Mataafa Uumata 23
23
Toota Saara ka poraadi a hawla
1Saara ete paraadi dippa ka kunda lakki tappa kaye kammaayye, 2piita Kene'aanitiiyyi, katama Keprooni isasene Qiiriyaati arpa'i kidamma oppa'e toote. Aprihaami ka tootose a Saara malla nyarrahe ka pooye.
3Aprihaami ka pukkase kapa xa'e ka Hittaata kapoopa aane ka ishootta' kide, 4“Anti xaykuma'en ishin oppa kallaanniiy, poran oppa pukka iskatteetiyyo, hawlado ana' kata.” #Ip 11:9; 13; koda 7:16
5Hittaata ka ishi' kiite, 6“Poqallaay, tin are dakaye. Atti ino qara a nama kuttaay, nama ino oppa pora hawla ke dawro in cooy, turkadaanno oppa hawla a ke aako kara pukka iskatteetaayti hawlatta i''ettanissa.”
7Aprihaami ka xa'e ka Hittaatase kalataysata'e, miinta piitan kaye ka ishootta' kide, 8“Ete akkan pukka iskatteetiyyo are' hawlado ana owsatteneeyye, inna Soha'ari Efrooni qaraayye, 9akka rahanase dulaadippa torka quda pora Makfeela kiinaane qapo akka wa qeennaati ana' kato'e, are desa ana isha kaassada. Anka ishin kapa desa piddado, ikka xayyo koddo.”
10Sitiiyyi Efrooni hittaata olliiyyiiw ca ka orra piisa tura'e, Aprihaami' oorshe ka kide, 11“Poqallaay! dakaye. Akka pukka iskatteetaayti oppa' hawlatto'e, dulase ka rahana oppa co ollini, akka' teyyatto'e, orrinno a Hitti tura'e, in ke' daashe.”
12Aprihaami ka isha kalataysattaa'e, miinta piitan kaye. 13Ka orra piisa tura'e, Efrooni' kide, “Wa duloose' qeeda ana' lele, anaka oppa' pukkase hawlaado.”
14Efrooni ka Aprihaami' oorshe ka kide, 15“Poqallaay, heraadi laadi dippa afuri qeeda ma, firuminno kelli disheey sene maana ino qara nessishan. Atti xoori pukka iskatteetaayti eeyye' hawlaado.” 16Aprihaami isho Efrooni sede qara'e olli' kalen. Aprihaami ka akka siti hera heraammo qara'e, pirreeta dippa afuri Hittaata tura Efrooni' daashe.
17Dulase a Efrooni Mamreeyye qinda piirtota opa co ka qudaayye pora Maakfeela kiinaan a oppa rahana qapo ka a Aprihaami kodde. Duloose isho rahana oppa co ka qora kapandesa ca piisa, 18akka a Aprihaami kodden Hittaata moorappopa deete piisa ka upnaatte.
19Sekkammaayye Aprihaami ka pukkase a iskatteetaadi a Saara piita Kene'aaniti rahanase kara' hawlade. 20Semmalla dulase a Hittitta rahanase oppa co ollinni dula turka a Aprihaami kodde.
Currently Selected:
Mataafa Uumata 23: MaQu
Highlight
Share
Copy
Want to have your highlights saved across all your devices? Sign up or sign in
