “shakkayteeta” kideeta. kidame.
Pateetta a Sodoomi isho a Kamoora
23Looti a letta piirteeyye So'ari kaye. 24Yaahiwwe ka moonte xata apitta ka porooda apitta a dakada paho Sodoomi ka Kamoora qara' roopshe. #Maati 10:15; 11:23-24; Luqa 10:12; 17:29; Peti 2ta 2:6; Yihu 7 25Ka katamaddoosen ka piita kapandesa kitto isho orra oppa kalo piisa ka unta dullaappa kitto piisa pashshe. 26Iskatteeta Lootiiw, qoota isi kammandesa tooyyatte malla, tuuda sookitta'e koddite ka eeyye' haste. #Luqa 17:32
27Parraytaadiiyyi, Aprihaami paraappanne porase a oppa Yaahiwwe tura qa'ade opa kede. 28Ete Sodoomi ka Kamoora ka piita kapandesa kitto piisa tooynooyye, qayya oppa xaano, qayya apitta a mura a kutta kupno oppa xaano paha. 29Waaqa ete katamaddoosen patinnooyye, Aprihaami'i dikade ka katamasene kara alle Looti sookshe.
Looti isho tuparraadi
30Looti' qoota So'ari kallaatta fuure malla, So'ariiyyi xa'e ka tuparraadi ollin irroowwa qudopa paqe. Ka tuparraadi lakki ollin rahana kara' kallaanni. 31Kuyyaata takkaayye, enenta a kutta i'ashakkati' kiite, “Aappinno aren ikere, umma nama ino hemo an ka sanynyeeta xaayanno, piita are kapandesa kitto oppa in co. 32Semmalla xooye ka akka aappinno' maashshoodo'e, taadeta wayneeta ikinna ka olli mukna ka hellaa ishi' xaayna.” 33Ikka awsetiiyyiiw aappaayshoti taadese a wayneeta ikishen ka maashshayshen. Halkeettiiyyi enenta a kutta ka aappaaysho olli mukte. Isha' qoota akata maashshoode malla, a enetaadi isha olli mukte ka kapa xaate kara'e issi in upnaanne.
34Parraytaadiiyyiiw enenta a kutta ka a shakkati' kiiteewwe, “Xallapooyye anti aappinno ollin mukeey, awwe nefo taadese a wayneeta ikinnaaw ka raawwaayye oto maashshodooyye atti olli mukeew. Assen koona ka akka sanynyeetinno in pannini'i, aappinno'e hellaa xaaynaay.” 35Ka oori awsetiiyyi taadese a wayneeta aappaaysho ikisheneew. Ka ete maashshoodeeyye, enenta a shakka ka isha olli mukteew. Isha' qoota akata maashshoode malla, a enentaadi isha olli mukte ka kapa xaate kara'e, issi in upnaanne. 36Tuparrasene a Looti lakki asse koden ka oori aappaayshoti hellaa hihhiten. 37Enenta a kutta ka inna diirta' xaayte ka maxxa ishi' koote ka kiite, “Mo'aapi.” #19:37 mo'aapi afaa Iprutinni, “a aappinnoppa de'e” kideeta. Orrose Mo'aapeta kidammo piisa sanynyeetaadiiw. 38Enenta shakka ka inna diirta' xaayteew. Ka maxxa ishi' koote ka kiite, “Peni'ami.” #19:38 peniami afa Iprutinni “inna orraayno” kideeta. Oo halenaaneeyyew, afaa Iprutinni nessa “Amooni” kiino mina paha. Orrose Amooneta kidammo piisa sanynyeetaadiiw.
Currently Selected:
Mataafa Uumata 19: MaQu
Highlight
Share
Copy
Want to have your highlights saved across all your devices? Sign up or sign in
